Fanou ùn ne hè micca à a so prima prova chì dapoi anni hà sunnatu incù u gruppu Corsican Trio è incù u quale hà giratu in la Corsica sana. Abituatu à sunà in gruppi, è in i club jazz parighjini oghje hè un prughjettu soiu ch’ellu ci prupone. In giru à ellu, ci sò musicanti talentosi cum’è William Brunard à a cuntrebassa è di Benji Winterstein à a ghitarra ritmica, chì ùn sò altra ch’è i più boni musicanti attuali in u stile. Bastianu Brison, pianistu di a scena jazz attuale à u swing trimendu, hè invitatu di ‘ssu nuvellu album.
U musicanti bastiacciu ci offre un terzu dischettu dedicatu à u so stile di core, a ghitarra gipsy. In giru à ellu, ci face scopre un ambiente impastatu da un tonu smooth jazz, attempatu di a so frata cirnese. Cusì ci trasporta in u so universu quantu riccu cà asgiatu d’accessu. Parchì ghjè vera : u jazz certe volte hè un stile propiu chjosu è sciappacapu pà quella ch’ùn hè statu amparatu à rallegrà si nè. Ma Fanou, e regule di u jazz e cunnosce è ne ghjocca, prupunendu tandu una valsa à l’usu corsu chì ci empie u core di nustalgia o un swing chì ci mette u surisu in bocca è a gioia in pettu. Un festivale d’emuzzione piacevule chì ci facenu prò in sti mumenti strani chè no campemu. Pà quessa, saranu suddesfi l’appassiunati di jazz, i melomani è ognunu à quale li piace a musica è qualchì note di ghitarre.
Oghje dispunibile in vinyle è da chivi à pocu annantu à tutte e piattaforme in linea, hè u dischettu corsu à scopre di u 2021. State attenti à a so escita…