11 di nuvembri di u 2020. Monsalviaga, Tempoli.
Michel Migalli hè accantu à a so mamma, Odile, 94 anni, chì hè in traci di mora.
Una donna fora di u cumunu.
Hà lasciatu à tutti un ricordu amaru, una donna pocu friquintevuli, avara, curiosa, briacona. Tutti i difetti, l’avia edda.
Odile andaia sempri ind’è Martine, a vigia di u quartieri eletta d’estrema dritta à a merria, à più di ottanta cinqui è ancu novanta anni è circaia ind’i mobuli l’alcool di biara à novanta sei gradi (dittu “penala de trigo”) chì a noscia vigia avia piattatu incù a so lighjendaria prudenza.
A difunta surtia sempri incù una blusa à fiori cum’è una vichjetta di a so età è un saccu Lancel o Chanel, ridicula à u pussibuli in issa piccula cità di pruvincia.
A morti di Odile ùn hè micca stata ignurata da Claudine, piena di rancori di pettu à a so parsona, à tal puntu chì, quand’edda era viva, a trattaia di « Madame Clown».
L’avvisu di decessu ind’u ghjurnali ùn hè mancu publicatu da Michel, ch’ùn ama micca a stampa lucali.
13 di nuvembri di u 2020, Tempoli.
U tuttu Monsalviaga va à a ceremunia civili, ancu Bainzu Gossotta.
Michel ricevi à tuttu u mondu incù a precauzioni legata à u Coronavirus è indica u caminu da suvità pà andà fin’à u campu di famidda induva si truvarà a tomba.
Muriel, incù un rossu à labbri di culori scuru, ùn avia micca boni rilazioni incù a difunta, chì a trattaia anch’edda di Madame Clown, s’hè vistuta incù una tinuta accumpagnata di fiori scuri è di una veletta nera, marchjaia ind’u prati incù i tacchi di 12 cm. Gridaia “Ma chérie! Tu es morte! Reviens parmi nous! Tu étais pleine de bonté, comme personne avant!” mentri chì, in vita, ùn si pudiani omancu veda, s’insultaiani tutta a santa ghjurnata.
L’anzianu merri Gossotta, malatu, suvitaia a cascia è pienghjia di tutti i so lacrimi, falsi lacrimi, di pentimentu par rapportu à tuttu ciò ch’eddu t’avia fattu di mali ind’a so vita. A so prisenza hè stata presa cum’è un insulta à a famidda sempri in vita.
Un ex-patronu di magazzeni, anc’eddu malatu (Parkinson) basgiaia a cascia è pienghjia di tutti i so lacrimi, sott’à a stupefazioni di u publicu prisenti. Era tinutu da Michel eddu stessu, chì cascaia tutti i deci metri, ùn tinendu mancu annantu à i so ghjambi.
L’intarramentu passatu, a ghjenti ùn pienghji omancu appena issa donna. Mentri chì Michel si faci una raghjoni di u decessu di a so mamma, Claudine pripara un culpacciu.
14 di nuvembri, Ferona, Intrapresa funeraria Loppoli.
Claudine entra ind’a buttega determinata à priparà una piccula vindetta (“faida”) à Michel è a so difunta mamma.
S’avvicina à i fiori è dumanda à u vinditori : « Monsieur. Excusez-moi! Oui, pouvez-vous me préparer une couronne de fleurs pour un décès avec un ruban indiquant la mention BON DÉBARRAS puis l’envoyer de la part de Claudine Zamparra à Michel Migalli au bar Brasero à Tempoli ? »
U vinditori pidda a so cummanda spiciali è a metti in baddu.
Issu culpacciu à 37 € hè una liberazioni tamanta u mondu pà Claudine.
27 di nuvembri di u 2020, Tempoli, casa di Michel
Michel apri à u fattori è vedi u cuntinutu di u pacchettu.
Entri ind’una furiaccia nera, sciappa a petra è faci un malori incù a sciarpa di u mazzulu di fiori « Bon débarras » in ghjiru à eddu.
Stunanti a vita in Tempoli.