Qual’hè issu Diu chè vo pregate? – Francescu (cuntribuzioni)

Qual’hè issu Diu chè vo pregate?

Qual’hè issu Diu chè vo pregate
Di punt’à e stantare zuccate
Pichjinate di lichenu grisgiu
Un palatinu altu è tisgiu
Fissa a ligna di l’orizonte
Prontu à trafulicà lu monte

U granitu raspiosu è frustu
Aspetta dirittu à lu so postu
O chjinatu in l’erba umule
Chì li face un lettu simile
A l’esilii di li fidanzati
In l’erbetta croscia di li prati

Qual’è issu Diu chè vo pregate
Fulettu chì cuttighja e fate
E chì ghjace indè un carpinu
Una surgente o un guaglinu
Sfilà trà e vite di a raza
E vi fideghja a boccarisa

Si pazienta à l’ora nutturna
Quandu a scorza chì era bruna
Diventa nera o azurata
Di una spelonca incantata
Un chamanu fumicante è stranu
Vi palesa un sensu arcanu

Qual’è issu Diu chè vo pregate
Da tante litanie amparate
In l’abissu di e catacombe
Ridendu à lu sonu di trombe
L’arena ribomba di a morte
Nimu ùn pò trattene a so sorte

Capighjimbi o versu u celu
Ognunu aspetta mischinellu
Mane ghjunte o staccate
Ognunu ampara e strufate
Casa di Christu o Maumetu
Ognunu sceglie u so prufetu

Qual’è issu Diu chè vo pregate,
Compiu u sbarludime di l’estate
Quandu si tace a musichella
In una camera urfanella
U ventu, l’acqua ma ùn ci hè nimu
Sentesi ancu illeghjittimu

Tante dumande senza risposte
I dinochji fiacchi mani poste
Aprite lu vostru core stancu
Avete tuttu ma ci hè l’ammancu
Site solu allora cosa fà?
Pregà u vostru Diu cun pietà.

Francescu

Lasciate un cummentu ?

This site uses Akismet to reduce spam. Learn how your comment data is processed.