Monsieur Anatole – Philippe Alessandri

Rumanzu di a satira suciali ch’ammaistra i codici di a finzioni pulizzera, scura è scimignita. A prima prova di u scrivanu bastiacciu Philippe Alessandri hè stata l’ughjettu litarariu d’un successu à l’impinsata mentri sta longa stonda di cunfinamentu, quandu erani sarrati i cumerci di libri. Avali campa l’opara in l’isula sana è u so parsunaghju sicretu dinò.


Ghjucata di schacchi mai compia, finzioni archangelica è serata d’alizzioni. Eccu calchì fattu d’un imbrogliu stragnu chì sbarsa di ribatti macabri nant’à a tela d’un ecclectisimu burghesi. Monsieur Anatole, curendu sempri a bianchezza culombina di a so camisgia, prova da piattà calchì disgrazia magacciendu à casu u cutidianu soiu, una vita rigulata cum’è l’orillugeria di a so Patek Philippe.

Hè pocu cumunu stu nomi, u parsunaghju è l’opara dinò. Mischiu di litaraturi è di vistituri, Philippe Alessandri ci porta in a cità bastiaccia ughjinca, locu di a tresca campata cù l’ochja di Monsieur Anatole. Uppunenti sbandunatu, s’hè compiaciutu in l’intuleranza muta d’un mondu fughjitu da a più tamantuccia biddezza estetica, regula di primura in u soiu. Impiegatu di banca chì a vita li pari viota, hà trovu un intaressu certu par i mittitoghji ch’iddu compra in i più famosi butteghi auropei. Vistu da tutti eppuru cunnisciutu da nimu, hè l’antinumia di a singularità in u cumunu. S’abbandona dinò à calchì slanciu di pinsati riazziunari davantu à a guffizia di i so pari, sopratuttu quand’iddu godi u spittaculu di a mossa in Piazza publica. A somma di l’induli, suminati tali l’indizi d’una inquesta frà li pagini ni facini un parsunaghju da odià malgradu a so sulitudina. Ma sarà scelta o meritata ? 

Disprezzu par i masci, sfiducia ma fascinamentu par i donni – spiichendu forsa u so gudimentu par i filmetti libidinosi – sustena a cumpagnia di i so cumpari t’hà certi limita par Monsieur Anatole, allora pidda una libartà chì u rispettu di l’usi suciali ùn lascia micca: tomba l’aghjenti. Bisognu à leghja a seguita di a stodia sin’à l’ultima pagina par uttena a raghjoni di st’impeti sanguinosi. 

I duminicati è ghjorna festivi ghjunti, mi pusaiu sicondu l’usi mei à a tarrazza d’un caffè nant’à a Piazza Grande in cità, in faccia à u portu di cumerciu. Era l’uccasioni, leghjendu a stampa lucali à stessu tempu, di goda a vistitura d’alcuni, è d’alcune sopratuttu, chì spassighjaiani davant’à mè. Sta Piazza, di bedda diminsioni è pedona, era u carrughju principali ghjuvendu da veda ed essa vistu. Si salutaiani l’aghjenti, cù rumori aspissu, sighi da impugnaturi virili, sighi da abbracciati filici. Era un festivalu « Oh amicacciu! « , « Comu và? » par i masci, è « Oh cara, cusì bedda, nun sè mancu cambiata!  » par i donni. Ben intesu, quandu s’alluntaia ugnunu, seguitaiani i vituperii, abbrutittu, scruccò, muzzicò… è tant’altri ghjastemi. 

Ma eiu, stimaiu piuttostu sta mossa cù una valori da zeru à dici, apprizziendu l’eleganza di sti donni. Par l’omi, stu picculu ghjocu l’aviu lasciatu, è facia un pezzu, ch’ùn ci erani chì manteddi, calzoni informi, vestitoghja è scarpi di sportu, o scarpacci muntagnoli. Bref, ùn erani mancu vistiti. Tutti sti Bobos erani appassiunati di u Che Guevara, bisognu à mintualu, imitendu l’atitudina « campaniero » à l’usu citadinu incù segni à a moda, di prifarenza. Era la lotta soia, à sti ribeddi di salottu. Par contu meu, erani boni par a categuria di i trogloditi.

Aviu abbandunatu l’estimu di i giuvanetti dinò, liceani mughjendu par a maiora parti, accampendu i caffè di sta Piazza ugni marcuri è sabbatu dopu miziornu. Rigalaiani à u ventu i so pettoni ingunfiati d’ormoni in calchì maglietta scullata, u Smartphone d’una mani è sta maladetta sigaretta di l’altra. Erani bidduchji, ma missi cum’è tutti l’adulescenti di a Tarra, jeans stracciati è scarponi. A l’ascolta di chjachjarati laghji è di risati imbecilli, fighjendu i chjami telefunichi d’una tola à l’altra, n’avaraghju bè invitatu una nant’à i mo ghjinochja par dà sciappati à li so chjappi tondi.

Estrattu di Monsieur Anatole, pagini 33-34.

Philippe Alessandri ci scrivi tandu u so primu rumanzu in a seguita di a Cumedia Humana, isulana è ughjinca. L’autori ghjoca cù l’argumentu litarariu, scusa par u studiu etnograficu di a cumunità soia. Conta a stodia d’una certa viulenza suciali dinò, palisata daretu à l’illusioni di u populu unitu, ma prontu à sterpassi à ugni mumentu. Ghjuchendu cù i cunfini stremi di a raghjoni, trà rialtà è sognu, a scimità pidda formi varii: ciarbedda sempri allitatti da u soldu, teuria di a cuspirazioni, o mossa minata da a pazzia cullittiva, i viti sò cundutti da u statu primitivu è u « Questu » freudianu hè prisentu in a mente d’ugnunu, prontu à saltà è spanticà.

Fattu stragnu, l’antivisti di pettu à l’ultimi tempi disturbati ùn mancani micca in u racontu iniziatu vint’anni annanzu. Parsunaghji ermiti, scunfitta tutala è timori d’un cumplottu mundiali. Quistioni schjariti è cunscenti scappani framezu à un brodu di finzioni litararia. 

  • Monsieur Anatole scrittu da Philippe Alessandri, edizioni La Trace, 2019

 

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.