L’EROI

Di l’eroi, ne pudariamu cuntà questule strasurdinarie e fole fantastiche. Di l’eroi fermanu fiure ideale chì s’imponenu cum’è asempi da seguità, mudeli da rifà. Face un bellu pezzu chì, di quessi, l’omi  urdinari è debuli si tenenu ammente i fattoni.

À i zitelli grechi, li facianu cantà, i maestri, pezzi maiò di a Teugunia di Esiudu, di l’Iliade o di l’Odissea di Omeru. L’autorità di i pueti, inde i tempi, era maiò, è nimu ùn pudìa impettà si à un’ idea stantarata inde l’identità greca quant’è l’era Omeru. Versi cunnisciuti da tutti, « par cœur » cum’è a dicenu i Francesi ; s’è t’aviamu a brama di « avanzà » appena, strascinendu da i capelli calchì argumentu, pudariamu « sumatizà » una cria a teuria. Si tratta tandu di rende si contu di l’idea, di fà la viva. Casca bè, a teuria hè tutta un affare di visione. Testimoni di l’idea, quand’ella s’impara « par cœur », sarà diffusa attempu à u sangue in calchì organu. Duvintarà cusì un elementu di u sistema, una necessità fisica l’idea.

Hè sempre intarissante di rimarcà quantu parenu zitelline certe teurie. A femu sempre cusì, oghje. I pueti sò sempri putenti, guide spirituale mandate da calchì putenza divina. Basta à leghje i Vangeli, contanu l‘eroe, u so trionfu di pettu à a morte.

Sarà par quessa, a so vittoria contru à a morte, chì l’eroe duvintarà densu. Fighjuleti à Ulisse, hà luttatu contru à tante criature, un diu putentissimu, ne hè sciuttu vivu. A so morte, l’avarà scelta ellu, da solu, postu chì da cunnosce u tuttu ci vole à campà tuttu, ancu a morte. Cascatu leccu, tombu da a freccia di Pâris inde u nervu di u talorcu, hè statu intrappulatu da un diu Achille, postu chì a cunniscìa a so storia (Apollone). Ma contru à a morte hà luttatu l’urgugliosu Achille.

A civilisazione greca – megliu cà a « nazione » greca – era tandu in ammirazione di pettu à isse fiure dipinte da i versi antichi. Sòcrate (è forse Platone) ùn era d’accunsentu incù issa mimesis eroica postu ch’elli t’avianu assai difetti l’eroi. Da crià a so Republica, ùn eranu l’archetipi di u so citatinu ideale.

Da a nascita di e nazione, l’eroi immurtali sò firmati, tandu, fundamenti di l’identità, di a cultura : di i valori. Da fà cresce a nostra, ci vurrìa tandu à cuntà l’azzione di Samperu, quelle di Circinellu o di Paoli, saria statu ancu megliu di truvà un’ Antigona à l’usu. Tutti, mi pare, raprisentanu una contraputenza, ch’ella fussi issa putenza a morte o u Statu. In ogni casu, lottanu contru l’assenza di muvimentu.

Cusì nascenu l’eroi attempu morti.

Vivi, cercanu di , è in issu senzu sò pueti, si movenu. Morti, omu conta i so fatti. Morti, tutt’ognunu si scorda di a so umanità, è li crea una vita nova, da un libru à l’altru. Sarà a so situazione, à mezu à a tensione trà a vita è a morte, chì sarà a cundizione di l’eroe. Un paradossu maiò ma necessariu, ci vole ch’ellu si ne morghi da nasce l’eroe.

I valori di tandu, quelli di i Lumi di u Diciottesimu, par asempiu, ùn stanu bè à l’omi oghjinchi ma a « nustalgia » di un tempu ch’ùn anu mancu vissutu, è chì, à elli, pare soiu, li stà d’incantu.

Quelli di tandu facìanu, quelli d’oghje aspettanu è temenu. Fermanu l’eroi, curanu e mente debule, e rassicureghjanu. Cusì nasce l’idea di u decadentisimu. Un cerchju funestu carcu di frustrazione è chì porta à idealizà un’epica ch’ùn era cusì luminosa.

Quelli di i Lumi anu schjaritu calchì stradone. Quelli d’oghje, farianu megliu à accende calchì focu. Si vede ogni culore in l’ombra fosca di u fumu. Ùn si trattarìa più di cuntà l’eroi, ma piuttostu di lascià li stà chì, in ogni casu, quant’è i so nemichi antichi, fermanu muntagne da trapassà.

Futugrafìa, “Atrium”, Marvina Scarpellini

Lasciate un cummentu ?

This site uses Akismet to reduce spam. Learn how your comment data is processed.