A Vene, Isula 2035

Capitulu I : Tornare

Sempri listessa affari. Ùn s’hè micca alzatu à l’ora privista, u caffè era freddu cutratu. Aspittaia un ragiu di soli, i prima lumeri par saltà ni so pantaloni, eppuru n’aviani dicisu altrimenti u celu grisgiu è a piossa d’acciaghju. Avali curria daretu à un taxi. Li vensi un’idea subbitamenti. Entri in a vittura, è lu tomba stu cunduttori, li amparerà u galateu à colpi di stilettu, stu connu chì lu faci corra com’è un maiali impauritu. Ah chì l’aspetta ! Avia sminticatu a mità di li so affari. Terminale trè, prestu prestu, aghj’à mancà l’avviò ! Cum’è s’è n’avia calcosa à fà, pusatu in u calori di a so berlina, di u so avviò à iddu, di u so ritardu, di l’impurtanza di stu viaghju. Allora li dici quantunqua, è quasgi lu suplicheghja, a boci dolci è un mezu singhjozzu sussuratu. Andeti andeti, Tarminali numaru trè, spicciatevi vi pregu.

Milano-Malpensa. Hè tuttu novu u terzu tarminali. I vitrati immensi parmittani ch’addintressi a lumera naturali, una tappizzeria di biancu, biancu cristallinu, biancu-grisgiu, fondacu blanchinettu, magazeni bianchisgioli. Una decina di risturanti infilarati, chinesu, americanu, francesu, talianu… Pocu mondu. Una famidda di turisti giappunesi finiscia u so ripastu, in un silenziu cumpletu, chì parsi infatti abbastanza tristu. I dui ziteddi teniani l’ochja mezi chjosi, è luttiani contr’à u sonniu. Li fighjuleti calchì minuta, spirendu di veda l’unu o l’altru cascà seccu in u so piattu. Vicinu à iddi c’era un americanu chì paria connu quant’era grassu. Hè troppu tardu par l’avviò. Li richjametini a so fami è l’assenza prulungata di sonniu. L’hà mancatu, anderà à u fondacu di a cumpagnia di trasportu par fà cambià u so bigliettu. Sarà mal’ricevutu cum’è sempri, è l’agenti l’ascultarani mughjà incù un surrisu scumudatu. Infini, pagarà u prezzu dumandatu, u supplementu par scanzià u bigliettu è a distinazioni, Signore, per Bastia dovremo aspettare fino a domani, allora scegli Aiacciu, eppo dopu c’hè u trenu… Incù a cuntinuità tarrituriali u costu di u Aiacciu-Bastia in trenu hè inclusu nu prezzu cumpletu, è riveni quasgi gratisi un ghjovi di frivaghju. I giappunesi sò partuti. Un solu nivulettu gallighjaia in u celu imbarnali, tufunatu in parechji punti.

*

Li dispiacini assai sti loca d’affullanza. Una patruglia chì passeti, cù l’armi automatichi americani. Dapoi  Parigi in u 2007, è ancu di più dopu à l’avinimenti di u 2022 à Roma, i paesa auropei hani rinfurzatu a sicurità interiori, è non solu in l’aeroporti ; i carrughji, certi magazeni, i stadii, i spidali… l’armata faci parti di u nosciu cutidianu. Eppuru, a paura firma. Firma in l’attitudini ovviamenti, i metro sò divintati grandi scatuli pieni di paura, i notti senza luna i passighjanti rasani i mura. Sta timia d’ogni ghjornu si traduci dinò in u votu. A Cunfederazioni auropea hè passata vicinu à a sparizioni. Certi hani parlatu di piriculu civilisazziunali. Li cummunità, rilighjosi, etnichi, di culori o di sintimi, si sò richjusi. Hani vintu certi partiti di strema diritta : Edouard Berlier in Francia, Klaus Ostrom-Muller in Germania… La Ripubblica di Spagna s’hè girata versu à un mischiu trà anarchisimu è una spezia di cummunisimu incù Juan Villa è lu so partitu El Pueblo Libero. In Milanu, Il Partito del Rinnovo s’hè piazzatu sicondu à l’ultimi elezzioni municipali. U sindaco, Cesare Adami, s’hè vistu cacciatu di a sedia… infini, miraculu o no, hà vintu par una dicina di voti. Una seria d’attentati islamichi hà custatu à u Vechju Cuntinenti centinai di vittimi. A viulenza pulitica, di li stremi di diritta è di manca, vensi cumpletà un mezu-seculu di disordini. Oghji, dicini certi, si vedi a fini, s’annuncia un “meddu”.

À iddu nun li piaci neancu a pulitica, sopratuttu quidda di l’alizzioni. Abburrisci u dibatitu. Ùn vota micca è s’intarissa ancu di menu à l’avvisu di quiddi chì si spiazzani a dumenica par assicurassi ch’iddi contani in sta sucetà. Società non c’è. Individui sì, mente libere sì ; il governo della Libertà è una necessità democratica, dicia Augusto Taccon in u so assaghju Governo è libertà, per una nuova filosofia economica del individuo. L’hà presu par u viaghju. Stu librettu di una cintinaia di pagini hà avutu un successu impurtanti cinquant’anni fa’. Hè mortu Augusto dapoi trent’anni, è in lu spaziu pubblicatu hè beddu spartitu u ricordu di u so sistema. A la Scuola Normale Superiore di Pisa, è à la so suredda di Parigi, c’hè statu quantunqua un Seminario Augusto Taccon in u 2029. Erani tutti prisenti i sò studienti i più famosi : James Col-Tucker, François de Calcin, Joseph Cohen… i spizialisti di u liberalisimu cuntinentali dinò : Romolo Acquafresca, Albert Fabrègue, Sir Robert Fallon, Jung Park… è tant’altri.

*

Avali imbarcheti. A nova seria di controlli li parmissi d’ussarvà appena l’aienti chì passarani l’ora chì veni incù iddu. Imprenditori è funziunarii chì si sò presi qualchì ghjornu di vacanza, turisti austriachi, tedeschi o fiorentini chì circaiani un locu induva s’incontreghjani i sporti di muntagna, l’alta qualità di serviziu, è u riposu di u turismu fuori stagione. Dui medichi cunnusciti, unu scrittori in mali di successu, è podassi dui o tre ladroni chì imbarcani par affari scuri. Una manata di zitedducci rumorosi. U restu nun era nutevuli, si dissi. Eppuru idda era quì, in mezzu à sta folla di bagagli, di lingui vicini o stranieri assai. Te’ un gruppu di francesi, vinuti da Parigi. Hani fattu una scala in Milanu : magazeni, musei, vita all’italiana, a formula classica.

“Alessiu Chiarelli… per favore, si rechi alla passerella che conduce al retro dell’aereo.”

Finestrinu, 27-F, sedia di manca. Daretu à u reattori. È nuovo di zecca ! si sclametini i so vicini di filari. Fiurentini ricconi. Hè vera chì sti motori à idrogenu erani intrati pocu tempu fa’ nantu à u marcatu. Indicazioni di sicurità. Si smurzetini i lumi. L’abbitaculu fubbi ciottatu in a bughjura è allora chì sbucceti fora u rumori, si feci cumpletu u silenziu fra’ i passageri. Sculleti l’apparechju di a Compagnia Corso-Sarda in l’azzuru milanesu, lascendu, à u nordu, l’Alpi annivati par u mari ghjinuvesu.

*

Spunteti prima a costa vergine di u Capicorsu. U mari incontra a rocca, a rena rada apparisci in i cali. L’ombra di l’apparechju subravuleti un paiu di battelli, imbarcazioni mudesti è sireni, chì carrizzaiani l’arici sottu à un soli d’imbernu. Firmeti in altitudini, chì duvia vulà fin’à Aiacciu. I monti erani annivati è fallaiani in vaddi timpestati di paesa. U caminu di farru curria longu à a piaghja. S’incimeti u cori di l’isula prima di sbuccià nantu à u mediterraneu uccidentali. Avali, si stesi a Cità imperiali.