Calchi mottu da fà un compitu dopu dui ori di filmu sta duminicata in Parigi…
Una storia à huit-clos accadi ind’un caboulot di Papete, u Paradise è la missa in abissu di l’isula stragna è stragnera, afumicata è bagnata di lumi imbrugnati framezu à li muntagni neri. U riassuntu d’un locu mondu com’è nè criani soli i bughjiconi persi è alluntanati, induva i viti ughjinchi so mischiati à l’intraschi pulitichi ed à l’alti puteri.
Roller (ghjucatu da Benoît Magimel), sempri di biancu custumatu com’è paragonu d’u puteri culuniali hè l’altu cumissariu di a Repubblica, si pari una spezia di prifetta suppranu chi teni un rapportu in semitonu cu i paisani, stimatu da certi o odiatu da l’altri. Cunduci i so affari cu intelligenza framezu à l’intesi lucali è mezzi pochi legali.
Un ghjorni accadi è s’ingonfia u parlacciu parmessu a populazioni isulana, u Statu saria in traccia di rilancià i provi nucleari in l’acqui tarrituriali, com’è l’avia fattu 25 anni nanzu. D’una impurtanza geo-strategica pà a Francia, Tahiti l’hè pà d’altri putenzi stragneri dinno, lampendu i dubbiti nantu à i caghjoni di l’azzioni pupulari ch’iddu cunduci Mattei, giovanu capimaestru d’u muvimentu di cuntestazioni lucali.
Qui s’imbroglia u parè di u spittadori nantu à Roller, saria tantu vicinu di u puteru ch’iddu u lascia senta ? Inizia tandu una ricerca piattata, à l’umbria di l’aparechju statali pà scopra a verità.
Accantu à iddu, i parsunnaghji sicondi so qui par dà a so prufundizza à u filu di u racontu.
Forsa u piu famosu, ci hè l’amirali di a marina naziunali (ghjucatu da Marc Susini) t’avendu certi volti l’impeti paranoichi di u militariu avvintu da i so nemici iputetichi. Lascia u so bateddu ogni sera cu marinari pà goda i piacè di u Paradise, imbriacu è affananti quandu ciamballa di piu sottu i bichjeri di Rhum chi nantu à i marosuli di l’atoli.
Dopu ci hè Shanna, impiegata à l’albergu lucali, masciu-femina chi pidda a so impurtenza in l’intrasca affianchendu Roller in a so ricerca ammascata, una cumpagna o sicritaria di notti chi voli tastà appena u mondu di u puteri.
Albert Serra firma un ultimu filmu à l’affissu di u prussimu festivali di Canna, una volta di piu è cu l’usi pochi tradiziunali di a rialisazzioni sinematografica. Com’è l’altri, un scenario scrittu tali un rumanzu, è un filmu rializzatu cu 25 ghjorna di ripresi cintu da u so tritticu di camerà girendu sempri pà catturà l’attori ch’un recitani mai a cumedia. 540 ori di rushes da sceglia pà custrui una favula pulitica ind’un decoru legendariu, guasgi sunniatu.