I PALMI

LAVIGHJU : Oghje, si compie a quaresima. Intantu s’apre a ghjanna di a sittimana santa, incù a festa di i Palmi. Spartenu a parolla i Vangeli, quella di Cristu. Ribomba dinò quella di a ghjente : « ch’ellu sighi binadettu quellu chì ghjunghje, u Rè, in nome di u Signore ! » Ciò ch’ellu ci entre u Messia, mandatu da Diu ind’a cità ! U salvadore : « Hosanna ! »

EIU : È issa ghjente, quale hè ?

LAVIGHJU : A stessa chì, da quì à pocu, l’hà da cundannà. U lodanu, oghje. Si caccianu i mantelli, ch’ellu ùn marchjissi in tarra, « lu Rè ».

EIU : A strada hè dighjà fatta ?

LAVIGHJU : Ciò ch’ellu simbulizeghja u sole, a rama di palmu, quellu di a vittoria. Cristu hà dighjà vintu.

EIU : Strada murtale quantunqua…

LAVIGHJU : Strada di vita, strada di verità.

EIU : A strada di l’omi. Ghjustappuntu, eccu Santa chì ghjunghje !

SANTA : « Da zitella i palmi trecciu, pesci è cruciette, samirelli è campanilli, da ramintà, di Cristu, l’intrata in Ghjerusaleme. »

EIU : Vendi à u Tempiu ?

LAVIGHJU : Face un pezzu ch’ella hè compia a caccia ! Trà l’omi è Diu, calchì intaressu ci hè daveru !

EIU : I Scritti ?

SANTA : A tradizione ! A dumenica ci vole à binadì ! È l’acqua face prò, di più cà l’oru !

EIU : Comu viaghja l’affare ?

SANTA : Palmi in manu, pesci, pisati versu un mare di luce.

LAVIGHJU : Attenti à i pesci, ch’elli ùn s’anneghini !

EIU : Suffocanu, i corci. Importanu e palme o Lavì !

LAVIGHJU : A socu chì, i cristiani, si tenenu cari.

PETRU : Da quì à pocu, saranu cari da tene.

LAVIGHJU : È tandu u ventu si pisarà è calchì spiritu viaghjarà, ùn basta l’entusiasmu, ci vole a vulintà ; u curaghju d’ùn cumbatte. Viaghjanu i vincitori versu a vita, quand’ellu ùn batte più lu core, ferma l’amore di lu Signore.

EIU : A fede, a si tenenu, chì l’antenati sò di petra, è di Diu lu sangue hè betu.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.