Eccu l’andatura di ricerca mandata da Federico Maiozzi, ghjovanu talianu di sterpa gadduresa circhendu da vena in Corsica par travaddà annantu à i parti di l’identità taliana firmendu in l’isula.
Andeti puru à scopra u so lavoru è i cundizioni di u so viaghju:
A Cultura taliana in Corsica, fola o verità ?
Nanzu a prisintazioni di stu prughjettu, mi parmettu calchì parolla par ringrazià i scrittori di a Rivista Tempi è i so lettori pà l’attinzioni è a curtesia. Spergu chì truvareti intarissanti i riflissioni mei, è vi mandu un invitu à discorra annantu à i me paghjini di reti suciali, s’è dumandi n’aveti à l’uccasioni.
In questi tempi in Italia ci hè un prublema di cunfusioni, par dilla cusì. A storia ùn hè truncata di a memoria, è ancu u cuncettu stessu di storia traduci un sensu metafisicu, utilizzatu à spissu com’è ughjettu ideulogicu da questa o quidda parti pulitica. Tant’aghjenti volini esaltà l’identità taliana, ancu parsunaghji di primura dichjarendu par asempiu “ Bisognu à piddà l’asempiu di a storia pà capiscia a grandezza di NOI taliani”. À u cuntrariu, ci sò parsoni lasciendusi andà à l’auto-razzismu dicendu tali un leitmotiv chì: “A storia insegna chì NOI taliani semi l’autori di crimini orribili !”.
Si vedi bè chì sti dui infrasati ùn sò falsi, eppuru ghjè peghju: sò tanti superficiali ch’iddi parini essa di malafedi.
Stu mischju di cunfusioni è sbagli hà purtatu è stà purtendu l’arrori ancu in a visioni taliana di i so cunfini naziunali propii è i so cunfini marini, ch’ùn sò l’eccezzioni par dilla cusì. Calchì talianu – sò pochi ma micca cusì pochi – affirmani chì a Corsica hè un’isula taliana, puntu è basta, sunniendu u Ritornu (sì, esattu, micca l’annessioni ma u ritornu) à l’Italia. Di u restu, si dici: “Napoleone hè natu citadinu ghjenuvesi, tandu hè talianu !”
D’altri, à l’inversu par a maiò parti, portani un disintaressu à l’isula, à u massimu si pò senta infrasati cusì: “Ah sì, a Corsica… st’isula un pocu com’è a Sardegna ma più salvatica”.
Tandu nasci l’idea meia. Sò sturianu di furmazioni, t’aghju avutu calchì incursioni in a giugrafia, in u giurnalismu, mentri a me carriera, è hè cusi ch’aghju sceltu di pruvà à urganizzà un picculu riportu nant’à a Corsica. Micca par capiscia s’è a Corsica hè taliana, francesi o britannica, ma par ascultà a voci di calchì corsu è dumandà ciò chì ni pensani di l’eredità culturali “taliana” di l’isula, s’idda campa da veru, è com’idda viaghja ?
Sò crisciutu in Gaddura, da madra e nonni gadduresi, è di a Corsica n’aghju intesu “u dialettu”, di a me nonna, parlatu da parsoni chì parò campaiani sott’à una bandera sfarenta di a meia; nant’à i cassetti di a posta, aghju lettu casati ch’avariu pussutu truvà in Roma, ma era chjara ch’erani d’un altru statu. A sumiddanza chjara ma fughjendu, ch’ùn aghju mai capitu i cuntorni. Eccu ch’aghju dicisu di finanzià un riportu: un’andatura sciintifica pà studià com’è i corsi si vedini, è capiscia induva si trovani i sfarenzi è i sumiddanzi.
A Corsica hè stata a me sponda privata. A me mamma, da ziteddu mi dicia “ in i beddi ghjorna si vedi a Corsica da u mari.” È si vidia calchì volta, azzurina, alluntanata assai. Ghjè parchi, masciu, aghju dicisu d’utilizzà i me cumpetenzi di sciintificu suciali pà capiscia calcosa di più.
I risultati di u me riportu sarani resi di maneri sfarenti: scritti, ritratti è video annantu à i me pagini Instagram è Linkedin; à quiddi ch’hani datu pà l’andatura com’è à l’altri, spirendu chì sarà impiigatu in a capiscitura di stu sughjettu culturali.
Aghju dicisu di piazzà a rializzazzioni di u me prughjettu à u raghjunamentu d’una finanzia minima, utilizzendu a piattaforma Kickstarter parchì sarà un viaghju di ricerca par mè, è micca un ghjocu. Caminà, ascultà, scriva, filmà, sceglia, pinsà.
Com’è l’aghju ditta, s’iddu hè un successu stu travaddu, sarà apartu à tutti, ma quiddi ch’hani datu sarani ringraziati publicamenti o sicondu i so vulintà.
Compiu com’è aghju principiatu: grazia pà l’attinzioni è a pacienza.