Venezia, un palazzu senza fundamenti

Venezia, ghjugnu 826. Sott’à l’ordine di u Doga Angelo Participazio, dui mercanti francanu u mare. Buono de Malamocco è Rustico de Torcello vocanu versi Alessandria. In e so mani, u destinu di a Serenissima…

Venezia sunnieghja di putenza. A so ecunumia sviluppata ingir’à a pruduzione è à a vendita di sale, li manca un’elementu di putere annant’à u mondu uccidentale : a prutezzione d’un santu. Nant’à u mudellu di Roma è di u so San Petru, si cerca di regulà u prublema.

À Buono è Rustico, u Doga li hà datu una missione : vultà da Alessandria cù e riliquie di San Marcu, amicu di San Petru è autore di u Secondu vangelu, chì hè statu messu à morte è sepellitu quallà. Ghjè cusì chì i nostri dui mercanti si ritrovanu à neguzià cù i monachi copti d’una cappella egiziana di e cime d’Alessandria. E circustanze d’issu scambiu fermanu scure…

È tir’avanti è via ch’elli ripartenu cù i resti di u santu.

È quì, prublema : cumu traversà a cità senza fassi chjappà ? Prima infurmazione, a maghjurità di a pupulazione d’Alessandria hè musulmana. Siconda, i musulmani temenu i purcelli. Eccu a suluzione : e reliquie di Marcu sò messe in corp’à un purcellu, ind’una sporta, è varcanu a cità cusì. Ghjunti à u portu, i duganeri, impeuriti, i lacanu passà.

A putenza di Venezia si basa tandu nant’à un’arrubecciu. Un puntellu sciambaru.

Scruccuneria è fede salvatrice

San Marcu è u so lione funu fatti patroni di Venezia, chì pò avà fà cuncurrenza à Roma è à u so San Petru è diventà un locu maiò di u cristianisimu. Una vera uperazione pulitica…

In l’annu 828, a prima ghjesgia dedicata à San Marcu hè custruita à l’impiazzamentu attuale di a basilica San Marcu. Ma, in lu 976, hè distrutta da e fiare. In lu 1094, quandu a ghjesgia hè ricustruita, si pone un prublema maiò : e riliquie ùn si sò più viste dipoi l’annu di l’incendiu. Senza elle, ghjè u mitu sanu di a cità chì si sprufonda. Cum’ultima spera, sò tandu chjamate e putenze sopranaturale : u doga dicreta trè ghjorni di dighjunu. À a fine di quessi, hè capita ch’un miraculu si pruduce : esce da una piacca di marmaru u bracciu di San Marcu, di ritornu pè salvà i Veneziani, posti torna sott’à a so prutezzione.

A ghjente s’azzinga à sta lighjenda, ma pè u sempre sò sparite e riliquie…

Ripercussione muderne

Mentre più di mill’anni, i Copti l’anu rivindicate. Ci hè vulsutu ad aspittà l’annu 1968 è u papa Paulu VI pè vedele vultà in corp’à a ghjesgia copta, in a Catedrale San Marcu di u Cairu. Purtantu, Ettore Vio, capi cunservatore di a Basilica San Marcu di Venezia, palesa chì nunda di San Marcu ùn hè statu resu à l’egiziani. Nunda, fora d’un pezzucciu di tissutu, messu in cuntattu cù a tomba di u santu. Si chjama una riliquia di cuntattu, è hà cuntintatu à tutti… A storia si ripeta, a fede salva torn’una volta, è torn’una volta hè quistione di diplumazia.

Da riassume, ghjè a forza d’una lighjenda chì hà permessu à Venezia d’imponesi nant’à a scena storica di u mondu. Purtantu, i so puntelli sò assai debuli : crisciuta nant’à una laguna malsana, un’arrubecciu hà fattu a so putenza è a fede cristiana cura è salva ste custruzzione. Ma oghje ghjornu, u sale è l’acqua assaltanu e so fundazione…

Fonte : L’Ombre d’un doute – Venezia, a cità di i misteri

Lasciate un cummentu ?

This site uses Akismet to reduce spam. Learn how your comment data is processed.