Duranti a duminicata di i Santi 2022 hè statu locu u primu open di vaghjimi d’Aiacciu urganizatu da l’Echecs Club Ajaccien. Una sissantena di ghjucadori – corsi o d’altro – si sò adduniti in i lucali di a Casa di i Scacchi aiaccina. Tandu avemi pussutu scuntrà l’attori di u sviluppu di stu ghjocu diventatu inevinttevuli in Corsica. 

U successu di a Liga corsa di i scacchi 

In u 1998 fù criata da Leo Battesti a Liga Corsa di i Scacchi cù 250 primi aderenti. Oghji, dopu 25 anni d’esistenza, 7 000 parsoni sò licinziati, tra di quiddi una millaghja di ghjucadori di cumpitizioni. A Corsica t’hà dunca una di i più alti parcentuali di ghjucadori di scacchi in Auropa è monda parsoni venini pà scuntrassi è ghjucà à u mumentu di i giri. D’apress’à u prisidenti di a Liga, Akkha Vilaisarn, u ghjocu di strategia hè diventatu « un fattu di sucietà arradicatu in Corsica ».

Mà chì sò i chjavi di quissu successu tremendu ? 

Primu, a Liga Corsa t’hà a so propia filusufia. Sicondu à Akkha Vilaisarn, ci voli à dimucratizà u ghjocu di i scacchi è inizià i ghjovani u più prestu pussibuli pà crià una basa forta di ghjucadori. In a so andatura di dimucratisazioni, a Liga hè sustinuta da l’Educazioni Naziunali incù a quali hà signata una cunvenzioni, prulungata tutt’i trè anni dipoi quindici anni. Di sta manera, i munitori di a Liga poni passà in i scoli di Corsica pà insignà a disciplina à 50 000 scularii corsi, trasmetta a passioni di u ghjocu, alzà a leva nova in i circuli di scacchi è truvà i talenti di dumani. 

Fà intrà i scacchi in i scoli l’hà parmessu di tuccà un novu publicu è di fà piazza à una dimucratisazioni di u sportu unica in Francia. Grazia à a cupartura scacchinata impurtanta di a Corsica assicurata da l’undeci circuli di scacchi prisenti in l’isula, ogni corsu pò truvà altri ghjucadori è prugrissà in a so amparera di u ghjocu. 

Dopu, a Liga hà criatu a scola di l’eccelenza induva travadda una dicina di i più forti ghjucatori di Corsica pà appruntassi à i cumpetizioni intarnaziunali. A Liga hà furmatu monda campioni di Francia, d’Auropa, maestri intarnaziunali è – di sicuru – u piu ghjovanu gran’ maestru di a storia di i scacchi francesi, Marc’andria Maurizzi. 

In fini, ghjuchendu a i scacchi, i ghjucadori migliurani i so capacità intelletuali. Par asempiu, un studiu scintificu chjamatu« Learning to Think Project » hà mustratu una crescita di u CI ind’i ziteddi ch’hani amparatu u ghjocu di scacchi. U ghjocu sviluppa dinnò ind’i ghjovani u liveddu di i matematichi è di a littura. 

I scacchi poni amparà dinnò certi valori. Pà Akkha Vilaisarn, i scacchi sò una « scola di citaddinanza » è prumovini l’idea di una Corsica chì vinci. Pà via di una filiera sportu-scacchi prisenta di a scola primaria sin’à u liceu, i ghjovani poni amparà non solamenti i scacchi ma dinnò lizzioni di vita. 

A Corsica, tarra di i scacchi : 

Avali, a Corsica cumincia da essa presa in asempiu da l’altri parti di u mondu. L’isula hè cunnisciuta à l’intarnaziunali com’è una « tarra di scacchi » è si passani calchì di i più grandi turnei di u mondu. D’istatina, duranti i turnei di u Corsican Circuit, i ghjucadori di u mondu sanu venini pà misurassi nant’à a scacchera. U ghjiru cumincia incù u più famosu open di tutti in l’usteria Marina Viva in Purtichju. Dopu, i turnei cuntinueghjani in cità com’è in Bastia ma dinnò in paesi muntagnoli com’è Quenza, Ciamannacci o Casanova. 

Quistu ambienti scacchisticu faci vena in Corsica monda ghjucadori frà quiddi i più forti di u mondu com’è u vincitori di l’open, u maestru intarnaziunali talianu Pierluigi Piscopo, licinziatu à l’Echecs Club Ajaccien. Abituatu di i turnei in Corsica è campionu di Corsica, ci hà spiigatu chì li piaci assai à ghjucà in Corsica parchì ci hè una bedda cultura scacchistica è una ricunniscenza suciali pà i scacchi. Par iddu, u sicretu di u successu scacchisticu di a Corsica hè u sviluppu impurtantu di l’attività di i scacchi in i scoli ch’hà permesu di scopra monda talenti com’è Marc’andria Maurizzi. « Sè Marc’andria Maurizzi hè ghjuntu induva hè, hè parchì hè natu in Bastia, è andatu in una scola induva erani insignati i scacchi eppò in un circulu è in una liga putenti è cù bravi munitori è ghjucatori pà prugrissà. A partessi di quì, hè tuttu meritu di u talentu straurdinariu di u ghjovani Gran’Maestru ! ».  

A Corsica ùn hè micca u solu asempiu d’un sviluppu tremendu di i scacchi. U listessu fenomenu si veda in picculi paesi com’è l’Armenia o l’Islanda. A Russia è i paesi chì faciani parti di u sistemu sovieticu tenini una piazza impurtanta in u classamentu mundiali. Attualmenti, l’India hè una putenza crenscendu è produci monda talenti ghjovani. 

L’iniziazioni à i scacchi 

In fini, s’è vo vuleti iniziavi à i scacchi, eccu i cunsigli di i nosci intarvistati : 

Par u maestru intarnaziunali Pierluigi Piscopo, i scacchi parmittini primu d’anticipà, d’urganizà, di priveda i situazioni, nant’à a scacchera com’è in a vita. Dopu, a parsona pò amparà u rispettu di l’altri, a pacienza è a perseveranza. Parsunalmenti, i scacchi l’hani amparatu à cunnoscia i limiti soii. Quista disciplina hè tanta cumplessa chì u ghjucadori amparani prestu ch’ùn si pò cambià u ghjocu è chì a perfezzioni ùn esisti miccai. Tandu, bisognu à travaddà sempri pà migliurassi, avendu sempri in menti ch’hè infinita a scuparta di i scacchi !

Pà Akkha Vilaisarn, t’hà amparatu à ghjucà quand’iddu facia i so studii di matematichi. Subbitu i scacchi sò diventati una passioni ch’iddu ùn lasciarà maì più. Man’à manu ch’iddu amparaia i scacchi, scupria u mondu maraviddosu di i scacchi. Pà iddu, i scacchi ùn sò micca l’affari di mimoria o di logica ma di criatività. Ogni ghjucadori t’hà a so propia manera di rifletta è ghjucà. Nant’à a scacchera, u ghjucadori devi elaburà una strategia pà ripiddà a partita, allora faci travaddà a so imaghjinazioni pà truvà u colpu chì vincia. Di l’altra parti, i scacchi sò una scola induva s’amparani u rispettu – di i reguli è di l’altri – a cuncentrazzioni, u travaddu di i sbaglii è a riflissioni nanzu à l’azzioni. U so ultimu cunsigliu hè d’andà in un associu, pocu imprema u vosciu liveddu.  Truvareti d’altri ghjucadori furmatori chì vi darani cunsiglii è dinnò amichi. « Ci hè una bona ambienza è ci campemu ! ».