Oghji in Corsica, i centri cummarciali parini da essa in lu cori d’ugni prughjettu di sviluppu ecunumicu, è pocu à pocu ci ridimi contu di l’impurtanza ‘llu scumpientu, s’agisci d’operazioni tramandi par u picculu tarritoriu, facendu crescia inegualità trà a campagna ed a cità. Sti ritratti di l’arii cummarciali d’Aiacciu, l’architetti l’hani chjamatu i “contra-loca”, vuliani mustrà a nigazioni ‘llu spaziu in la periferia chì campa fora di i leghji suciali ed urbanistichi propii à u mudelu di a cità cunnisciutu sin’à avali.
Vennari, u 14 di frivaghju, l’Ordini di l’architetti di Corsica, cunduttu da Sebastianu Celeri hà addunitu l’Aiaccini intornu à spusizioni è dibattiti nantu à una quistioni di primura: u mudelu ‘lli spazii cummarciali è la so avvena in Corsica. L’invitati di sta terza edizioni sò stati chjamati à purtà un sguardu fattu di spirienzi è cunniscenzi sfarenti nant’à a situazioni urbanistica oghjinca. Erani prisenti Antonia Luciani, geugrafa-urbanista è prisidenta di a fundazioni Coppieters, Franck Gintrand, autori di u libru “Le jour où les zones commerciales auront dévoré nos villes”, ed infini Lorena Lopez de la Calle, anziana ministra ‘lla cultura di a righjoni Araba à u Paesu Bascu.
Prisentu dinò davantu à l’assemblea par prisintà u so lavoru, u curtinesi Marc’Antone Campana ch’hà fundatu l’annu scorsu u so scagnu di studii, Urban’isula, par producia cunniscienzi nant’à u spaziu insulani d’una manera assai urighjinali, grazia à l’infurmazioni cartugrafichi è l’arnesu numericu, hà criatu parechji raprisintazioni à scala ridutta di i cità è paesi corsi, in trè diminsioni. Tandu u publicu hà pussutu scopra cù una surpresa maiò chì si pudia fà intrà a cità vechja d’Aiacciu in l’aria di u centru di cunsumu Atrium, iddi accampani tramindui 45 etari. Spiica u ghjovannu urbanistu ch’hà pruvatu à studià u prublemu ‘lla crescita di i spazii cummarciali cù un’analisa ughjittiva. Senza purtà una simplici critica estetica nant’à a periferia, u scopu di a so mudelisazioni saria piuttostu di nutrì i nosci raprisintazioni nant’à i spazii pianificati.
Sicondu à Marc’Antone Campana, u so travaddu palisa sopratuttu l’impurtanza ed a piazza ch’hani presu i loca di cunsumu in la vita noscia, t’hà u sintimu chì a Corsica seguiteghja a via di a custruzzioni è di a speculazioni di i bè immubili sfrinata nantu à u litturali, com’è l’hani cunnisciutu nanzu l’isuli Baleari. Stu fenomenu hè divintatu tantu caratteristicu, ch’iddu basta à parlà di “balearisazioni” par capìlu oghji. Hà sceltu una adattazioni di stu cuncettu urbanisticu par a situazioni scuntrata in Corsica, piddendu l’asempiu di Baleone, spaziu perifericu aiaccinu divintatu spechju isulanu d’un sviluppu cummarciali, ecunomicu ed urbanu senza leghji nè cuntrollu di pianificazioni, tandu preferisci parlà di “baleonisazioni” par essa più pricisu. Si pò affirmà chì a nascita d’una parola nova, in lu duminiu di l’urbanisimu ùn hè mai viota di simbulu, chì chjamà sti processi participeghja assai à fà crescia a cuscenza cumuna di pettu à i prublema di a cità oghjinca.
I discursati erani cundutti da Antonia Luciani ch’hà principiatu da prisintà u scopu di st’appuntamentu urbanisticu sottu ad a forma di parechji dumandi: Prima di tuttu, chì saria u sguardu ch’iddi ponini nantu à a situazioni insulani l’invitati ? Dopu, pudemi ci cunsidarà a Corsica com’è u veru contra asempiu d’un sviluppu urbanisticu ed ecunomicu sustinivuli cù i so spazii di cunsumu tramandi ? Ed infini, nunustentu l’ussarvazioni ‘lla dibulezza di stu fenomenu ad a scala naziunali, saria una raghjoni par essa menu aguattati di pettu à l’evuluzioni di li nosci periferii ?
Franck Gintrand, ch’era ‘ghjà vinutu in Aiacciu calchì annu fà, hà rimarcatu ch’avia cambiatu assai a cità imperiali, è quistu di manera negativa.
“A st’ora quì, u carrughju duvaria essa vivu, mentri a sera. Eppuru s’agisci d’una situazioni ginirali ch’avemi studiatu in l’altri cità pocu à pocu tralasciati da l’attività ecunumica: avali si perdi sopratuttu l’identità urbana. Stu fenomenu si veda in li picculi cità com’è Aiacciu, ni sò scartati solamentu i metropoli naziunali ed auropeani. A raghjoni di sta morta hè simplici assai, ci hè un attori particulariu, cunnisciutu da i spicialisti di a pianificazioni è chì chjamemi “les foncières”, st’aghjenti ùn custruiscini più cummarci par a cità, ma contr’à idda oramai, t’hani un scopu: tumbà u mudellu ‘lla cità auropeana è crià un centru ecunumicu novu, ma in periferia. Tandu ci dumandemi oghji s’è a Corsica pudarà piantà u sviluppu ‘lli spazi cummarciali è truvà i so intaressi veri.”
“Prima di tuttu, ci hè una mancanza di riflissioni ad a scala inter-cumunali par a pianificazioni, ni pudemi essa sicuri, parchì si ponini quistioni l’aghjenti mentri stu tempu d’alizzioni, dumandani u cuntrollu di u sviluppu urbani, u cambiamentu di u PLU dinò, ma ci voli à pinsà d’una altra manera a gestioni trà i cumuni.“
Eccu calchì ritrattu di a spusizioni, fatti da Philippe Pierangeli in la periferia d’Aiacciu.
Lorena Lopez de la Calle hè stata invitata à parlà di i spazii cummarciali cù l’asempiu ‘lla so cità, Vittoria-Gasteiz, 220 000 abitanti, in lu Paesu Bascu. Sta cità guasgi antica, ch’esisti dapoi u novesimu seculu hà luttatu contru à a crescita ‘lla so periferia cù un ingaghjamentu puliticu putentu à fiancu à i cummarci ed u sviluppu ‘lli mubilità interni.
“Forsa ch’eu portu un altru sguardu, ma pensu chì difiniscia una vera filusufia urbana importa assai, cù un sviluppu ‘lla cità cunduttu da a cultura. Par contu meu, t’hani un intaressu maiò i picculi nazioni com’è noi à scambià insembiu, hè ghjustapuntu l’andatura prima di a fundazioni Coppieters chì voli sparta pratichi boni è sustinivuli par i tarritorii. Tandu t’hani da sceglia i cità un mudelu novu da splutà à l’avvena. Prima di tuttu, ci simu appughjati nantu à a cultura, parchì rendi ugni cità unica hè parmetti un ligamu suciali veru, à l’inversu di i cità americani chì t’hani criatu loca di scambi suciali artificiali cù i spazii cummarciali.”
Framezu à parechji misuri municipali, i più impurtanti erani: a criazioni d’associ di cummarcianti è pruduttori, ugni locu di vindita t’hà l’ublicazioni d’essa piazzatu nantu à u carrughju, ed a merria hà piantatu a custruzzioni di a galeria di marcanti (com’idda esistava a galeria Napuliò in Aiacciu, ch’hè stata sarrata dui anni fà). Ghjunghjava dinò u prublema di a dibulezza di trasmissioni ‘lli cummarci d’una ginirazioni à l’altra, tandu sò stati trovi suluzioni par aiutà i ziteddi di marcanti è crià una dinamica nova di vindita. E par incità l’aghjenti à cumprà lucali, ghjurnati di i cummarcianti sò missi in baddu mentri a sittimani, cù a criazioni di stradi di l’artisgiani – pruduttori. Una imaghjina pusitiva di a cità, appughjata nantu à u patrimoniu culturali ed a cucina, sparta da a televisiò basca dinò cù parechji emissioni faciendu a prumuzzioni di i prudutti lucali.
Di pettu à i trasporti, una suluzioni hè stata trova; i reti di treni (TGV, Tramway) ghjunghjini in lu centru di Vittoria-Gasteiz è sò ligati à l’altri mubilità urbani. “A rinascita ‘llu centru di a cità principia da l’associu salutiferu trà urbanisimu, infrastrutturi è cummarci, dopu ci voli ad avè a vulintà pulitica par fà campà una cità cù una populazioni sana, tandu avemi ammaestratu i prezi di l’alloghji è prupunimi ad i studienti di campà in lu centru.”
Si hè compiu l’appuntamentu da una longa discursata trà l’aghjenti vinuti ad ascultà u dibattitu. Eletti, candidati pulitichi à i municipali, architetti, urbanisti è citatini hani pussutu sprimà punti di vista sfarenti è parsunnali nantu à i spazii cummarciali ed a periferia d’Aiacciu, dui fenomeni ligati à a crescenza di l’urbanisazioni ‘lla costa isulani dinò. A quistioni di a respunsabilità hà certi volti scatinatu i discussioni, eppuru ugnunu era d’accunsentu par affirmà chì a pianificazioni ‘llu tarritoriu t’hà un’impurtanza ingrandata in la demucrazia citadini, urbanisti è puliticanti hani incitatu l’aghjenti ad ingaghjassi veramenti in li dibattiti par l’intaressu cumunu, è fà intesa la so voci mentri l’edizioni ‘lli ducumenti d’urbanisimu.
Infini, hè certu chì l’architetti è l’urbanisti corsi tenini oghji una piazza di più in più impurtanta à fiancu ad a riflissioni pulitica è citadini, forsa chì a Corsica oghjinca soffri d’una mancanza di cunniscienza nant’à u so spaziu geugraficu, suciali ed ecunomicu ch’ùn pudarà essa appaciata senza u sviluppu di sti mistieri lavurendu cù un sguardu novu è riccu purtatu nant’à a tarra cirnesa.