Introitu
Avali faci à pocu pressu un annu chì u SARS-CoV-2 hè intrutu in i nosci viti. In marzu 2020 eppo’ dopu in nuvembri semi statu cunfinati. Ci ricurdemi tutti di l’evacuazioni di 12 parsoni incù u Tonnerre u 22 di marzu di u 2020 da Aiacciu à Marsiglia. St’eventu passatu, u prima cunfinamentu fubbi piuttostu calma par a Corsica in tarmini di morti è di casi. C’hè statu l’istati, più di un millioni di turisti, avemi lasciatu i mascari è gesti di privinzioni… in sittembri l’epidemia hè ripartuta. In nuvembri semi statu cunfinati una siconda volta. Natali, capu d’annu, è in ghjinnaghju a storia ricummincia. Avali chì semi à l’iniziu di frivaghju, ci dumandani l’autorità s’è hani da cunfinà o micca, è prubalmenti di sì. In st’articulu vi prupunimi un puntu graficu è statisticu nantu à a situazioni in Corsica, in tarmini d’uspitalisazioni, di casi, di parsoni in rianimazioni ecc.
St’analisa hà u scopu di fà un riassuntu di a situazioni appartesi di i dati bruti di Santé Publique France par chì tuttu u mondu possi veda l’evuluzioni di a situazioni in i dipartimenti di u Cismonti è di u Pumonti. Ùn rimpiazza micca u lavoru di i medichi è di i rispunsevuli di a saluta (ARS, direttori d’uspidali ecc.). Vi cunsigliemi dunqua di siguità sempri i raccumandazioni di l’autorità cumpetenti in materia in saluta. Pudeti truvà parechji infurmazioni nantu à u Covid-19 quì : ARS di Corsica.
1. Cuntaminazioni, incidenza è pusitività
Par sta parti, è dinò par quiddi chì seguini, avemi un accessu à i dati à u liveddu dipartimintali, ciò chì ci parmetti d’ussarvà l’ivuluzioni dicumposta eppo’ dopu aggrigata.
I dui graficu prisintati di sottu rapprinsintani i casi pusitivi (scala di manca, curva azzurra) è u numaru di testi ogni ghjornu (scala di dritta, barri grisgi) dapoi u 1u di sittembri. Tutti i sciffri sò prisintati dapoi u 1a di sittembri (à l’eccezzioni di l’incidenza) parchì ci parmetti di veda u sicondu marusolu, u “calma” di Natali ed a ripresa di ghjinnaghju.
In u Pumonti, eccu u graficu :
È par u Cismonti, videmi chì a situazioni ùn hè micca listessa :
Tistemi attualmenti di più in Cismonti cà in Pumonti hè vera, ma u vidaremi cù u tassu di pusitività, ùn spiega micca tuttu.
Avali, pudemi visualizà l’incidenza, vali à dì u numaru di casi par 100 000 abitanti, ogni sittimana da a sittimana 46 di u 2020 à a sittimana 3 di u 2021. Cuminciemi sta sittimana parchì ci parmetti di visualizà a ripresa di l’epidemia dopu à un’accalmia in nuvembri.
L’heatmap par u Pumonti. In y i classi d’età è in x i sittimani da a sittimana 46 à a sittimana 03 di u 2021. I dati andani fin’à la fini di ghjinnaghju.
Par u Cismonti, l’heatmap si leghji di a listessa manera. È si vedi bè (incù a scala à a manca) chì a situazioni st’ultimi sittimani ùn hè micca listessa.
U tassu d’incidenza hè dui volti più altu cà quiddu di u Pumonti ! (150 contru à 70). Particularmenti vidimi chì i più vechji (+90 anni) sò assai tuccati, ciò chì si spiega, podassi, incù u cluster di u SSR “La Palmola” in Oletta. L’altri classi d’età sò dinò di più in più tuccati. U virus circuleghja dunqua in l’insembu di a pupulazioni.
Un’antra manera di veda a prugrissioni di l’epidemia hè di fighjulà u tassu di pusitività, vali à dì u numaru di pusitivi / u numaru di testi. Eccu u graficu par i dui dipartimenti :
A numaru di testi custanti, voli dì chì u numaru di casi prugressa in Cismonti tandu chì s’abbassa in Pumonti. Pudemi dinò paragunà a situazioni incù u liveddu naziunali, dapoi u 1a di sittembri, in versioni animata :
A virsioni animata ci parmetti di visualizà forsa meddu i dinamichi. Infatti, u tassu di pusitività hè firmatu sottu à quiddu di a Francia sana (~6% oghji). In a fini di dicembri, i testi massivi prima di Natali spiicani sta falata impurtanti. Eppuru, à a fini di ghjinnaghju, u Pumonti ùn cresci micca troppu, si stabilizeghja à 1.5-1.6% allora chì u Cismonti cresci fin’à 3.5% è a Francia fin’à 6%-6.5%. L’incidenza ferma più bassa, ancu in Cismonti, cà in Francia induva hè aldilà di i 200 pà 100 000 abitanti. Parò, bisognu à fà casu. Pò dighjinirà prestu, supratuttu in Cismonti. Richjamemi dinò chì a Corsica faci parti di i tarritorii i più “invechjati” di Francia : 30% di a pupulazioni > 60 anni è 11% > 75 anni. A puvartà hè dinò bedda alta : 18.7% in u 2017, a più alta di a Francia metrupulitana. I mezi d’evacuazioni sanitarii criani tinsioni : par evacuà una parsona fora di Corsica, ùn si pò micca fà in ambulanza o in TGV, ci voli à fà usu di l’avviò. In certi cundizioni, par asempiu in casi di timpesti, pò essa impussibuli o assai difficiuli. Hè dunqua un gran piriculu par l’isula di ritruvassi sbarsata da l’epidemia.
2. Uspitalizazioni, rianimazioni
Di manera logica, dui variabili cintrali in a gistioni di l’epidemia sò l’uspitalizazioni è i rianimazioni. Prima parchì ci voli ad avè i capacità di piddà in carica i malati di u Covid-19, ma dinò parchì ci sò assai altri malatii chì toccani a pupulazioni, sopratuttu quandu sta pupulazioni hè piuttostu vechja. Dui grafichi parmittini dunqua d’avè una visioni glubali.
U prima, i parsoni uspitalizati in Corsica par causa di Covid-19 dapoi u 1a di sittembri di u 2020 :
L’intarprintazioni hè chjara : a situazioni hè assai assai tesa in Cismonti incù 49 uspitalizazioni contru à una decina in Pumonti. Duranti u mesu di nuvembri, era più altu u numaru d’uspitalizati in Pumonti ma s’hè abbassatu pocu à pocu senza aumentà di novu. Par u Cismonti, i cluster di lu spidali sò a causa di una parti di st’uspitalizazioni, ma ùn spiega micca tuttu è ùn arriguleghja micca u prublema di a tinsioni criata nantu à u sistema di saluta.
Par i rianimazioni, a tindenza hè listessa :
À lu spidali di Bastia 8 parsoni sò in u serviziu di Rianimazioni Covid-19. Infatti, a capacità pò essa allargata è forsa chì 13 o 14 malati si poni accuglià. U prublema hè chì s’è dighjinireghja a situazioni, pò andà più altu, cù un costu umanu altu, danni tamanti nantu à parsunali di lu spidali in tarmini mintali è fisichi, è una presa in carica di l’altri malati sub-uttimali, parchì mancani u tempu, i parsunali, u matiriali ecc. In Pumonti ci sò 0 parsoni in Rianimazioni Covid-19. C’hè dunqua prima sta pussibilità d’evacuà i malati versu à lu spidali d’Aiacciu. Sta pussubilità funziuneghja s’è firma cussì stabili è cuntrullata a situazioni in u Pumonti. A tinsioni à u spidali di Bastia hè stimata à 100%, voli dì chì avali ci voli à spirà chì ùn ci sarà micca malati è casi di più par a rianimazioni.
3. Vaccinà
A sapemi avali, u nosciu migliori arnesu par luttà contru à a pandemia oghji hè u vaccinu. Ci voli dunqua à vaccinà quasgi tutt’a pupulazioni par essa pruteti. Parmetti di pruteghja i più vechji, di rallintì a circulazioni di u virus è d’ività i formi i più serii, fendu dunqua scresci a prissioni nantu à lu spidali. U primu graficu prinsintatu quì sottu ci mostra u parcentuali di a pupulazioni chì hà ricevutu almenu una dosa di vaccinu.
Par avali aumenta à un tassu altu u parcentuali di a pupulazioni vaccinata, ancu s’è di pettu à i nosci vicini taliani, tedeschi o britannichi semi sempri losci. Di più, i prublemi in i cummandi di i vaccini AstraZeneca faci chì un pudemi più tena un ritmu > 100 000 parsoni vaccinati ogni ghjornu. Infatti si vedi bè incù u graficu chì segui, in u quali videmi u numaru cutidianu di vaccinati par 100 000 abitanti ogni ghjornu. Semi sottu à i 100 parsoni vaccinati par 100 000 abitanti ogni ghjornu.
Fin’à u 20 di ghjinnaghju, in trè curvi aviani una penta espunenziali allora chì oghji u ritmu hè chjaramenti più bassu. L’ultimi sciffri sò i siquenti : 1 541 071 parsoni vaccinati in Francia, 5031 in u Pumonti è 4847 in u Cismonti. L’ubbiittivu di 60% hè ancora luntanu ma nurmalamenti incù i trè vaccini à i quali s’aghjunghjini podassi u vaccinu russu, un vaccinu francesu, u chinesu… Sarà forsa pussubili di ritruvà una vita “nurmali” quist’istati o duranti u vaghjimu.
Cunclusioni
L’aveti capitu, a Corsica hè taddata in dui parti. U Cismonti hè in una situazioni critica, in u sensu chì avali a marghjini par manuvrà hè assai minuscula. In Pumonti, à l’invirsiu, hè cuntrullata l’epidemia. Avali chì fà ? A ci diciarani i nosci autorità cumpetenti. Oghji, 157 parsoni sò morti di u Covid-19 in Corsica è più di 75 000 in la Francia sana. Una cosa semplici è assulutamenti issenziali hè di cuntinà di purtà a so mascara, di lavassi i mani, di nun andà à veda (s’è ùn hè micca un’urgenza o un’ubblicazioni) i più vechji è i più debuli. L’attitudini individuali, hè statu mustratu da parechji studii, hani un rolu tamantu in u cuntrollu di l’epidemia. Faraghju u meddu par aghjurnà st’articulu incù novi dati, grafichi è infurmazioni.