Hè d’usu trà corsi quandu parlemu di a pulitica isulana, d’evucà, qualchì volta senza numinà lu, u prublema corsu. Si lamenta (o micca !) d’una mancanza d’autonumia legislativa spiigheria u nostru ritardu ecunomicu, a so mancanza d’infrastrutture, a sopraripprisintazione di u settore turisticu in a nostra econumia chì pruvucheghja a prissione speculativa ch’è noi cunnoscemu. Si puderia dinù parlà di u declinu a lingua corsa, di a nostra cultura è di i nostri tradizioni è ancu a prissione di più in più forte d’aggruppamenti maffiuselli in l’isula in tutte i strati di a nostra sucetà è di a nostra econumia. U prublema corsu seria bè qualcosa chì tocca parechji temi ma seria per u più un prublema d’ordine puliticu.
Chì parla di prublema puliticu dice mubilisazione pulitica, muvimentu populare cù u fine di mette in luce ‘ssu prublema è u finalmente fà piglià in contu ‘ssu prublema da l’auturità cumpetente affinch’è elle agiscenu. Bè, avemu i partiti pulitichi naziunalisti, chì più hè chì sò à u putere, chì anu cuntinuamente manifistatu è face sente a so voce per à tempu svighjà e cuscenze in l’isula tuttu chjamendu à u guvernu à Parigi cù u fine di ottene e cuncessioni, è perchè micca infine, l’autonumia.
Tandu, duvemu custattà ch’è a girata storica in a pulitica isulana ch’è noi avemu vissutu in 2015 ùn hà micca appurtatu u so lottu di cambiamenti è di riforme à i quali l’elettori corsi s’aspittavanu. Ricusu di e rivendicazioni, suvitatu da un infussamentu di i neguziati per infine sbuccà annantu à una situazione di sediu instituziunale. I naziunalisti si ritrovanu intrappulati à e cummandi in Corsica senza pudè influenzà significativamente annantu à e decisione di Parigi. In Aiacciu, si ghjoca la mostra spirendu ch’è Parigi cede, quandu invece Parigi face a scummessa di una disfatta in un futura prossimu di a cualizione naziunalista. Breve, ùn ci vole micca aspittà si à evuluzioni per avà. Tandu cume si face ch’è ne siamu quà oghje ? Cume spiigà ch’è u Momentum ch’è i naziunalisti corsi pinsavanu avè custruitu in u 2015 ma soprattuttu in u 2017 ùn si sia micca traduttu micca di l’atti cuncreti è una sputica apertura da parte di Parigi ?
Un interessu per a quistione corsa in u cuntinente chì s’hè diccinulatu cù u tempu, à contracurrentu a logica isulana
È s’è a risposta risidia simpliciamente in u fattu ch’è u prublema corsu chì tempì fà era un prublema avendu rialmente di l’effetti annantu à l’agenda puliticu naziunale, chì obbligava i partiti pulitichi naziunali à posiziunà si annantu à a quistione corsa (à prò o contru à evuluzioni istitutziunali) ùn n’era simpliciamente più unu ? Si basta à piglià l’avviò, varcà l’orizonte di a Corsica è di sbarcà in Parigi, parlà incù la ghjente per rende si contu. U livellu d’impurtanza di a quistione corsa cum’è prublema puliticu hè a ricunniscenza di ‘ssu prublema da a pupulazione generale è/o da i membri di l’alta amministrazione francese.
Si puderia dinù analizà e quistioni poste di regula da i ghjurnalisti cuntinentali à i ripprisintanti di u naziunalismu corsu per rende si contu di a poca ricunniscenza nè l’avanzata in e priurità guvernativi di u prublema corsu sti pochi anni. E quistioni sò à spessu simili à ogni intervista, a distinzione da i ghjurnalisti di e muvenze indipendentista è autonomista hè assente o ancu à spessu scumpletta. In breve, a quistione corsa hè un fattu minore o esoticu per i ghjurnalisti di u cuntinente.
Listessa, sembra ch’è a leia instituziunale trà a Corsica è Parigi ch’è ci era in tempi di una volta in tempu di u clanismu triunfendu si sia frusta incù u tempu, ciò chì spiega u pocu interessu ch’è a quistione corsa suscita quand’è ella hè evucata à alti rispunsevuli di l’amministrazione. Ci hè parechje raghjone per spiigà ‘ssa usura : indibulimentu sparizione di a “reta corsu” in senu à l’amministrazione francese di Statu è i so cuntorni, è sparizione di a classa pulitica corsa di u tempu di u clanismu triunfendu chì pudia avè ecu insin’à in e più alte sfere pulitiche, è chì dunque pudia serve di currighjina di trasmissione trà e rivendicazioni naziunaliste è u Statu.
Per via di a sparizione di ‘ssi gruppi d’individui chì ghjucavanu u rollu di currighjina di trasmissione, simile à u mudellu culoniale britannicu appiicatu in India di l’indirect rule, a cumpreensione è l’interessu ch’è pudia suscità a quistione corsa à u livellu naziunale si sò à pocu à pocu diccinulati per finalmente esse marginali. In Corsica, hè l’inversu chì ci hè statu, incù e successive pertusgiate di i naziunalisti à l’elezzioni territuriali di u 2010, u 2015 è infine di u 2017, a vittoria à e legislativi, a quistione di l’autunumia hà occupatu una piazza centrale da i dibattiti à l’Assemblea di Corsica.
Pocu importa l’inghjochi evucatu, hè bè sottu à l’angulu di un’iputetica autonumia ch’è u prublema hè trattatu. Hè dunque un’evuluzione cuntraria ch’è ci hè statu trà a Corsica è Parigi. L’interessu per a quistione corsa annantu à u cuntinente si diccinulava incù u tempu, mentre s’accrescìa in Corsica. L’inghjochi per i naziunalisti corsi hè di risuscità l’interessu per a quistione in senu à l’élite francese cù u fine di ristabilì u dialogu, è perchè micca ottene l’avanzate. Hè u solu mediu per rimette annantu à l’agenda puliticu a quistione corsa cum’è inghjochi naziunale.
A necessità di una “reta corsa” cù un quadru cuerente
Eppuru, s’è noi avemu evucatu e debulezze strutturali è urganisaziunali chì facenu ch’è a quistione corsa hè rilegata à u bassu fondu di l’agenda puliticu naziunale, e risorse umane sò quà per permette di recintrà a quistione corsa annantu à a scena naziunale. Scrittori, econumisti, ghjuristi, funziunarii, imprisarii etc. U capitale intellettuale esiste per fumentà una strategia chì permetteria à u muvimentu naziunalistu corsu di ripiazzà a quistione corsa à u top di l’agenda puliticu. Tandu, a mubilisazione di tutta ‘ssa massa “sapiente” hè debule per u mumentu. E carte maestre intellettuale chì dispone u muvimentu naziunalistu ùn sò micca sfruttate, ciò chì limiteghja tandu a purtata di e so azzioni, è dunque l’impurtanza di a quistione corsa in u dibattitu publicu naziunale. S’è i naziunalisti corsi volenu esce di u so statu di sediu incù Parigi tale ellu hè u casu attualmente, quessa ùn si ferà ch’è da a mubilisazione di u so basamentu intellettuale da a ricustituzione di una sputica reta corsa, da l’elaburazione di un think tank indipindente chì puderia cibà d’idee u muvimentu è dunque tirà lu à l’insù. Un bellu travagliu da vene insomma, s’ella accadi.