L’annu 2021 pichja dighjà u mondu di l’insignamentu in Corsica da una riforma pulemica. L’ultimu 25 di ghjinnaghju, u ministru di l’educazione naziunale francese, Jean-Michel Blanquer, hà pigliatu un arristatu ministeriale mudifichendu e mudalità di u cuncorsu di u CAPES (certificatu di faccendaghjine à u prufessuratu di u sicondu gradu) per e lingue regiunale, è dunque a lingua corsa dinù. Incù ‘ssa riforma, s’assiste à un’inversione di i cuefficenti trà u francese è u corsu per u cuncorsu esternu di u CAPES : capunanzu, u francese avia un cuefficente di 4 è u corsu un cuefficente di 7. Da ‘ssa riforma, u corsu passa à un cuefficente di 4. 5 in fronte à un 7. 5 per u francese. ‘Ssa riforma sembra cuntradittoria incù l’ogettu stessu di u CAPES in lingua corsa.
‘Ssa riforma hè sugetta à forte cuntruversia è hè dinunciata da i sindicati d’insignanti, i studienti è l’assuciazione di parenti di scularii.
Una riforma malvinuta per i difendidori di a lingua corsa
Per ‘ssi ripprisintanti di l’insignamentu, u morsu si ristringhje annantu à a lingua corsa. Per u cullettivu SNALC, u Sindicatu Naziunale di i Culleghji è Liceii, un ritornu in daretu hè necessariu : “ci vole ristabilì à tutti conti u mudellu iniziale riguardu à i cuefficenti è, aldilà, dà à a lingua è à a cultura corsa u statutu valurizante ch’è ella mireta tuttu à longu à u percorsu sculariu”.
In lu quaternu rivendicativu, i sindicalisti piazzanu l’accentu annantu à a necessità di garantisce un insignamentu bislinguu à tutti i livelli per “sbuccà annantu à una sucità spannata in u so bislinguismu, prupiziu à l’avvenimentu di un plurilinguismu. ùn ci vole micca à sminticà ch’è noi somme in core di u mare Terraniu. […] A nostra lingua hè una lingua identitariu chì rinvia à a cultura di u nostru paese. Hè lingua chi dà accessu à 1,2 miliardu di locutori à traversu lu spagnolu, u portughese è u talianu. “
U cullettivu Core In Fronte, ellu, dinoncia un abbassementu di u livellu di maestria è cumpitenze per i prufissori di dumane.
Una riforma pragmatica ?
À u latu di l’Accademia di Corsica, ci hè un antru puntu di vista : sient’è Hyacinthe Ottaviani, “Avemu vulsutu un CAPES à parità incù l’altre lingue straniere, vene à dì l’inglese, u talianu, u spagnolu… È u francese piglia a piazza di una prova ch’è si ritruveria in una prova d’aggregazione”. L’idea seria di mette e lingue regiunale di paru à a categuria di lingua induve ne facenu officialmente parte. ‘Ssa riforma ùn hè d’in altrò micca propiu à a lingua corsa, u brittone, u bascu o dinù l’occitanu sò cuncirnati.
Per a rittrice Julie Benetti, e prove di u CAPES di lingue vive devenu permette d’apprizzià bella sicura e cumpitenze linguistichi di i candidati, ma dinù a capacità à insignà : “Ùn s’arrulla micca sultantu di i linguisti, arrullemu i prufissori devenu animà una siquenza d’insignamentu, à prugittà si in u mistiere di prufissore, à trasmette i valori di a Ripublica”. A crescita di u cuefficente di a lingua francese si spiigheraghju dunque da una vulintà di valutazione di a capacità d’insignamentu di u candidatu da u ghjudiziu. Questu hè d’in altrò ciò chì hè spiegatu annantu à u situ di l’accademia di Corsica, cuncirnendu à e prove orale :
“Una siconda parte in lingua francese cunsistente in a pruposta di piste di sfruttamentu è di ‘ssi documenti, sicondu e cumpitenze linguistiche ch’è elli mubilizeghjanu l’interessu culturale è di civilisazione ch’è elli prisentanu.“
Eppuru, i ripprisintanti di i sindicati à favore di l’insignamentu di a lingua corsa facenu valè ch’è ‘ssa prova puderia effittuà si à listessu modu in corsu ch’è in francese. Un’ipotesi in u sensu di a riforma hè ch’è l’arrullamentu d’esaminadore corsofoni per ‘ssa parte cruciale di a prova limiteghja prestu e pussibilità.
Una riforma minziunata à l’assemblea naziunale mentre e quistione à u guvernu
Marti u 16 di ferraghju, u diputatu naziunalistu Paul’Andria Colombani hà interpellatu u ministru di l’educazione naziunale à u mumentu di a seanza di quistione à u guvernu. Sient’è u diputatu, ‘ssa riforma annuncia un prucessu gattivu per e lingue regiunale.