alt

Lotta anti-maffia è cuntrasti ghjuridichi – Scontru incù Baptist Agostini-Croce

Baptist Agostini-Croce hè elevu avucatu à a Scola Francesa di u Bancu (EFB), laureatu d’una maestria di drittu penali intarnaziunali è di l’affari à l’Università Panthéon-Sorbonne,  iddu publicaia sei ghjorna fà un paragonu trà l’usi legali francesi è taliani par luttà contru à a maffia. 

U so testu traduttu in corsu da leghja quì, seguitatu da a so intarvista:

Monda parsonni hanni raghjuntu certi cullittivi dichjarati “Anti-Maffia”, bramosi di schjarì i cuscenzi populari di pettu à a niccissità d’un arnesu legali rinfurzatu piantendu u crimu organizatu in l’isula. St’associ portani una lotta ghjusta, è hanni fattu molti pruposti impristati à u drittu penali talianu. Pinsani chì sti scopi sò novi paragunati à u sistemu ghjuridicu francesu, cunsidaratu povaru assai quand’iddu scontra un affari di crimu organizatu.

Parò, parini pocu cunvinti sti pruposti, chì a leghji francesa copri stu duminiu ‘ghjà, è l’idei sottumissi da ogni cullittivu trova a so piazza in u drittu pusitivu. Tandu, ci voli à studià pricisamenti i sumiddi trà regimi francesi è taliani, ch’in Tarra ferma hè stata monda scunfissata da a Corti Auropeana, a pulitica carcerali contru à i Maffiosi. Una critica ancu di più aspra, ch’hanni principiatu in Roma l’audienzi di u Maxi prucessu è di a ‘Ndrangheta.  Par via di stu raghjunamentu ch’ùn circa à dà nemmenu lizziò, nè pruposti di lotta contru à u fattu maffiosu, pruvaremi da mustrà chì i reguli taliani spirati sò prisenti in drittu francesu.

L’associazione di tipo mafioso”, parolla maestra di a procedura taliana

Misura prima, u famosu malfattu talianu “d’associu maffiosu” hè l’ughjettu di monda asempii. Saria a suluzioni à ogni dannu di u crimu organizatu, sguassendu incù vigori l’orma maffiosa, casticu mudernu di a Corsica. Parò, basta a leghja ogni paragrafu di l’Articulu 416 bis di u Codici penali transalpinu reghjendu l’infrazioni ditta è vidimu tandu chì l’evuluzioni aspittati in u drittu francesi sariani magri. Parchì ? Chì u drittu ripressivu ughjincu capisci ‘ghjà l’arnesi niccissari par a lotta di i  malfatti accadutti in u cuntestu di a criminalità organizata. Sprimati di manera sfarenta, l’arriccata di l’associazione di tipo mafioso si ritrova sottu à d’altri formi in i codici francesi.

Un’associu « maffiosu» cumpostu da parechji parsonni

L’articulu talianu cundanna: “Ognunu ch’apparteni à un associu maffiosu fattu d’almenu trè parsonni.” In Francia, dui aspetti impurtanti esistini tramindui: l’associu di malfattori è a squadra organizata. A participazioni à l’associu di malfattori hè definita in u paragrafu primu di l’articulu 450-1 di u codici penali, dicendu ch’“hè un associu di malfattori ogni gruppu furmatu da un’intesa appruntendu incù unu o parechji fatti materiali, unu o parechji crimi o unu o parechji malfatti cundannati d’almenu cinqui anni in prighjoni.” L’articulu 132-71 di u stessu codici porta una pricisioni, “hè squadra organizata, à l’ochja di a leghji ogni gruppu furmatu o intesa appruntendu da unu o parechji fatti materiali, una o parechji infrazioni.”

Par schjarì sti testi, sarà cundannata a participazioni à l’associu di malfattori s’iddu esisti un’intesa trà parsonni circhendu da appruntà unu o parechji crimi o malfatti, à partesi di u mumentu ch’ognunu hà raghjuntu u gruppu, cuscentu è bramosu d’aiutà stu prughjettu.

St’infrazioni parmetti di perseguì l’atti anteriori, ch’ùn avariani mai stati cundannati da u drittu penali internu. U drittu francesu reprima à l’iniziu di a prova, chì teni un principiu d’esecuzioni di l’infrazioni. Parò, nun si trova nissunu principiu d’esecuzioni quì, chì l’aghjenti di u gruppu appruntani solamentu l’infrazioni da vena.  Cunsequenza: in lu duminiu di u crimu organizatu, sò missi in baddu l’arnesi par cundannà ciò ch’ùn sarà mai perseguitatu in l’atri infrazioni. A squadra organizata, idda, ùn hè micca un malfattu, ma una circunstanza pighjuranta chì ghjova solamentu par i fatti o provi di fà certi infrazioni. Suggerisci un’organisazioni strutturata trà i so membri è a premeditazioni. Tandu parmetti a cundannazioni più forta d’un crimu o malfattu d’un gruppu. Pricisioni, si pò cundannà una parsonna par associu di malfattori appruntendu un’infrazioni, incù a prinsenza d’una infrazioni fatta in squadra organizata, quand’i fatti sò condivisi. Eccu l’asempiu di i suluzioni larghi assai, dati da a leghji è a ghjurisprudenza francesa par luttà contru à st’azzioni, aiutendu à reprimà un gruppu criminali sanu. Tandu a leghji taliani raghjunghji a leghji francesa. L’associu maffiosu cumpostu d’almenu trè parsonni, definita in u testu talianu,  saria cundannata in Francia par via di i dui pussibilità annunziati insù.

L’adopru di a forza d’intimidazioni

In Italia, l’associu hè dittu maffiosu s’è i membri adoprani “a forza d’intimidazioni” di u liamu associattivu è l’omertà par un crimu o malfattu, o par “uttena di manera diretta o indiretta a gestioni o a maestria d’attività ecunomichi, di cuncissioni, d’autorisazioni, di mercati è di servizii publichi, o par uttena benefizi o vantaghji senza ghjustificazioni par iddi o l’altri, par impedì l’eserciziu libaru di u votu, par uttena i voti mentri l’alizzioni.” I militanti volini chì a forza d’intimidazioni sia ricunnisciuta in u drittu internu. Parò, stu paragrafu hè solamentu u spechju francesu di parechji infrazioni. L’intimidazioni, aduprata in l’estorzioni hè cundannata à l’articulu 312-1 di u codici penali, tradutta da u fattu “d’uttena da a viulenza, minaccia di viulenzi o custrizzioni, sighi una firmata, un ingaghjamentu o u rinunciamentu, sighi un sicretu palisatu, sighi soldi, valori o bè dati”, o ancu d’una minaccia incù ordini d’eseguì una cundizioni (articulu 222-18 di u stessu codici).

Dopu, u testu talianu cundanna di manera più forta quandu l’associu hè “armata”, un casu seguitatu in Francia chì certi infrazioni fatti incù un’arma crescini u quantum di a pena. I cundannazioni sò più impurtanti cù l’iputesa “d’attività ecunomichi finanzati da u pruduttu o u benefiziu di malfatti o crimi”, o in Francia, bianchighjà i solda, infrazioni privista à l’articuli 324-1 è seguitendu u codici penali.

U priculu d’una ripressioni più forta

Avali, scrivì una leghji francesa contru à a maffia è diventata difficiuli, ch’avemi l’arnesi ‘ghjà. Di più, ùn ci scurdemi micca di a prucedura d’eccezzioni aduprata mentri a custodia, a perquisizioni, i technichi d’inchiesti particulari, u statutu di ripentitu o ancu i testi ghjuridichi nantu à u crimu organizatu. Sti puteri sò putentosi, s’opponini à i libertà parsunnali, è a tindenza aduprata da a leghji vutata u 23 di marzu di u 2019, chì parmetti di stenda i proceduri di crimu organizatu par “ogni crimu”, ci ramenta chì rinfurzà i leghji proprii à a lotta contr’à u gran’banditisimu minaccia u drittu cumunu. Daretu à a lotta anti-maffia, ci voli à prutegà u Statu di drittu.

Siconda parti – Intarvista incù Baptist Agostini-Croce

Malgradu l’arnesi ghjudiziari francesi prisenti, i cullittivi provani da rinfurzali incù i leghji anti-maffia, parchì?

Pensu chì l’associ è cullittivi circani sopratuttu a missa in baddu d’una azzioni legislativa à prò di sta lotta pricisa: u sbaragliu maffiosu, è ci vularia da prisintalu cusì, cum’è in Italia. Stu testu saria tandu un attaccamentu di a parolla « maffia » à l’incriminazioni o proceduri propii.

S’è a possu senta st’idea, ùn pò essa chì simbolica, chì l’aghju spiicatu in u testu, i reguli taliani esistini ‘ghjà in lu drittu francesu è una leghji dedicata à a maffia ùn mintuarà nissuna evuluzioni, farà solamentu testi duppiati forsa.

Chì sò i cunsequenzi d’una ripressioni più forta di pettu à i libartà parsunnali?

L’aghjenti rispondini sempri à l’attualità da una ripressioni più forta. T’hà sempri esistatu. S’apri a discussioni nant’à u bisognu d’una leghji nova à ogni accaduta impurtanta. Ma quandu ci dumanda azzioni forti par luttà contru à u mali prisentu, ci voli à pinsà i cunsequenzi dinò.

Par a criminalità organizata, esisti una procedura sana fendu eccezzioni à u drittu cumunu di pettu à a perquisizioni, a custodia, l’inchiesti o i ghjuridizioni spiziali, ect… Par sta razza di malfatti t’hanni certi dritti sta prucedura ch’ùn sariani micca parmissi in d’altri situazioni. Eppuru vidimu quantunqua a prugressioni da u drittu d’eccezzioni versu à u drittu cumunu. A leghji vutata u 23 di marzu di u 2019 parmetti una derogazioni di i proceduri par “ogni crimu”!

Chì sà l’avvena, s’iddu ci rinforza sempri sti regimi, à l’iniziu sarani riservati à calchì fatti pricisi, ma forsa adattati à l’arnesi di u drittu cumunu dopu.

U to testu prisenta un paragonu trà a leghji taliana è francesa di pettu à i sumiddi, ma cosa hè a vera sfarenza trà i dui paesi, parchì hè suventi mintuata l’azzioni ghjuridica taliana da i cullittivi anti-maffia?

L’Italia t’hà un veru regimu solu dedicatu à a lotta contru à a Maffia. Raprisenta una legislazioni sana missa in baddu in l’anni 90, pruvendu da piantà l’azzioni criminali purtati versu à i magistrati certi volti. Par asempiu, un arnesu talianu impurtantissimu hè senza dubbitu a perpetuità incompressibili. Hè statu impiegatu in Francia par dui culpiti d’assassinu gravissimu. Ma l’asempiu hè scarsu chì a Corti Auropeana di i dritti di l’omi hà mintuatu l’annu passatu ch’un imprighjunamentu cusì era indegnu è avviliscendu. Ci voli tandu à scartassi di sta direzzioni, è stà in u Statu di drittu.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.