A mudificazioni di a leghji litturali: attenti, periculu!

U Levante hà sprimatu a so inchietudina davantu à i colpi chì l’Assemblea Naziunali, à l’iniziativa di u gruppu LREM (A Republica in Marchja), li voli purtà. Dapoi à l’aduzioni di a legi litturali da votu unanimu di u Parlimentu in u 1986, u Levante si batta senza piantà pà a missa in baddu severa di sta legi, ultimu mezu di difenda si di pettu à a betunisazioni di a Corsica.

Parechji amendamenti à u prughjettu di legi annantu à u sviluppu di l’alloghju, di l’accunciamentu è di u numericu, aduprati annantu à avisi favurebuli di u guvernu, t’anu pà scopu di crià eccessioni nutabli periculosi à u principiu d’urbanisazioni di l’agglomerazioni è di i paesi, chì hè u principiu fundalentali di a legi litturali.

Sta nov’attaca, chì faci risunnà i ditti spavintosi di u prisidenti Macron annantu à a necessità di muddificà i reguli d’urbanisimu in Corsica, sò un periculu maiò pà l’integrità di a legi è risicheghja di guastà è di metta la in periculu.

Ghjè questu u casu di l’amendamentu chì t’hà pà scopu di parmetta, drentu à « settori dighjà urbanizati, altri chì agglumerazioni è paesi », l’urbanisazioni di « dents creuses ». Asista di sicura un risicu di trapiu : certi merii pudariani vulè metta, sottu à a prissioni di prumuttori o di mafiosi, di scriva cum’è « lochi dighjà urbanizati » erti lochi avendu una densità debbula di custruzzioni, apprendu via à una custruzzioni srupusitata è à la lestra annantu à i nostri litturali.

Di più, cuncirnendu l’amendamentu chì parmetta chì i custruzzioni necessarii à l’attività agriculi è furistieri pudissini, à l’avvena, essa custruiti in discuntinuità, u risicu hè di veda nascia falsi bastimenti agriculi chì sarani, dopu, scambiati in usterii, casi sicondarii, alberghi ecc.

D’u cantu di l’amendamentu chì hà pà scopu di renda l’implutazioni di cintrali fotovultaichi annantu à u litturali di più simplici, pari inghjustificatu chì tutti sti strutturi poni essa stalati senza nisuna difficultà à a seguità di zoni urbanizati.

Solu l’amendamentu chì voli parmetta a custruzzioni in discuntinuità di materiali d’addistimentu publicu micca cumpativuli incù a vicinanza di zoni abitati : quali vularia una Step o un centru d’intarrru di i mulizzu accantu à a so casa ?

Fora di stu ritegnu, U Levante hà riaffirmatu a so uppusizioni di ceppu à ogni mudificazioni di a leghji litturali, chì avarà pà effettu d’indebbulisia di manera inutila sta lrghja è/o di rimetta in causa a so faccindaghjini, sopra tuttu inde u cuntestu di pressioni spiculativa di chì pati a Corsica oghji.

One comment

  1. A quistioni pudaria anch’essa (in altri termini):”i forzi pulitichi corsi so, o un so micca, armati pà difenda ,sia u litturali, sia a Corsica in ghjinirali”?
    Quali so quiddi chi, in termini idiuloghjichi, hanni vintu in u 2017 e hanni a rispunsabilità di difenda u paesi? E “Pà a Corsica.”. D’induva ghjunghjini ssa ghjenti? d’Aleria, di l'”anti-culunialisimu”, di a manca tirzumundista,di cio chi si chjamaia tandu i “populi in lotta”, di u mitu rivuluziunariu suttanu, e di Che Guevara.
    U prublemu è chi ssu mitu un ha avutu micca tanti cunseguenzi pusitivi in a storia.Ni cunnisciti vo paesi ben guvernati da quissa idiulughjia? u Venezuela par esempiu?
    U mondu ha cambiatu, i naziunalisti corsi inveci no.
    I populi infelici, spluttati, e nicissariamenti ghjentili , induva so? Qualchunu l’ha mai scuntrati? U mitu di u Corsu “infelici” ;vittima di u Francesi ,certu ha vintu l’alizzioni.
    …parchi è un mitu gradevuli.Fin tantu ch’é infelici e vittima, u Corsu un è micca maio. E un ziteddu puliticu..Eti mai intesu un cantatori corsu cantà “Nurvegianu u me frateddu ti tengu caru” , o “sulidarità inc’a Finlandia?”
    U naziunalisimu corsu sonnia di un Sud immaghjinariu e ghjentili, vittima di u Nord cattivu.E l’idiulaghjia di ghjenti chi mai,manc’una volta, un hanni scambiatu una parolla inc’una parsona di u Sud.Mancu un famosu cantatori corsu pusatu à bia u caffè inc’a so “amica musulmana.”…
    Chi è l’Aquarius par ssa ghjenti? è propiu u stessu parsunaghju che quiddu di i canzoni:”L’immigranti chi stanta a so vita à colpi di sudori.”:Un mitu di u vintesimu seculu. Ancu Pasquali Paoli stessu (u tintu) è chjamatu in a so tomba pà duvintà un partighjanu cunvintu di l’islamizzazioni di u nosciu paesi.
    Di l’undici di sittembri, nimu un ha intesu parlà…
    U tempu è ghjuntu pà una dritta naziunalista muderna, demucratica, liberata da i vechji luni di l’edmondismu (d’una parti), e di l’ammirazioni pà Vladimir Putin. (di l’altra parti).
    Micca parchi a dritta avaria una supiriorità intellettuali assuluta, ma simpliciamenti parchi un c’è nazioni senza pluralità d’idei, e parchi à a fini, ci vo à di a verità à u populu corsu.par fa lu crescia e duvintà maio.
    Fin tantu chi u muvimentu naziunali sarà prighjuneru di l’edmondismu, sarà imputenti.
    Ghjuvanni di a Torri.

Lasciate un cummentu ?

This site uses Akismet to reduce spam. Learn how your comment data is processed.