In lu so libru Psicanalisa di l’Alsazia escitu in lu 1951, Frédéric Hoffet prova à dà calchì chjave di capiscitura di pettu à a l’ubiquità c’asiste in la sucetà è in l’omu alsaziani stessu. In’ssu passaghju di u capitulu chì tratta di l’autunumisimu, l’autore ci porta à riflette annantu à u sughjettu di l’Alsaziani chì sò firmati germani di core oppuru francesi, dicendu chì, sti dui patriutisimi scemi certe volte, ùn rispechjanu micca a vera irendità di l’Alsazianu.
“Detta quessa, è par scartà ogni cunfusione spiacevule, cacciaremu subitu subitu di u nostru studiu l’Alsaziani chì si sentenu è chì sò da veru Alimanii, è chì ùn anu nulla à vede incù l’autonomisti.
Ci vole à rende ghjustizia à ‘ssi omi chì intarpriteghjanu a so dualità altrimente cà i so cumpatriotti. Almenu chì, mossi da a paura d’esse ciò ch’elli sò, l’Alsaziani a neghinu purramente è simpliciamente, ci vole bè à ammette ch’è i listessi bisogni chì chjamanu certi frà elli à sacrificà à un sciuvinisimu francese cuntrariu à a so natura, ne chjama d’altri ver’ di un sciuvinisimu tedescu chì e so radiche instintive sò, in ultima analisi, tali è quali.
Cusì esistenu Alsaziani chì sò patriotti alimani à paru di d’altri chì sò patriotti francesi : ùn si sfarenzeghjanu di quessi cà par via da a scelta ch’elli anu fattu. S’omu pò rimpruvarà ‘ssa scelta ùn sà in virtù di chì criterii si pudaria biasimàline. A so psiculugia hè fora di què, da veru vicina da quella di i so fratelli di razza, patriotti francesi. Tuttu ciò ch’è no avemu dettu annantu à a fughjita di l’Alsazianu di pettu à ellu stessu, annantu à e so riazzione di zitellu aduttivu, annantu à u so cumplessu d’infiriurità, pudaria esse ripigliatu in un studiu di l’”Alsazianu tedescu”. A listessa paura d’esse ciò ch’elli sò, travaglia ‘ssi infelici à u cuntattu di i Tedeschi, u listessu bisognu di cumpinsà da un patriuttismu istericu, u sintimu prufondu di a so unappartenenza, a listessa è sbrusgiulente suffrenza d’ùn esse mai da veru “cum’è l’altri”.
Sò pochi à sapè, in Francia, chi certi Alsaziani autentichi anu emigratu in Germania dopu à 1918 è à 1945, è chi tutti ùn lu fecenu micca da fughje a pulizza francese. Di sicuru, u so numaru hè minimu, di pettu à quellu di l’Alsaziani chì lascionu u so paese in lu 1870 è in lu 1940 par firmà fidi à a Francia. Eppuru si ne trovà. A so sorte fubbe, di regula, trista è a so adattazione difficile è à spessu ancu impussibule. Numarosi sò quelli chì pruvonu à vultà in Alsazia francese bench’elli ci fussinu indesiderèvuli. Ci n’hè chì, davanti à l’impussibilità di u ritornu, anu finiti par dassi a morte.
Issi omi eranu andati contru à a so natura prufonda, contru à sta parte d’elli stessi chì era firmata francese è chì era firmata ancu inde i più germanichi frà elli. Un Alsazianu ùn serà mai un Tedescu, nemenu un Prussianu. Omu ùn ghjoca micca impunitamente incù sè stessu.
Frà e vittime d’un errore fatale, l’asempiu u più tragicu hè magaru quellu di a ghjente ghjovanna chì in lu 1940 si ghjittò corpu è anima in le bracce di u Naziunale-Sucialisimu, impignendu si in e furmazione hitleriane e più fanatiche tale i S.A. è ancu i S.S. Funu elli cundannati cume traditori è nulla ùn hè puru più falsu cà ssa qualifica infamante.
Ùn ci hè micca traditori in Alsazia : ùn ci sò cà disgraziati chì sceglienu male un cantu o l’altru sicondu e circustanze di u mumentu. Ogni tradimentu sottupone un’infideltà à sè stessu. Ma cosa hè “sè stessu” per ‘ssi essari doppii chì sò l’Alsaziani ?
Ùn hè cà in virtù di necessità pulitiche senza dubbitu imperiose è ghjustificate di un puntu di vista naziunale, ma da veru cuntinghjenta è senza fundamenti psiculogichi ch’ omu pò tassà d’infamia l’Alsaziani chì anu dicisu ind’ un sensu piuttostu cà ind’ un antru. Una nuzione di u tradimentu in lu casu alsazianu ùn si pò fundà cà annantu à l’infideltà, micca solu à l’una o l’altra di e duie nazione chì si strappanu a terra è l’anima di l’Alsazia, ma dinò infideltà à a dualità propia di st’anima. Saria traditore di ‘ssu puntu di vista, ogni Alsazianu chì tradisceria a so dualità, dinunziendu par asempiu unu di i so cumpatriotti per avè manifistatu sitimi à prò di a Francia. Hè certu chì assai Alsaziani inculpati da i tribunali dopu à a liberazione intrianu in ‘ssa categuria. E so cundanne funu à spessu miritate. Eppuru, s’omu vole esse logicu, ci vole dinù à cunsiderà cume traditori à u so paese l’Alsaziani chì mandonu davanti i tribunali francesi quelli di i so cumpatriotti chì u solu u crimine era d’avè manifistatu a so simpatia à l’Alemani. Ùn hè chivi solu una vista di u spiritu, po essa. Ùn si ne pò affrancà s’omu vole ghjudicà e cose di l’Alsazia incù un’equità intera.”
Da cumprà u libru :