Panzetta Paradise, u revival riacquistatu

Parchì ùn saria ghjuntu u tempu d’una rivista mensili, tali un Rock n’ Folk o Rolling Stone à l’usu nosciu pà cuntà a vita di a scenina isulana chì si campa dapoi anni è anni annantu à ghitarri è rullanti ?

Parchì a musica corsa muderna ùn saria chì stensioni è variazioni d’i stessi tema fundati da u Riacquistu 50 anni nanzu ? Alzatu in munumenti è statula, ci dimentichemu di a so natura prima, quidda di l’azzioni avendu una nascita, una vita eppo’ una fini, com’è tutti i soffii artistichi è culturali.

Parchì u riacquistu ùn saria natu pà varcassi iddu stessu è parmetta à l’essari d’intrà in u mondu ughjincu cù a libartà di l’azzioni criatrici, è cumpona senza a camisgia di forza di u passatu?

Tanti quistioni caschendu à a menti quandu si sentini i soni sporchi d’i ghitarri è u riverberu luntanu di i pedali à effetti, mustrendu l’ingegnu scarsu eppuru nigatu di a lingua noscia pà spiegà a musica ughjinca capaci à affiancà i so parolli sputichi ?

Ma s’apri sempri un campu di i pussibilità versu l’orizonti senza fini di a criazioni, macaru cù u Rock chjappendu l’estru corsu di Panzetta Paradise pà cumpona una prima canzona, libarata in a so cuscenza sana di a cultura chì pisa.

Eccu, calchì mottu par introittu à a prima prova di Théo Poli è Laurent Matteaccioli, stu coppiu aiaccinu ch’avareti cruciatu soli o cù d’altri gruppi isulani, frà i luci piattati di i terrazzi suttani à la nuttata. L’hani chjamatu “Un sò” è ghjè una sottigliezza da a musica ed u testu.

Di u Riacquistu preferiscini u so cuginu inglesi riacquistatu, un Rock Revival bedd’accunciatu da ghitarri è voci. A quiddu à chì li piacini i soni di viulenza purtati da l’ultima ondata amiricana dapoi deci anni, The Wytches, Twin Peaks, capisciarà u mischiu d’addisperu è di quistioni lampati in a rivolta. U Corsican garage rock pari tuttu i so vicini, senza nudda da invià.

“Ùn sò pueta ma possu pruvà

Ùn sò di quelli chì sanu parlà“

“Un sò”, dispunibuli annantu à u so primu dischettu “Houdini” escendu u 24 di marzu prussimu.