Articulu scrittu da Anghjulu Santu Bartoli
U COCA… Oghji, questu nomi hè cunnisciutu da par tuttu è ogni parsona n’hà bitu almenu un sorsu in a so vita. Si trova in ogni bar, in ogni caffè, in ogni ristoranti. In un solu ghjornu si vendini guasgi 3 milliardi di buteddi di Coca-Cola !
Ma in u 2019, hà statu locu un prucessu frà The Coca-Cola Company, impresa amiricana chì vendi a famosa bienda, è u Coca Mariani, una nova impresa corsa di famidda, criata da un ristoratori aiaccinu, Christophe Mariani. U sughjettu di quistu prucessu hè l’utilizazioni di u nomi « Coca » : The Coca-Cola Company voli chì u ristoratori aiaccinu cacci a famosa chjama di a so impresa.
In fatti, u Coca-Cola ùn hè micca abbastanza ghjovanu… è, sopratuttu, ùn hè micca amiricanu ! À l’urighjini di u successu di stu sodà, ci hè un corsu : Angelo Mariani.
U nosciu eroi nasci u 17 di dicembri 1838, in Peru-Casevechje, paesi di Tavagna. Hè chjamatu Anghjulu-Francescu. Fiddolu di Francescu-Saveriu Mariani è di Sofia Sebastiani, u genitori soiu hè l’aputicariu di a pievi. Grazia à stu mistieru, apri un’altra farmacia in Bastia in u 1849 induva Anghjulu-Francescu, tandu ghjuvanottu, s’intaressa di più in più à u mistieru di u paternu. Cunduttu da eddu, Anghjulu-Francescu pidda a dicisioni di siguità a stessa via. In u 1859, Anghjulu-Francescu si stalla in Pariggi pà fà i so studii. Quallà, devi essa discretu sopra i so urighjini corsi parchì, dipoi a fini tragica di l’imperiu di Napulioni, una parti maiò di l’upinioni publica francesa odia i Corsi. Cambia dunca u so nomi corsu di Anghjulu-Francescu in Angelo Mariani, patronimu più talianu. Cumencia a so carriera divintendu priparatori di farmacia. Passiunatu da i travaddi di u medicu talianu Paolo Mantegazza nant’à a pianta di cocca, Angelo crea cù l’aiutu di u duttori Pierre Fauvel un « vinu di cocca ». Faci chjamà a so nova bienda « Vinu tonicu Mariani à a cocca di u Perù », chì sarà cunnisciuta com’è u « vinu Mariani ». Sta bienda hè un misciu di 60 grammi di cocca amuddatu in una licori (podassi u cognac) è dopu, in u vinu di Bordeaux. U risultatu hè missu in una butedda di 50 cl.
Subitu cunnosci a bienda un successu tamantu in l’Auropa sana. Hè vinduta com’è rimeghju contr’a parechji mali com’è l’anemia o l’imputenza sissuali. I soldi hani pirmesu à Angelo di apra a so propia farmacia in u 41, corsu Haussman. In l’anni 1880, u so cumerciu si sviluppa assai bè è Angelo faci custruiscia un’usina in Neuilly-sur-Seine pà a fabricazioni di u Coca Mariani. Vicinu à st’usina si stalla un’infrastrutura tamanta didicata unicamenti à u rinumatu vinu Mariani : laboratorii, carciarii, etc.
In u 1870 s’hè maritatu cù Marie-Anne Paulmier chì darà a Angelo trè ziteddi : André, Andrée è Jacques. A so famidda campa in un appartamentu cunfurtevuli vicinu à Saint-Germain è à a so farmacia. Angelo faci custruiscia dinò a Villa Andréa, in Valescure, stazioni balnearia di Pruvenza, induva si spinghji u primu d’aprili 1914. Hè intarratu in u cimiteriu d’u Père-Lachaise in Parighji.
Veru geniu di a publicità, Angelo hè riisciutu a prova di fà tistimunià parichji parsunaghji celebri di u so tempu com’è u scrittori Émile Zola, u Papa Léon u XIIIu o a cantadora Sarah Bernhardt di i binifizi di u vinu. Pà disgrazia, a so lascita s’hè persa in a siconda parti di u XXu seculu è un amiricanu, John Pemberton, farmacistu in Atlantà, hà rubbatu l’idea d’Angelo Mariani è hà criatu a Pemberton Chemical Company, chì si chjama oghji a Coca-Cola Company.