St’articulu faci parte d’un memoriu di storia sustinutu di ghjunghju 2021 da Vincent Sarbach-Pulicani à l’Università di Strasburgu.
A nuzione di “religione pulitica” s’appughji nant’à un longu dibattitu purtendu nant’à a crisa di a mudernità accaduta à u principiu di u XX esimu seculu. Stu dibattitu segue duie tendenze, a prima fundata annant’à l’idea chì l’urganisazione pulitica uccidentale hè a lascita di u principiu escatologicu di a “Trinità di Gioacchinu da Fiore” chì campava mentre u XIIesimu seculu, à a quale u regimu fascista di Mussolini pò esse ligatu. Cusì, Diu rapprisenta a creazione, u Figliolu rapprisenta u puntu di svolta ed u Spìritu Santu a fine, ciò chì hè dopu l’Umanità.
U storicu Didier Musiedlak hà scrittu un articulu in u 2010 nant’à u fascismu ed u cuncettu di religione pulitica. Dentru, Musiedlak face u liamu incù i tendenzi pulitichi di l’iniziu di u seculu : “A truvemi trasposta in u Comtismu, o in u Cumunismu, cù u Cumunismu primitivu, a sucetà di classi ed u Cumunismu finali. Pudemu allargà sta riflessione pè u fascismu cù l’epica di u cummattimentu, a presa di u putere è l’era nova aduprata.” [1]
A seconda tendenza hè incarnata da Max Weber in i tempi d’Interguerra. Sta teuria hè fundata, à l’inversu d’una lascita medievale, nant’à u fattu chì solu u capu di a nazione hè capaci di prutezzione di a corruzzione di u mondu. In altre parolle : “Pè Max Weber, solu quellu t’avendu u putere carismaticu, u stregone, u prufeta o u puliticu, hè capaci à uperà una redenzione è cusì riduce l’abissu apertu da a secularizazione in un mondu sughjettu à i bè materiali.” [2]
I storichi di u fascismu anu utilizatu assai sta retorica pè dà una definizione tardiva di a “religione pulitica”. Eppuru, ghjè sempre cuntrastatu in a storiografia, ch’ùn pare micca currisponde solu à u fascismu di Mussolini ed apparisce mena legitima quandu si tratta di u Terzu Reich. Dunque, ghjè impurtantissimu di trattà stu terminu è ancu quelli chì seguitanu cum’è “religione di a pulitica”, cù prudenza infinita.
Allora, in u cuntestu studiatu di i regiunalismi corsi, pudaria esse impiegata l’idea di “religione pulitica” ? Pare poca realista, nonostenti a larga influenza di u fascismu annantu à sta cultura pulitica corsa. In l’Inter Guerra, ci vole à rimetta sta nuzione à a scala insulana.
A Corsica s’avvicinava più d’una duttrina pulitica ch’è d’una vera ideulugia ch’ùn hè mai stata seguitata à a scala guvernamentale. À l’inversu di u fascismu talianu chì hà vistu in Mussolini u Figliolu secondu a Trinità, quellu ch’avia da purtà u cambiamentu in a Terra, una figura cusì divinizzata ùn esiste micca trà i Muvristi chì preferiscenu vede in Pasquale Paoli u Babbu o u Santu Fundatore di a patria corsa. Nundimenu, rimarchemu in a manera di presentà e cose una sacralità di a pulitica è di a lotta. Truvemu dinù sta spressione incù Emilio Gentile in u so libru Fascismo. Storia e interpretazione, traduttu è cummentatu in francese da Pierre-Emmanuel Dauzat:
“Tramezu e caratteristiche originali ed essenziali di u totalitarismu, chì si scontra da l’urighjini di u fascismu talianu, ci hè a religione pulitica : u capitulu 9 hè precisamente dedicatu à l’analisi di l’universu di miti, riti è simboli di a religione fascista, u fascismu talianu essendu analizatu quì cum’è una di e manifestazioni principali di u fenomenu mudernu di a sacralizazione di a pulitica.” [3]
Cusì, com’è u fascismu talianu, a Corsica si ritrova cù simboli com’è e Virtù di a Corsica o i Dece Cumandamenti di u veru Corsu. Ma ci sò ancu i miti com’è a canonisazione fittizia di Paoli o e liggende in giru à a ghjustizia paolina ed a battaglia di Pontenovu. Pudemu truvà questi considerazioni in u libru scrittu in u 1926 da Geniu Grimaldi, dettu Saveriu Malaspina, chì si numineghja “A nostra Santa Fede”:
“IV – Onorerai u gran Pasquale, ellu si ch’era un santu !
V – Penserai sempre a i martiri di Pontenovù. […]
VII – Alleverai i to figliòli n’u rispettu di Diu e l’amore d’a patria corsa.”
L’essenza di a razza corsa si prisenta com’è cristiana ed u solu modu pè ritruvà questu statu uriginale si face da una ceca fideltà in u cursismu. Elli sò infatti i soli à difenda ‘ssi valori tradiziunali. U muvimentu vole esse religiosu ramazzè à i “cumandamenti” e “virtù” chì lu cumponenu. L’essenza di l’autonomismu hè a listessa chì quella di u populu corsu, si tratta quindi di u solu modu pè priservala. Cum’è un ecu di i dibattiti chì circundanu à a nascita di u cuncettu di “religione pulitica”, i Muvristi si vedenu garanti di a sucetà corsa, affruntendu u periculu di u mondu ed a sucetà di cunsumazione. ‘Ssa visione di u mondu s’incarna perfettamente à i cuncetti chì circundanu “l’insularismu”, u rifiutu di l’esteriore chì hè percettu cum’è una minaccia pè e tradizioni puliticu-culturali di l’isula.
Facendu una lettura simplista di l’articuli di a Muvra è di Corsica antica è muderna, si capisce chì l’assi di a prupaganda attornu à u tema di a religione sò più o menu simili. Nundimenu, ci vole à fà un passu in daretu è stende d’una banda nant’à u cuntestu religiosu di l’epuca è da l’altra banda nant’à l’utilità d’un tema cusì in a prupaganna irredentista o autonomista.
L’argumintazioni chì s’avvicinanu tandu si devia assai prestu versu una sfarenza ideologica maiò trà i diversi muvimenti chì ci interessanu. A religione cattolica diventò un vettore impurtante di l’italianità pè l’autori taliani, chì i muvristi ùn ricusanu micca in tuttu. Nundimenu, pè l’autonomisti, si tratta più di vultà à i tradizioni schietti di u populu corsu, u
cristianismu rumanu ed apostolicu si prisenta com’è una caratteristica fundamentale di l’identità di a razza corsa. Ùn si tratta micca solu d’indittà una correlazione trà a pratica di a Fede in Corsica cù quella d’Italia. A religione cattolica diventa tandu l’ultima forma di spressione di l’impegnu patriotticu, induve u discorsu puliticu si mischia facilmente cù u discorsu religiosu. St’elementu hè essenziale pè capisce a sfarenza maiò trà l’ideulugie muvriste ed irredentiste.
[1]MUSIEDLAK Didier, « Fascisme, religion politique et religion de la politique. Généalogie d’un concept et de ses limites. », Vingtième siècle. Revue d’histoire, Presses de Sciences Po, n°108, 2010/4, p. 72.
[2] Ibid, p. 72 è 73.
[3]GENTILE Emilio (trad. DAUZAT Pierre-Emmanuel), Qu’est-ce que le fascisme ? Histoire et interprétation, Paris, Gallimard, 2004 (coll. « Folio Histoire, 128 »), p. 16.