À l’uccasione d’una nota di travagliu scritta pà Le Grand Continent, è dispunibile quì avemu pussutu intarvistà u Prisidente di l’Assemblea di Corsica da capì megliu cumu s’era gestitu st’evenimentu à u livellu lucale di a Corsica. E rilazione incù u Statu francese, a piazza di l’università, a cuuperazione incù a Sardegna : vi prupunemu oghje un resucontu di sta discursata incù Ghjuvan’Guidu Talamoni.
Una presa di dicisione unilaterale durante a crisa sana
Di veranu, bellu prima à u prima scunfinamentu hè statu prupostu un metudu da a CDC chì si vulia arrimbà annantu à un cumitatu criatu pà l’uccasione è chì saria statu cumpostu da una manata di membri permanenti frà i quale : I parsunali di a culletività, e cumune maiò, l’associu di i merri è l’amministrazione di Statu mà dinò scentifichi, l’ordine di i medichi, i sindicati è l’università di Corsica. Sarianu stati mubilizati tutti sti membri sicondu à e tematiche è e prublematiche di u scunfinamentu.
Invece di què, a Corsica s’hè vistu impone una data di fine di u cunfinamentu chì ùn hè mancu appena stata dicisa da u putere Parigginu ma solu da u Prisidente di a ripublica ellu stessu. Pà Ghjuvan Guidu Talamoni, hè propiu prublematica st’indiatura unilaterale è parsunale chì l’attori lucali ùn sò micca stati cunsultati. Pà e riintrate sculare, hè falata torna a dicisione d’insù in tantu chì i merri è e pupulazione lucale ùn eranu forse micca d’accunstentu. Prupietaria di i muri, hà decisu a CDC d’utilizà sta leva da attimpà l’apartura di i culleghji è licei in una logica d’ascultera, ancu s’ella hè stata un puntu di frizzione incù u ritturatu.
U famosu GreenPass chì era in fattu nulla di più ch’ùn passaportu sanitariu prupostu da l’assemblea dà sicurizà i flussi in Corsica, l’hà ricusatu dinò Parigi cum’è i studii di seruprivalenza in la pupulazione Corsa. Allora ch’elli travagliavanu manu ind’a manu a CDC, l’ordine di i medichi è l’università di Corsica, è ch’ elli t’avianu una visione più vicina di u tarrenu.
Eppuru s’ellu si pò capisce l’intaressu di u statu d’avè una visione glubale pà a Francia sana, appughjà si annantu à u lucale saria stata pà u megliu, chì di più, i prisidenti di i rughjoni è di e cullettività intrattinianu una cuurdinazione oghjinca à u più forte di a crisa. Di sicura chì da u puntu di vista di l’UE, i Stati anu un rollu da impittà, ma u pinsamentu puliticu francese ùn hè à prò di a dicintralisazione. Semu bellu luntani di u pattu Girondin prumessu durante a campagna di e prisidenziale.
In più di quessa, cum’ellu u ci mintuveghja Ghjuvan Guidu Talamoni, hè à l’eletti lucali ch’ellu dumanda i conti a pupulazione, ancu s’elli ùn anu e cumpitenze da gestisce stu genaru di crisa. I Corsi, aspettanu risultati è misure di l’Assemblea di Corsica. Pà u prisidente di l’Assemblea, ci hè un sintimu di rispunsabilità trimende pà i membri di a CDC.
Una situazione micca tantu megliu pà u sicondu marosulu…
Incù sei letti di rianimazione pà 100 000 abitanti, sia guasgi à mità di menu cà ind’è l’altri rughjoni francesi, a situazione ùn hè oghje di più favurevule cà durante u primu marosulu di u Covid. Ci hè un sintimu d’inghjulia tamanta chì privale frà l’usteriaghji, i cumercianti è i prufissiunali. Ùn vole dì ch’elli ùn anu a brama di fà i sforzi, ma hè difficiule a capiscitura di pruposte è d’ordini luntani luntani di a rialità. Sentiment d’injustice. À cuscienza di l’inghjustizia hè maiò. In tantu chì, prove di l’efficacità di a pulitica di Parigi ùn ci hè tantu. Pare sta pulitica bella disurganizata è hè nurmale, postu ch’ùn si pò pratende à una pusizione ginerale annantu à sti sughjetti cumplessi. Certe misure sò parse belle scusgite chì a tempu si chjudianu e fruntiere di a Francia incù l’Italia ma si pudia passà è vene di manera libara in Corsica.
Un prublema di sistema è di filusufia pulitica prima di tuttu
Gestisce a crisa, hè statu cumplicatu pà tuttu u mondu è Ghjuvan Guidu Talamoni ùn vole micca à acciaccà o dà e lezzione à nisunu. Ciò chì li pare primurosu è chì u sistema ghjacubinu francese hà fattu a prova di una mancanza trimenda in a riazzione à a crisa Covid.
Postu chì a Corsica hè unu di i soli rughjoni senza Centru Uspitalieru Universitariu, s’hè criatu in giru à u Dr. Benedetti un cumitatu dà dumandà è travaglià à prò di a so criazione. L’amministrazione di Statu ùn hà mancu pigliatu in contu e rivindicazione, ancu sè st’indiatura hè sustinuta da l’inseme di i medichi è di i prufessori chì stanu for’di Corsica è u travagliu ùn hà ancu principiatu. Eppuru a voglia ci hè, chì à u livellu lucale, l’università di Corsica hè stata propiu attiva par via di u laboratoriu soiu, annantu à u pianu scentificu ecc.
Sempre à prupositu di l’università di Corsica, a messa in ballu di u travagliu à distanzia hè stata fatta cum’ellu ci vulia vista u carattaru eccezziunale di a situazione ma hà dinò palisatu un prublema insuspittatu : a pricarità numerica d’una mansa di studienti. U cunfinamentu hè statu un fattore maiò di perdita di leia trà l’università è certi studienti ch’ùn eranu arnisati o chì stavanu in paese mal sirvuti da intarnet. Hè statu tandu criatu à posta l’associu Corsica solidaria da palisà stu prublema maiò.
E rilazione incù a Sardegna à l’arrestu
Da u 2015, l’eletti di a maghjurità attuale anu principiatu un indiatura da rinfurzà e rilazione incù a Sardegna. Anu criatu incù Gian-Franco Gallau un cunsigliu permanente aggruppendu tutti i prisidenti di i gruppi à i quali li tuccava à travaglià annantu à e quistione culturale, universitarie, ecunomiche è tant’altre. Eppuru, dapoi l’alizzione in Sardegna è u scambiu di maghjurità quallà, scontri ùn ci n’hè statu cà unu è si sò rarificati i scambii. L’istituzione esiste sempre di manera ufficiale mà hè i attesa è ùn hà pussutu esse mubilizata durante a crisa di u Covid. À prupositu di ste rilazione, t’hà a brama u Prisidente di l’Assamblea di Corsica chì a cuurdinazione di a Corsica incù l’Italia è a Sardegna sia più forte arrimbendu si annantu à a vicinanza è à l’intaressi culturali è ecunomichi cumuni.