Dop’à l’elezzione regiunale, dipartimentale è territuriale francese, Tempi, in cullaburazione cù u Grand Continent, vi prupone una prima analisi di a situazione eletturale in Corsica cù u pulitulogu Andria Fazi.
Da truvà nant’à u situ di u Grand Continent, l’interviste intricciate cù Christiane Rafidinarivo, prufessore-cercatore à l’Università di A Reunione cercatore invitata à u CEVIPOF, Christophe Batardy, cercatore assuciatu à l’ARENES è spertu à a Fundazione Jean-Jaurès, è Andria Fazi, maestru di cunferenza in scenze pulitiche à l’Università di Corsica.
Chì tematiche regiunali specifiche, chì bilancii pulitichi particulari anu marcatu st’elezzioni regiunali?
Andria Fazi : A qualificheria vulinteri cum’è dilusoria a campagna corsa, in quantu e divisioni principali ùn sò micca veramente emerse. Ancu a divisione stituziunale – vale à dì a quistione di u raportu di a Corsica cù a Republica francese – hè stata, fatta fine, mintuvata di manera piuttostu debule. Era quantunque un aspettu nantu à u quale e pusizioni di u merre d’Aiacciu Laurent Marcangeli, chì hà guidatu a lista di diritta, cuntrastanu assai cù quelle di e trè liste naziunaliste in a corsa per u secondu giru.
I candidati stessi ùn sò micca solu responsabili di ste mancanze. Ancu i media anu avutu un rolu in u prucessu. Difatti, e liste anu focalizatu a so campagna nant’à a mubilisazione di u so propiu campu piuttostu chè di circà u cunfrontu, cum’ellu si vede nurmalmente in e campagne di tipu presidenziale francese o americanu. Hè una strategia chì hè riescita per un candidatu ma micca tantu per l’altri.
A quistione di a pianificazione regiunale era di sicuru à u centru di l’imbusche. À partesi da u 2021, a Cullettività di Corsica (CdC) pò rivede u pianu di pianificazione è di sviluppu durevule per a Corsica aduttatu in u 2015; hè dunque una quistione cruciale, chì hè stata troppu spessu trattata di manera superficiale. Quì dinò, ci sò stati pusizioni assai sfarenti, in particulare trà Laurent Marcangeli è Gilles Simeoni (FAC, Verts / ALE; autunumistu) ma ancu trà quest’ultimu è a lista indipendentista Core in Fronte.
Di più, u sistema partigianu corsu hè strutturatu di manera assai specifica. A divisione per ciò chì tocca à e cunsiderazioni ecunomiche è suciale, generalmente duminante in Francia è in altrò, hè oghje in gran parte sustituita da a divisione istituziunale è identitaria relativa à u raportu chì a Corsica deve avè cù a Republica francese. Hè un sistema menu cumplicatu ch’è 20 anni fà, è e cose parenu assai più nette oghje. U prucessu di territurializazione chì oghje porta à una prevalenza di e quistione lucale nantu à e quistione naziunale hè iniziatu assai prestu, in l’anni 80, è puderia cuntinuà. Puderiamu finisce cù un sistema di partiti cumpletamente tarriturializatu à a manera polinesiana o di a Nova Caledonia, regioni induve e cunsiderazioni naziunali sò di poca impurtanza. I partiti republicani tradizziunali, lucali o naziunali, sò percepiti cum’è à l’anticogna postu chì ùn interroganu micca è ùn volenu micca mudificà di manera significativa u ligame cù a Republica francese. In sta cunfigurazione, Laurent Marcangeli hà una respunsabilità particulare, postu chì da e so qualità d’avversariu è di presidente di gruppu dipenderà podarsi l’avvene di st’urganisazione in Corsica.
A poca participazione pò esse interpretata cum’è un segnu di disinteressu per a pulitica regiunale, o à cuntrariu cum’è u risultatu d’una naziunalizazione eccessiva di e campagne ? A pandemia averia pussutu ghjucà un rolu ?
Andria Fazi : Ùn credu micca chì u rolu di a pandemia sia maiò. A ghjente s’hè mubilizata assai mentre scrutini in Olanda o à u Perù, perchè ùn anderianu micca à vutà in Francia ? Pensu chì u prublema sia in u fattu chì queste istituzioni sò mal identificate, u so interessu ùn hè micca percepitu cum’ellu ci vole, è quessa hà un impattu annantu à l’astensione.
A participazione assai più alta in Corsica chè in l’altre regione puderia esse spiegata da e cumpetenze più larghe di a Cullettività di Corsica o forse da u raportu cumplessu cù a Republica francese ? Chì ponu esse l’altri fattori?
Andria Fazi : Eccu dui aspetti impurtanti. A centralità è a visibilità mediatica di a Cullettività di Corsica paragunata à i cunsiglii regiunali sò tamante. Ùn vidimu micca e riunioni di u cunsigliu regiunale di PACA di modu regulare nant’à France 3 Provence. Ci hè una visibilità è un’attenzione assai più forti in Corsica, cù un sistema puliticu assai più spaccatu è multipartitu, principalmente per via di a presenza di una linea di divisione addiziunale rilativa à a situazione di a regione in a Republica Francese, ch’ùn esiste micca in Nurmandia o in Occitania per esempiu. Ci hè più scissione è più mubilizazione. Ma ci vole à ramintà chì 6 anni fà, à u sicondu giru, a participazione era di 67%, guasi 10 punti di più ch’è dumenica scorsa. A participazione hè calata di manera significativa ancu in Corsica. Si pò vede quì attempu l’impattu di a calata di certe forze pulitiche – a manca moderata o a radicale sò sparite à u primu giru, l’effettu d’un spettru puliticu chì si ristringhje, d’una mancanza di pluralisimu puliticu, è ancu quellu di una pupulazione chì cambia assai. Tutte l’inchieste mostranu chì quandu un individuu hè appena ghjuntu in un territoriu, hè menu integratu puliticamente; cunnosce menu ghjente, hà menu interazzione, ne sà menu di l’attori è di l’imbusche, è di manera logica vota menu. Tandu a Corsica, chì avia 260 000 abitanti in u 1999, ne conta avà 340 000. Cunnosce una crescita demugrafica for’di misura di pettu à l’altre regione francese, solu per via di migrazioni interne à a Francia.
Chì sò i cuntrasti geugrafichi principali ?
André Fazi : U votu corsu ferma sottumessu à contingenzi lucali impurtanti. Eppuru, ci vole à sapè chì Gilles Simeoni ottene risultati boni in guasi tutte e cumune. S’è no pigliemu l’esempiu di Bunifaziu, duv’ellu era abbastanza luntanu à u primu giru, u ritiru di u merre Jean-Charles Orsucci (centru) li hà datu un soprapiù di voti assai impurtante. A forza maiò di Gilles Simeoni hè a so centralità pulitica, a so maghjina d’unificatore è d’ « omu onestu » chì li permette di figurassi bè dapertuttu, ancu in Aiacciu duv’ellu ottene un risultatu assai più altu di quellu ottenutu da i so sustegni mentre l’elezzioni municipali.
In Corsica, a fusione di i cunsigli dipartimentali è territuriali in u 2018 hà cambiatu un pocu a situazione. Tradiziunalmente, i cunsiglieri dipartimentali eranu agenti eletturali influenti, assai presenti in u cutidianu di i so cantoni, in cuntattu cù i merri è i residenti. A so sparizione puderia avè causatu un svantaghju per e forze pulitiche chì s’appughjavanu nant’à elli. Ma vidimu sempre chì a dinamica di u votu ùn si ferma micca à e questioni interpersonali è chì parechje persone anu un votu di cunvinzione. In parechje municipalità, l’elettori ùn anu micca vutatu per a sensibilità pulitica di u so merre, elettu u più vicinu di i so elettori. Alcuni merri fermanu assai influenti, ma in generale pare chì ùn anu più u stessu putere d’influenza chè in u passatu, nè nant’à a scelta nè mancu nant’à a participazione di i so elettori.
Si vede piuttostu una ricumpusizione di u paisaghju puliticu regiunale o un spiazzamentu di l’equilibrii nentr’à i sfarenti blocchi ? Chì sò e divisione in corp’à sti blocchi ?
Andria Fazi : Frà i naziunalisti, ci hè assai chjaramente l’affirmazione d’una preponderanza di Gilles Simeoni chì, à parè meiu, ùn era micca prevista à stu livellu. Scambia assai affari dop’à a quasi evizzione di Corsica Libera (independentista) chì u capimachja Jean-Guy Talamoni era prisidente di l’assemblea di Corsica. À u nivellu intra-naziunalistu hè da veru assai sensibile è forse decisivu, mentre chì st’effettu di ricumpusizione hè menu chjaru à manca è à diritta.
In quantu à l’uppusizione trà partiti naziunalisti, era chjara durante l’anzianu mandatu chì Corsica Libera era più à manca chè l’autunumisti. Què si pò vede ancu di più cù Core in Fronte, partitu cù un radicalisimu suciale è ambientale ancu più affirmatu. Hè capita chì l’idee di manca ùn sparisceranu micca da l’Assemblea di Corsica, ma seranu purtate da l’indipendentisti, chì, di sicuru, ùn cuntenteranu micca tutti l’elettori di manca in Corsica. Ci hè una perdita di pluralità pulitica chì si nota assai è chì ùn hè forse micca una bona nutizia per u dibattitu demucraticu.
D’altronde, ùn credu mancu appena chì Gilles Simeoni o ancu Jean-Christophe Angelini (autonomistu) volenu perde a so centralità, chì dipende ancu da a so muderazione ideologica nantu à e quistione ecunomiche è suciale. Quessa li permette di seduce l’elettori sia di diritta sia di manca, è hè difficiule imaginalli sorte da stu schema chì hè, per esempiu, quellu di u partitu naziunalistu bascu.
Chì hè u mutivu di a calata di u Rassemblement National trà u 2015 è u 2021 ? Chì hè u so impiantu ?
Andria Fazi : Ùn pensu micca chì si possa parlà d’impiantu postu chì u RN ùn hà micca una struttura in Corsica, nemmancu un dirigente significativu. Ùn hè micca cuincidenza chì u capu di a lista cambiessi cù ogni elezzione. Hè ancu più paradussale quand’elli si consideranu i risultati di Marine Le Pen à l’elezzioni presidenziali, chì sò eccellenti. In Corsica, Marine Le Pen hà tutte e pussibilità di sorte in testa pè l’elezzioni presidenziale l’annu prossimu, ma e strutture lucale ùn l’anu mai seguitata. Sta quistione hè forse più forte in Corsica chè in altrò, ma ùn hè micca propria à l’isula. Ci sò altri dipartimenti francesi induve a RN hà poca struttura è pochi candidati lucali.
Cumu hè strutturatu l’impiantu territuriale di u partitu di Emmanuel Macron è di i so allegati ?
Andria Fazi : Jean-Charles Orsucci ùn vulia micca a nomina En Marche cum’ellu ùn la vulia micca durante l’elezzioni municipali di u 2020. Durante l’elezzioni municipali, nisuna lista ùn avia a nomina En Marche nè ùn avia circatu à dumandalla. D’altronde, pudemu osservà chì Jean-Charles Orsucci hà pigliatu l’uccasione di pusiziunassi di più à manca chè in u 2017. Perchè u spaziu era più apertu, ma dinò perchè rivindicassi d’Emmanuel Macron in Corsica ùn hè micca puliticamente prufittevule.
Cumu interpretate u “bonus à u surtente” spessu citatu in u cummentariu di i risultati di st’elezzione ?
Andria Fazi : State à sente, mi pare st’idea di bonus un pocu scumoda : in u 2017 era u sgaggisimu, era assolutamente necessariu di « sgaggià i surtenti ». In u 2020 , a maiurità di i merri fermanu in piazza, benchì l’eculugisti cunquistessinu merrie impurtante, è quist’annu si parla di bonus à u surtente… Hè un pocu dura à crede chì i francesi è i corsi cambiessinu di dispusizione psiculogiche tutti l’anni. Questa deve esse correlata à a qualità di l’offerta. Se i sfidanti ùn sò micca in capacità di presentà un’offerta attraente, ùn ci hè nisuna ragione per ch’elli riescinu à imponesi. In e cumune, più di u 70% di l’abitanti dicenu esse suddisfatti o assai suddisfatti da u so merre : perchè vulerianu cambiallu ? D’altronde, ancu s’è a participazione hè differente in Corsica è in u restu di a Francia, durante l’elezzioni regiunali u titulare gode di a so più grande notorietà; cuncentra l’attacchi annantu à ellu ma hà una visibilità superiore.
In Corsica, e liste indipendentiste anu fattu guasi 15% à u primu giru, qualcosa di difficiule à imaginà qualchì annu fà. Pensate chì e mandature precedente di i naziunalisti anu rassicuratu i Corsi annantu à sta famiglia pulitica?
Andrie Fazi: Iè. U fattu d’avè smessu l’azzioni viulente è clandestine è d’esse ghjuntu à putere hà creatu di sicuru una dinamica di nurmalizazione. Ma ùn pensu micca chì sia necessariu d’interpretà for’di misura sti 15% di voti indipendentisti di u primu giru. Oghje, l’autunumismu hà una centralità è una nurmalità tale chì ùn hè micca surprendente chì certi elettori naziunalisti si girinu versu un’offerta appena più radicale. St’offerta hè sopratuttu raprisentata da Core in Fronte chì dapoi u 2017 hè statu, da u mo puntu di vista, u più maiò avversariu à a magiurità naziunalista. S’hè parlatu assai di u prugressu di l’indipendentisti, chì sò passati da 10 à 15% trà i primi giri di u 2015 è di u 2021, ma smintichemu forse quellu di l’autunumisti, chì crescenu da u 17% à u 42 % !
In u cuntestu attuale, i partiti naziunalisti anu di sicuru i migliori dirigenti, i più cunvincenti è – in u casu di Gilles Simeoni – i più rassicuranti è unificanti, chì riescenu à riunisce elettori di tutte e sensibilità ideulogiche. Questu hà surpresu parechji osservatori chì anu trovu dillusoriu u bilancciu di a maiurità surtente. Tuttavia, l’unicu sundagiu prupostu da i media hà nigatu quessa è i risultati a neganu sempre oghje. Infine, in pulitica, sè omu hà un interessu à ghjucà nant’à i so punti forti, si pò ancu apprufittà di e debbulezze di l’avversarii : orbè, si puderia nutà un crollu assai impurtante di e forze pulitiche chì anu duminatu a Corsica in u passatu.
Intarvista fatta da Forteleone Arrighi, trascritta da Ornella Nobili – Figura da Rose Luciani