Sta piccula seria di quattru episodi, criazioni urighjinali prudutta da Netflix hà fattu assai ribombu dapoi ch’hè ghjunta u 26 di marzu nantu à la piattaforma di filmetti. Inspirata da una storia vera, conta la rivolta d’una ghjovana femina ghjudea contru à la so cumunità rilighjosa in New York.
“Esty”, intarpritata da Shira Haas hè l’attrici prumittenta di u sinemà israelianu ughincu, ghjoca una zitedda d’appena diciottu anni ch’apparteni à lu gruppu chassidicu Satmar di Williamsburg, una cumunità ghjudea campendu in Brooklyn è chì t’hà una pratica di a rilighjona assai rigorista. Alivata da la so minanna, in l’alloghju empiu di l’animi di l’anticoni tumbati in li campi d’Auschwitz mentri la Shoah, lascia a scola à 17 anni par spusà Yakov, (Amit Rahav), da tutti chjamatu Yanky. I ghjuvanotti ùn si cunnoscini mancu, u matrimoniu hè celebratu in la tradizioni pura, ed i famiddi ‘lli spusati aspittani a nascita di li primi zitedda. Esty ùn accitta più la vita chì li hè stata prumissa da la cumunità; stà in casa è fà criaturi. Tandu scegli di fughja dopu à la festa di Pessah (pasqua) è si ni và in Germarnia par principià una vita nova, alluntanata di i reguli rilighjosi. Eccu la storia di Unorthodox, racontu criatu da Anna Winger è Alexa Karolinski, hè l’adattazioni di l’autobiografia di Deborah Feldman chjamata “ Ex ortodossa. U rifiutu vargugnosu ‘lli me radici chassidichi.”
Si conta l’attu di libarazioni è di ribellioni versu quistu gruppu d’ebrei ultraortodossi, chì veda l’Olocaustu com’è una punizioni divina, è ch’hani fattu a scelta d’aduprà una vita rigida par ch’ùn si riproduci micca la Shoah. I donni vivini in un statu d’inferiorità custenta, ùn poni mancu leghja o cantà, chì la voci feminili, cunsidarata immudesta pudaria seducia l’omini. A lingua inglesa hè pruibita à l’internu di a cumunità ch’impiega solamentu lu Yiddish, mischiu di tedescu è d’ebrei. U matrimoniu hè urganizzatu, la sessualità hè un sughjettu nigatu, eccu i leghji amparati da Esty è l’altri membri di a cumunità mentri la so ghjuventù. Eppuru, pari sfarenta di l’altri femini, appassiunata di musica, suna di u piano, piattata ind’è una prufissora chì l’aiutarà da lascià Williamsburg par Berlinu, com’è l’hà fattu la so mamma calchì annu nanzu.
S’inizia in Berlinu la scuparta d’un mondu scunnisciutu, a sucità laica induva i reguli di Diu, è di Williamsburg ùn esistini. Scuntrendu una squadra di ghjovani musicanti, Esther t’hà da capì chì un’altra via di lettura di a Torah, fora di i chassidichi hè pussibuli. Unorthodoxe prova da mustrà a strazziata suciali è sopratuttu murali di st’aghjenti circhendu da lascià la so cumunità, luttendu contru à la prissioni di a famidda è di u rabbinu chì manda Yanky è lu so cuginu Moishe par cacciala in la cità tedesca, un Berlinu chì porta sempri u ricordu di l’animi smariti in la Shoah.
