Iran : u culpacciu di Donald Trump à Emmanuel Macron .

L’istati d’Emmanuel Macron hè monda più piriculosu cà ciò chì era privistu. U prisidenti di a republica a s’hà dighjà corsa brutta par via di «l’affari Benalla», una timpesta in u bichjeri d’acqua par eddu, chì avarà avutu par effettu di scuchjà dui inchiesti parlamentari è una inchiesta ghjudiziaria annantu à l’attivà da unu di i so cullaburatori i più stretti. In più di quista, hà avutu com’è cunsiquenza d’imbarrà à a riforma custituziunali. Un affari ch’ùn hè ancu à compia.

Dinò, u capu di statu devi fà fronti à i dùbiti di pussibuli cunflittu di intaressu da u segretariu generali di l’Elysée Alexis Kohler, inculpitu d’avè favuritu un crucerista da u quali u capitali era cunservatu da a so famidda, quandu edd’avia a sedia à u cunsigliu d’amministrazioni à lu poltu di la cità di u Havre.

S’è quiss’affari inghjanduliscini u mandatu di Presidenti di a republica chi svoglia pà u mumentu in apparenti tranquilità, senza opposizioni credibili, ognunu essendu in lu statu d’anestesia generali, u capu di statu vedi i nuli i più affuscati vena da l’Iran.

S’è Emmanuel Macron duvaria dà u nomu à u timpurali chì s’accogliani al di sopra di eddu, lu pudaria chjama « Donald » tantu l’azzioni pulitica di u presidenti americanu pidda da daretu u presidenti di a republica francese.

I rilazioni trà i dui presidenti cunnoscini un ustaculu intornu à l’Iran.
U presidenti americanu hà dicisu – in modu unilaterali – di rinuncià à l’accordu annantu à u nucleari iranianu niguziatu da u so pridicissori. Considerendu l’Iran cum’è u principali sustegnu di u terrorismu internaziunali, Donald Trump hà reiteratu incù l’Iran a firmezza dimustrata à riguardu di a Corea di u Nord.

I sanzioni impurtantissmi presi da u presidenti americanu annantu à u pianu economicu contru à l’Iran sò u gattivu colpu purtatu à l’impresi francesi è dunqua à l’ecunumia esagunali. I sanzioni cuncernani a limitazioni annantu à i transazzioni finanziarii è i materii primi cusì chì l’ubligazioni pisendu annantuà l’automobili, u settori aerunauticu. L’imprese furesteri installati in Iran sò sottumissi à li sanzioni. U colpu hè temevuli.
Par l’intrapresi francesi, issi sanzioni sò una perdita pà l’avvena. Cuntaiani annantu à l’apartura prugressiva di u marcatu iranianu pà u sviluppu di i so attività internaziunali.

Dipoi à l’avvenimentu di li sanzioni, PSA o Total ani annunciatu a chjusura di a so filiera lucali.

L’intrapresi ùn sò micca u solu puntu di tensioni pà Emmanuel Macron.
Li sanzioni americani sò in traccia di purtà una nova crescita di i prezzi di u petroliu. L’Iran hè u terzu spurtatori mundiali d’oru neru, li sanzioni ùn facini palisà un risicu annantu à lu mantenimentu di a pruduzioni mundiali par rapportu à une crescita di a dumanda. A France, chì importa a tutalità di u petroliu ch’edda cunsuma, risicaria di veda u so deficitu cumerciali infuzassi.

Dopu à i sciffri di a crescita bassa è di l’aumentazioni di u debitu, saria un terzu cattivu indicatori pà u Guvernu. Di listessa manera, i ripercussioni annantu à u puteri d’acquistu di i francesi sò da anticipà incù a crzescita di i prezzi di a benzina.
L’alineamentu di i pianeti annantu à u pianu economicu pà Emmanuel Macron hè finitu. A meteorita Trump attraversa u spaziu di u Presidenti di a Republica.

Tandu, s’è Emmanuel Macron credi in la so bona stedda, duvarà imponasi à colpu di forza permanenti incù u Presidenti americanu. Pà eddu cum’è pà l’Auropa, hè una quistioni di credibilità.
Se nò, u tavonu neru economicu è puliticu s’avvicinani di ghjornu in ghjornu.

Lasciate un cummentu ?

This site uses Akismet to reduce spam. Learn how your comment data is processed.