Sughjettu di longu dibattitu di custituziunalità è di rispettu di u dirittu europeu in Corsica, u Canadà hà vutatu in maghju di u 2022 un muratoriu di duie anni annant’à a l’acquistu residenziale da furesteri in Canadà.
Iscritu in quella legge, a pruibizione di l’acquistu residenziale in Canadà sin’à a fine di l’annu 2025 à tutte e persone ch’ùn sò nè citadini canadesi, nè residente permanente (in modu generale, questu statutu hè un’anticamera di a citadinanza canadese), nè persunale diplomaticu, è nè rifugiati di guerra. A legge hè intrata in vigore u 1imu ghjennaghju di u 2023 dopu a qualchì mudificazioni (cf. sufra). Per pruibisce a pussibilità per i stranieri d’acquistà case fendu usu di un citadinu canadese cum’è prête-nom, a legge ùn permette à una persona di fà usu di più di 3% di soldi d’urigine straneria per acquistà un alloghju.
Quella legge s’iscrivia in un cuntestu di saltu di i prezzi di l’alloghju dopu à a pandemia di covid19 chì, di modu radicale, hè cambiatu e manere di travaglià in u paese : sicondu à Statistique Canada, l’istitutu di statistiche di u paese, quasgi in quartu di i travagliatori si sò messi a travaglià da casa soia di manera permanente contru à 4% in u 2016. Tandu, parechji travagliatori urbani anu fughjiti e cità è anu cumpratu parechje case in campagna, induve i prezzi eranu strutturalmente menu alti. A u listessu tempu, a crisi ecunomica pruvucata da u covid19 hà furzatu a banca centrale di u paese, a Banca di u Canadà, d’abbassà di modu ecceziunale i tassi d’interessi per sustene l’attività ecunomica (0,25% in aprile di u 2020 contru à 1,25% prima di a pandemia). Quelli tassi d’interessi bassi anu favurizati una busbica di speculazione annant’à l’alloghju in u paese, fendu cresce i prezzi di 60% trà a fine di u 2020 è u principiu di a guerra in Ucraina in marzu di u 2022.
Graf: Evoluzione di u prezzu di l’alloghju mediu in Canada trà u 2005 è u 2023 (Fonte : CREA Canadà, 2023)
Cusì, parechji Canadesi sò stati messi fora di u mercatu di l’alloghju, fendunesi un prublema puliticu. ‘Ssu prublema hè ancu di più impurtante chì u paese vole fà vene migliaie di migranti di più per populà u sicondu più grande paese in superficia di u mondu ; senza case dispunibili per accoglie a ghjente, serà più cumplicata l’affare. Sicondu à l’associu per l’alloghju canadese (CREA), mancarebbe in u 2022 più di 500 000 case in u paese fendunesi un prublema maiò per a ghjuventù canadese è i novi migranti in ricerca d’alloghju.
Per quessu, u Primu Ministru Justin Trudeau (centrusinistra), ch’era à quellu mumentu in campagna eletturale, avia prupostu per l’elezioni generale anticipate di u 2021 a pruibizione di l’acquistu residenziale da i stranieri per megliurà l’accessibilità a l’alloghju per i Canadesi.
Rielettu cun una maghjurità relativa, u Justin Trudeau hà prisentatu a so pruposta di “priubizione di l’Acquistu di Prupietà Residenziale da i Non-Canadiani” in u so bilanciu federale 2022-2023 in aprile di u 2022 (finalmente vutatu in maghju di u 2022) quandu i prezzi di l’affitti eranu vicinu à u so piccu è chè i cumpratori anu ancu pussutu qualificà per una grande ipoteca. U guvernu federale dicia chì a pruibizione aiutaria à stabilizà l’abitazione è aiuta à assicurà chì i Canedesi ebbini più accessu à cumprà case. I furesteri erani accusati di fà cresce i prezzi di l’immubiliare, fendu investimenti speculativi senza campà nè participà à a vita di e cummunità induve sò situate quelle case. U federale ùn hè statu u prima à piglià decisione di pettu à questu fenomenu : dopu à u boom immubiliare in Vancouver (Colombia Britannica) è Torontò (Ontariò) in u 2016 è u 2017, i guverni pruvinciali avianu anch’elli rispostu imponendu un impositu à i cumpratori stranieri immubiliarii. In Colombia Britannica l’impositu hè intratu in vigore in u 2016 è l’impositu di vendita di non-residenti di l’Ontariò hè intratu in vigore in 2017.
Intantu, i dati di a Banca di u Canadà anu mostranu chì l’investituri domestichi (spessu speculativi) – chì ùn anu affruntatu restrizioni di u guvernu – sò diventati a forza maiò in u mercatu, cuntendu un quintu di l’acquisti di casa à a metà di u 2021. Vale à dì chì i Canadesi sò rispunsevule di a speculazione di l’immubiliare. Per l’esperti di u settore di l’immobiliare, l’acquistu stranieru era un prublema più grande in u 2016 è u 2017, ma questa ultima busbica in l’immubiliare hè stata alimentata maghjuritamente da i cumpratori domestichi.
Oramai, e cose sò cambiate, incù a dinamica inflazionistica di a fine di u 2021 è di u 2022 (inflazione à 6,8% in u 2022 in Canadà), a Banca di u Canadà hà alzatu i tassi d’interessi cum’è mai vistu sin’à u 1980. Frà marzu di u 2022 è ghjennaghju di u 2023, sò passati da 0,25% à 4,5%. Cusì, a maghjurità di i Canadesi ùn sò più qualificatu per un prestitu immubiliare datu i tassi d’interessi di e banche cummerciale chì sò à più di 5%. Estremamente spostu à i tassi d’interessi, u mercatu immubiliare s’hè sprufundatu : e vendite sò diminuite di quasgi 15% è più di a metà di a busbica immubiliare di a pandemia hè stata cancellata (cf. Graf infra.).
Parechji esperti si sò allora messi à a fine di l’annu 2022 à quistiunà u fundamentu di a legge pruibitoria. In furia, u guvernu canadese rivelò novi emendamenti annant’à a legge duie settimane prima di a so intrata in vigore : includenu un inseme d’eccizioni per i stranieri per acquistà immubiliare residenziale, cum’è residenze secundarie è abitazioni cù un massimu di quattru unità.
Dapoi a so intrata in vigore u 1u di ghjennaghju di u 2023, a regula “anti prête-nom” seria rispunsevule di parechje cancellazioni di prughjetti di custruzione ch’averia pussutu diminuì a crisi di l’alloghju à u nivellu naziunale. L’investitori stranieri, cum’è l’Americani, l’Europei è l’Asiani ùn anu pussutu investì annant’à certi prughjetti perchè sò stati culpiti da a nova legge.
In u so novu bilanciu federale 2023-2024, prisentatu u 28 marzu di u 2023, nove emendamenti sò stati presentati, ciò ch’hè statu vistu da una vittoria per quelli in contra à a legge : i travagliatori migranti senza u statutu di residente permanente (travagliatori temporarii) anu ottenutu a pussibilità di cumprà una casa s’è dimostranu una participazione di 4 anni à l’impositi canadesi, ùn sò già pruprietarii d’una casa, è anu un cuntratu di travagliu permanente. In tantu, a pruibizione ùn s’appiicà più à i terreni vacanti definiti per usu residenziale. Questu significheghja chì i non-Canadesi sò avà capaci d’acquistà sta terra è fane usu per qualsiasi scopu, cumpresu u sviluppu residenziale.
U muratoriu canadese ùn pare esse riesciutu in u so scopu di rende l’acquistu d’alloghju più facile per i Canadesi ch’hè veramentu a Banca centrale ch’hà fattu abbassà i prezzi incù a so pulitica munetaria restrittiva. Mudificati duie volte sottu à a pressione di u settore immubiliare, ùn hè più quellu previstu un annu fà, quandu i prezzi eranu alti è a pressione per cumprà forte. Tandu, ùn ci vole cunclude chì ùn si pò piglià misure per limità a pressione immubliare à un mumentu datu ma piuttostu capisce chì i dispusitivi di regulazione sò cumplessi è chì l’effetti perversi pussibili sò maiò. Necessita per u legislatore una flessibilità è un’addattabilità grande per esse prontu à piglià misure currettive in modu lestu quand’hè necessariu. Per quantu à a Corsica, l’analisi cumparativa è cuntinua di i dispositivi già in vigore in Canadà, ma dinù in l’altri paese europei è non-europei cum’è l’Australia è a Nova Zelanda per esempiu hè una necessità s’è vulemu amparà da l’altri, prupone e regulazioni megliore s’è un ghjornu l’isula ottene u dirittu d’aduttà un statutu di residente.