Oh coco, babin ? T’y a vu mon T-shirt toc de mac ?


O zitelli, fatela un pocu finita incù isse magliette umuristiche. S’è a cultura è a lingua Corsa ùn sò sacre, ùn sò micca solu una macagna.

A moda

Dipoi uni pochi d’anni, si vede fiurisce magliette chì si ghjocanu di a cultura è di a storia corsa è, ci vole à dilla franca, certe sò assai ben fatte. Pudemu parlà di quelle di Empires in Aiacciu chì hà ruckizatu a figura di Napulione, di quelle di The Minority in Purtivechju chì hà fattu cullezzione di più « Jet-set », incù una buttega in la Via Notte o Baretta Corsa chì mudernizeghja strabè e barette di i nostri babbò fabrichendule in Corsica !

Di sicura, ùn mi piacenu tutti i so mudelli. Ma ùn m’offendenu mai ! A cultura cirnese hè presa com’è una basa è dopu si face un sviamentu di qualcosa chì ci tocca, chì face parte di a nostra identità. Quì, i panni sò una piccula manera d’ùn scurdassi di a filetta è dinù di mustrà e so radiche.

U prublema oghje, ghjè chì, ci vole à fà magliette maccagnose addossu à l’identità nostra.

Chì fiertà ci hè à dì « Toc de mac » o « Babin » ? Sò sprissione familiare è ridicule di un corsu francisatu è urale. Ben intesu chì tuttu u mondu a dice è a sente. Ma piantemu à pena d’esse fieri di issu parlatu carrughjincu chì participeghja à l’appuverimentu di a nostra lingua è, ghjè què, forse u prublema. I criatori di isse marche « gag » u parlaranu u corsu ? Avaranu una cunniscenza di a nostra cultura ?

Una certa marca hà surtitu un t-shirt pè e donne induv’ellu hè scrittu « Feministu ». Isiè. A donna hè tantu feminista ch’ella hà cambiatu di generu.

Ramintaremu a regula :

Finali in U = Maschile

Finali in A = Feminile

Eiu, bon’ clientu è prontu à pruvà à capisce, li aghju dumandatu s’ellu era una vulintà propia di scrive lu cusì ? In risposta anu toltu u me cummentu…

Figliola di banditu, Figliolu di pastore.

Ci era una marca, prestu sparita chì hà surtitu magliette incù scrittu in corpu « Figliola di banditu » o « Figliolu di pastore ». Postu chì, a sapemu tutti, ogni corsu era banditu o pastore s’elli ùn eranu micca i dui ! Eiu sò corsu (infine a credu…) è i me babbone è missià eranu, unu espertu cuntabile è l’altru direttore di scola.

È s’e v’invitu à fà un giru in la me genealugia…, cullate puru, pastori è banditi ùn ci n’hè manc’unu. Cridite mi puru, ùn aghju nulla contru à i banditi nemmenu contru à i pastori. Tuttu què, intrattene una visione tronca, falza è piriculosa di a nostra storia è participeghja à impone ciò ch’ellu vuleria dì esse corsu è quale hè più corsu cà l’altru.

Pigliate un pannu di travagliu, ricamate una parolla Corsa è vinditelu 155€

Nantu à l’altra strada di u « mauvais goût » ùn si pò finisce senza parlà di i rè di l’arrubecciu… Ùn m’aghju da attardà di più annantu à e so magliette, chì ci n’hè chì sò ughjettivamente micca male è i gusti è i culori ùn si cuntrastanu micca.

Ma ci hè qualcosa ch’ellu ùn si pò lascià passà. U Bleu de Chine hè una razza di camisgia in materia assai risistente aduprata da agricultori è pescadori chinesi. Quandu i corsi sò partuti in le culunie, issu pannu assai praticu hè piaciutu à i corsi postu chì u populu cirnese avia ancu ellu assai agricultori è pescadori !

Tandu, sò vultati incù pacchetti di Bleus de Chine in Corsica, in Marseglia ecc. E marche e più cunnisciute sò l’Anticher è Saigon è costa à pocu pressu 40 euri s’omu vole cumprà a camisgia è u pantalone.

È po sò ghjunti quelli chì anu cuminciatu à racamà u nome di a so marca in pettu à un Bleu de Chine nurmale è chì u vendenu… 155€ !

O zitè ! Incù 155 euri pudeti fà un bon pranzu in un bellu risturante, vi pudeti cumprà belli scarpi in coghju, o un bellu cascu da ascultà a vostra musica prifirita. 155 euri ghjè dinù un mese di travagliu in Shanghai. Ma innò, vi avete da cumprà un pannu di campagnolu di una marca hipster parchì vuleti intrattene u mitu di u Corsu chì unipochi anu participatu à favvi ingolle.

Ci n’hè cose da dì… Ci sò marche chì ùn valenu mancu a pena di scrive annantu à elle. Facenu u dissegnu d’un sumere è scrivenu « Doumé » è si piglianu pà i novi Eleven Paris, basta basta. È po, ci sò i Bleu de Chine vinduti à l’Atrium, da travestiscesi in veru campagnolu da manghjà à u BurgerKing… Cun tuttu què, ùn hè dumane chì Corti divintarà una capitale di a moda…

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.