Mandatu

Rispundarè dumane
Quand’u celu sarà
Rinatu da u bughju
Francu di timichezza
Quandi à l’orizonte
U sole spuntarà
Per dì ch’è tù sè quì
A più cara ricchezza

Sfilaranu le stonde
Cum’è la prima volta
Davanti à li me ochji
Smaravigliati è carchi
À stelle ch’ai accesu
Cù una risa colta
À e mo sunniate
‘Sse sponde ch’è tù varchi

In e tarre sicrete
Chì a to voce alliscia
Cresce, dapoi quandu ?
Un suppulu di tè
S’induvina un ventu
Chì punta una spiscia
Frà i monti ch’o sentu
Alzassi in core à mè

À a frebba chì colla
Per guarrì u mo male
À e parolle scritte
L’almanaccu di e mane
À u sonnu ritrovu
Ingiru à e to spalle
È à l’attesa, chì
Rispundarè dumane

A.P.

12/02/2022

Fiura : La Nuit étoilée di Van Gogh

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.