Incendiu di u Museu di Rio : colpa à una nigligenza maiò

Arimani, luni u 3 di Sittembri, u Museu Naziunali di Rio di Janeiro hè partutu in cenari. Cunsumatu da i fiammi duranti guasgi sei ori, u museu, guasgi cruddatu, ùn era più chì polvara. Sò più di 200 anni di storia chì sò stati distruti, una vera tragedia pà u Bresiliu ma dinù pà a cultura è a scienza…

Dopu à essa andatu annantu à u situ, u ministru di a cultura, Sergio Sa Leitao, hà annunciatu u blucamentu subbitu di 10 milllioni di reai (à pocu pressu 2 millioni d’euri), chjamendu in listessu tempu à l’aiutu internaziunali. Luni sera, u Purtugalu prupunia a so cullaburazioni pà a ricustruzzioni di stu ghjuveddu di u patrimoniu lusofonu è u capimachja francesu, Macron, rigalaia i so esperti à u serviziu di u populu brasilianu.

Istituzioni academica a più vechja di u Bresiliu, rifarenza maiò in America Latina, u museu di Riò, criatu in u 1818 da l’imperatori Dom Jao VI, si truvaia dunqua dapoi u 1892 in u palazziu di Sao Cristovao, risidenza di a famidda imperiali purtugesi, ind’a zona norda di Rio. Ghjè inde stu manificu bastimentu chì fù firmata l’indipindenza in u 1822, chì a principessa Isabela nascì in u 1846, quì dinù chì funi ricivuti, dopu à l’apertura di u museu à un publicu in u 1900, Albert Einstein, Maria Curie è Alberto Santos-Dumont, piunnieri di l’avazioni brasiliena. Un munimentu storicu dunqua da ciò ch’eddu cuntinia, raprisintia è da tutti i parsonni chì ne aviani calcatu a tarra.

U museu cunsirvia pezzi di culizioni d’una valori micca stimabili. Frà eddi, u scarpaddanu di Luzia, l’homo sapins u più vechju d’America Latina, datatu di più d’11 000 anni !! Ma dinù mumii egizziani, o sepulcri di dinusorii… Sicondu à i primi stimazioni, ùn sarani chì 10 % di tutti sti ghjuveddi à essa stati prisirvati da i fiammi. « Oghji hè un ghjornu tragicu. Dui centi anni di travaddu, di ricerca, di cunniscenzi sò stati persi » hà detu u prisidenti d’u paesi, Michel Temer. Una « tragedia invummensurevuli » sicondu à u ministru di a cultura Sergio Sa Leitao.

L’incendiu, chì grazia à Diu ùn hà fattu mancuna vittima, hè principiatu versu à sett’ori è mezu di sera, dumenia sera. I porti di u museu erani chjosi è soli qualchì guardu era annantu à i loca. L’urigina di stu drama firma scunnisciuta. Ma sicondu à M. Sa Leitao, una mungolfiera o un circuitu sariani a causa di st’incendiu. U focu saria partutu da l’inzù du u museu, è saria falatu pocu à pocu, brusgiendu tuttu annantu à u so passaghju….

U museu ùn avia nè dettetori di focu, nè porti tadda-focu nè menu spinghjidori. Ghjunta annantu à i lochi duranti à a notti, a vici-direttriza di u stabilimentu, Cristiana Serejo, saria casactu in tarra di pettu à troppu eluzioni in faccia à un disastru tamantu. Intarrugata da i medii lucali, avaria dettu chì era privista un’operazioni da attualizà u sistema di pruttezzioni di pettu à l’incendii da quì à pocu. I PPCI, piani di prutezioni è di privinzioni di l’incendii, sò ubligatorii inde munumenti publichi tali quissu… Ma colpa à una manquanza di rizzorzi, a so uttimisazioni laca à veda…

« Stu drama ùn hè micca u fruttu di l’asardu ! ». Diventutu l’illustrazioni d’un paesi arruvinatu, disprezziendu a so cultura è u so apssatu, u museu di Rio era dapoi parechji anni lacatu à l’abandonu. L’impiegati racontani chì i piafoni era trosci, certi fili eletrichi ùn erani micca prutteti… Di maghju, à un mesi di u bicintinariu di u museu, u direttori di u stabilimentu, Alexander Kellner, ùn pudia apra chì deci Sali di spusizioni ananntu à trenta, di pettu à l’intratenu gattivu di u bastimentu.

« I guverni cambiani ma ùn ci hè nudda chì mova. A cultura hè sempri u duminiu u più povaru di u statu è semu spittatori à stu nuffraghju senza agiscia. Cum’è sè a mimoria ùn avia impurtanza quì ». A mimoria, ghjust’appuntu, ghjuveddu u più preziosu chì no t’avemu, surghjenti sola è pura di a vita, senza a quali nudda ùn asistaria, è chì ci voli à prisirvà da scumpientu tali quissu à l’avvena, da fà chì campessimi sempri frà i nostri mimorii….

Lasciate un cummentu ?

This site uses Akismet to reduce spam. Learn how your comment data is processed.