A leghji speculazioni in Corsica: semu tutti l’abitanti d’una casa secondaria ?

Un articulu scrittu da Rose Luciani 

L’articulu sicondu di a pruposta di leghji nantu à l’evuluzioni statutaria di a cullettività di Corsica pruponi certi mezi pà luttà contru à a speculazioni tucchendu u fondariu è l’alloghji di l’isula. U testu hè statu adupratu duranti a so prima lettura à l’Assemblea Naziunali u 5 di ferraghju di u 2022, dicendu chì « l’Assemblea di Corsica voli crià un tassu nantu à l’alloghji ch’ùn sò loca di residenza principali. » 

Saria un tassu tucchendu solamentu i residenzi secondarii, stu bè immubiliaru ch’esisti solamentu in rifarenza à a residenza principali: ciò ch’ùn hè micca principali è secondariu. 
A prima hè locu di vita cutidianu, a siconda un locu di vita sfarentu senza cunsequenzi suciali, prisentu di manera fisica ma fora di u so ambianti paisanu. 

L’aveti capitu, definizioni chjara ùn ci n’hè, ma sta parolla sempri impiegata piatta dinò i rialtà sfarenti annantu à u tarritoriu naziunali è isulanu, chì li pari sminticà a piazza di a casa di famidda in i rughjona muntagnoli, sopratuttu in u meditarraniu. 

Ma saria una residenza secondaria a casa di famidda ? 

Incù sta definizioni quì, st’alloghju hè paragunatu à a casa di vacanzi, di pettu à u so statu : ùn hè micca residenza principali. Bisognu tandu à cunsiderà a funzioni di stu bè piuttostu chì u so statu pà capiscia a sfarenza semantica. Incù a so teuria di u patrimoniu, Alois Brinz ci spiica chì un alloghju hè definitu sicondu u so liveddu d’attacamentu à un patrimoniu. A necessità di a custruzzioni è u so scopu sò mezi ghjuvendu à stimà su liveddu d’attacamentu. 

Paolo Grossi ci sprima chì u patrimoniu lasciatu da i so genitori tocca à l’esistenza d’una famidda. Pò essa certi bè spirituali tali chì i tradizioni, una cultura cumuna, l’idei tramandati. Hè dinò un bè materiali, com’è i petri d’una casa. U liveddu d’attacamentu à u patrimoniu di a so famidda hè palisatu da trè fatti principali: a tarra, u sangui è u tempu chì sprimani, d’apressu à noi a via d’un destinu cumunu vulsutu da un populu. 

« A tarra hè materna parchì cosa pruduttiva, fonti di sopravvivenza » 
A casa di famidda hè l’alloghju traducendu di manera fisica a radica. A tarra produci pà fà campà a so cumunità paisana. 

"U sangui opera un liamu iscindibili frà i sughjetti"
casa trasmetta da genitori à figlioli mostra a via lighendu l’omi è i so reti di sulidarità. 

« U tempu intesu com’è durata, com’è durata longa, chè, in quantu tali, pò sprimà a cuntinuità di i generazioni è firma il singulu com’è u puntu in una linea. » 
U tempu cria a diminsioni trà a tarra è u sangui, ch’ùn hani mancu esistenza senza durata. 


Tandu u distinu cumunu mostra una vulintà sparta da un populu: fà campà i trè fatti mintuati incù u patrimoniu è quissu sguassendu l’essaru individuali pà alzà a natura di i cosi è u gruppu. Incù sta lettura pruposta, si po sfarenzià cù chjarezza a casa di famidda è a casa di vacanza. 

A l’inversu, Nathalie Ortar ci hà datu una definizioni di sta casa siconda, com’è una ghjustificazioni di a prova di Paolo Grossi:

"Quiddi chì t’hani una casa siconda ùn hani mancu un liamu cù u paesu - a maiora parti di a so vita suciali si passa in cità - di più sta casa siconda esisti fora d’un passatu o di l’avvena, ch’hè accudata a rumpitura di a tramandera.”

Stu pinsamentu hè traduttu in a rialtà da parechji situazioni è scelti fatti o micca da i pruprietari, com’è a prisenza storica di a so famidda nant’à a cumuna, i scelti ecunomichi d’una stalazioni, ecc...). In cunclusioni, sti quistioni in giru à a definizioni palisani dui cosi:

Primu, u cuncettu di residenza secondaria ùn raprisinta micca a rialtà di u fenomenu immubiliaru ughjincu, eppuru hè u fundamentu di l’applicazioni legali, ch’una definizioni poca pricisa ùn aiuta micca à sfarenzià i casi. 

U cuncettu binariu di residenza principali / secondaria devi cambià incù l’usi ghjuridichi è fiscali ughjinchi, pà cunnoscia una evuluzioni versu l’idea di a « multi-residenza », sopratuttu in a sucità noscia, chì a mubilità forta hè diventata a norma.