Ritruvassi

Nascenu silenziu è rimore
Quandi a notte si scatena
È ch’ellu ferma un dulciore
Cum’è un tepidu luciore
Per schjarì a mo vita-scena

S’è tù entri hè per fà l’attrice
È per discorre cù u spaziu
À nant’à u filu d’orice
Quellu di e stonde felice
È di i lamenti è u straziu

A to voce hè una culomba
Chì mi face vultà u celu
È u turchinu ci ribomba
Cum’è a scossa d’una bomba
Chì move sempre u mo ciarbellu

S’è tù sè quì per u teatru
Avà sbalancu lu tindone
Arrubbaraghju cum’un latru
A sciappittana di u to sguardu
Per scaldà e note-abbandonu

Cumu pinsà chì sta canzona
Sparisciarà cum’è tant’altre
Puru s’ella conta una donna
Chì s’hè pigliatu a parte bona
Di e mo sulezze e più sgualtre

È ferma solu a to vistica
Frà i mo versi qualchi passi
Una parolla, una buscica
Da ricurdà si
Quandi u nostru trenu trica
Sin’à l’ora di ritruvassi

A.P.

27-28/01/2022

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.