Aiacciu in Cori – Intarvista di Marc’Antone Mucchielli

image1

Par sta prima intarvista nant’à u sughjettu di i municipali in Corsica, Tempi Rivista hà scontru Marc’Antone Mucchielli. U ghjovanu aiaccinu di 25 anni hè funziunariu spicializatu in lu sviluppu ecunomicu rurali ad u PNR di Corsica, tinarà a settesima piazza nantu à a lista naziunalista prisintata da Core in Fronte, è cundutta da l’avucatu Jean-Marc Lanfranchi. Li piaci à cunsidarassi com’è un militantu vinutu di a sucità civili:Aghju sempri avutu un discorsu cuerenti cù i me idei militanti purtati versu à un’andatura indipendentista, di più aviu sustinutu u muvimentu Core in Fronte mentri l’ultimi alizzioni tarrituriali”. Teni un ingaghjamentu suciali è culturali affirmatu dapoi parechji anni, primu à fiancu à i ziteddi di i Salini in qualità d’educatoru spurtivu, hè dinò spinghjifocu vulintariu ed assai impignatu nantu à a scena musicali corsa.

“Una lista ch’hà pruvatu da addunì tutt’i circondi suciali”
S’è Aiacciu in Cori hà dichjaratu parechji volti chì a so lista saria ‘aparta’ ad a sucità civili, raccoglia sopratuttu aiaccini spartendu un stessu ideali suciali ed indipendentistu.Hè una lista chì faci sensu, l’aghjenti sò naziunalisti è militanti di u muvimentu Cori in Fronti, ma ci trova dinò tutt’i circondi suciali di a cità cù avucati, ritirati, o ancu parsonni ‘llu mezu assuciativu. Vi possu dà calchì nomu, ci sarà Elisa Sammarceli, infirmiera, Luc Bernardini, militanti è manager ad a CPAM di Corsica par asempiu.” Dici, Marc’Antone, nanzu à aghjunghja una pricisioni nantu à l’apartura di lista à l’aghjenti fora di u muvimentu: “Hè una lista d’indipenza aparta à quiddi chì spartani i nosci rivindicazioni. Par contu meu, i municipali sò l’alizzioni pragmatichi, amparemi è riflittimu nantu à a cità cù l’aiaccini chì scuntremi ugni ghjorni, sò quiddi suventi chì t’hani i suluzioni par u so quartieri. Tandu a lista hè nanzituttu stimata da i qualità di l’aghjenti, è micca da lu so statutu in la sucità.”

Quistioni d’urbanisimu, rinnovu di a Citadedda, dibulezza d’attività ecunomica in lu centru di a cità. Tanti sughjetti – aiaccini assai – ch’ùn piantani micca di ritimà a campagna ‘lli candidati dapoi l’apartura di i municipali. Aiacciu in Fronti prova à curà sti prublemi è pinsà l’avvena sicondu à una visioni suciali affirmata.

Vulemu mustrà ad ugnunu chì l’indipendenza principia ad u liveddu di a cità, parchì hè un arnesu lucali, un asempiu mustrendu chì a Corsica n’hè capaci dinò”. U muvimentu circarà da riacquistassi i cumpitenzi municipali è renda effettivi parechji puteri chì th’à u merri par agiscia nantu à trasfurmazioni di a cità. “Piddu l’asempiu di a lingua in l’educazioni, i ciucceri t’avarani un’ubblicazioni d’essa bislingui, vulemi migliurà dinò a valurisazioni ‘lli parsonni cursufoni nantu à u marcatu di l’impiegu, dà un veru scopu ecunomicu ad a lingua corsa, ghjè dinò un arnesu populari aiutendu à sviluppà a lea suciali, sopratuttu trà i quartiera di a cità, i Paduli, i Salini …
Par u rinnovu ‘lla Citadedda d’Aiacciu, u muvimentu hà fattu cunnoscia a so uppusizioni par a pianificazioni di spazii privati nantu à u situ “Sta razza di prughjettu và contru à li nosci idei suciali, vulemi fà un locu par l’aiaccini, induva a cultura ed a storia d’Aiacciu piddariani a so piazza naturali, avemu parechji prughjetti in capu, com’è un museu cunsacratu ad a storia di u portu è di i piscadori aiaccini, spazii di criazioni par l’artisgiani, loca di prumuzioni ‘lli sapè fà, un teatru di virdura.”

In ciò chì cuncerni u centru di a cità, parechji suluzioni trasversali sò pruposti par crià di novu una vita ecunomica di più in più in piriculu, primu di pettu à i trasporti:
Un pudemu fà prumessi nant’à affari impussibuli, di pettu à a quistioni di i trasporti, forsa chì à longu andà, pudarani divintà gratisi i reti di bus aiaccini, ma par avali a municiplità ùn saria micca in capacità finanziara, ci voli à capillu. Parò avemi da curà u prublemu di i trasporti da u cambiamentu prufondu ‘lli reti di mubilità ughjinchi cù a criazioni ed u sviluppu, nanzituttu d’una linea di trasporti publichi maritimi, nantu à a tarra riflittimu da riducia a taglia di i bus par fà crescia l’offra di trasporti in la cità.” « Sarà custruittu dinò un parcheghju fattu di virdura, prupunendu prezzi incitativi par i citadini ed i cumarcianti”, eccu calchì pruposta, fatti framezu à d’altri misuri. Sarà criata dinò una carta ch’iddi firmarani citatini è cumarcianti par ingaghjassi pocu à pocu versu ad u rinculu ‘lli vitturi in lu centru di a cità.

Parechji quistioni annantu à l’avvena di a pianificazioni urbanistica si poni dinò di pettu à un spaziu cintadinu è perifericu cambiendu subbitu subbitu cù a crescenza ‘lli custruzzioni :Primu di tuttu, s’è a lista Aiacciu in Fronti hè eletta ad a merria d’Aiacciu, avemi da andà contru à l’avisu favurivuli di u Pianu Lucali d’Urbanisimu (PLU), chì stu ducumenti hè impinsivuli è murtiferu par Aiacciu.” “Vulemi luttà contru à Air BnB da l’imposizioni d’una tassa à 5% nantu à i lucazioni. Riacquistassi dinò certi loca di a Cità com’è a Caserna Baiocchi chì oghji apparteni ad a CTC, parò ùn hà nienti da fà in piena cità una ciandarmaria, riflittimu dunqua da rimpiazalla da una ciuccera, ed un locu d’accolta par i donni scuntrendu prublemi cunghjucali, tandu un’andatura sana impignata versu un scopu suciali.”

In l’ecunumia dinò, l’andatura si voli à l’iniziu d’una dinamica pusitiva par ogni attori di a cità:A merria t’hà parechji cumpetenzi, pudarà aiutà l’impresi da installassi cù misuri fiscali favurivuli ed una pulitica di sustegnu par i picculi cumarcianti, sarà una manera di ricusà stu mudelu ecunomicu ughjincu ch’ùn hà micca marchjatu ind’è noi, è chì si compia in altrò di più, ùn pudemu cuntinuà nantu à stu caminu. » Si parla allora di migliurà a gestioni urbanistica, sicondu à l’unità ‘lla so pianificazioni à livelli sfarenti.Vidimu a mancanza d’azzioni di pettu à a crescita di a periferia aiaccina, à stessu tempu, avemi mezi par crià di novu una dinamica in lu centru di a cità. Par asempiu sarà fatta una rigulazioni di l’appingiunamenti, vulemu inizià una vera discussioni cù i capi d’impresi dinò, par mettassi d’accunsentu, ci voli chì siani investiti i solda in la dinamica lucali, è micca in stu mudelu assicagnatu è patrunitu da logichi maffiosi di più.

Tandu, s’agisci d’un bilanciu di “scunfitta” ch’hè fattu da Marc’Antone è l’altri militanti di a lista nantu à a situazioni ughjinca di u centru d’Aiacciu. L’andatura di u muvimentu nantu à a quistioni di u turismu starà in lu stessu spiritu:

Crià una fiscalità favurivuli par i picculi, un’inteligenza ecunomica cundutta da un scopu suciali, parchì oghji st’industria di u turismu ùn hè più sustinivuli. S’è piddemi a quistioni di a pulluzioni, in Italia certi cità hani ‘ghjà pruibitu certi bateddi in li so porti. Di più, i cità ùn poni prufittà, d’un puntu di vista ecunomicu, di st’attività oghji, sò ghjiri turistichi urdinati da i bateddi cù ghjenti vinuti da luntanu è ch’hani abitudini di cunsummazioni sfarenti, comprani pocu, o micca. Par avè un turisimu più sanu ci voli à da essa intransigenti ed impona ad i crocieri un cumpurtamenti rispunsivuli, di pettu à l’ecunumia lucali è l’ambienti sopratuttu. »

 

« Erami prisenti in li dibattiti suciali, à fiancu à i grevisti di a Meridiunali mentri u cunflittu maritimu, di i rumenzuli è saremi quì par a seguita« 

Nantu à lu sughjettu di a cummunicazioni, femi rimarcà à Marc’Antone chì dapoi l’apartura di i municipali è l’intrata ‘llu muvimentu in la campagna, una certa discrizioni ‘lla lista hè stata usservata quandi si faci u paragonu cù l’altri listi principali:

« A noscia prima arma pulitica hè nanzituttu sti scontri cù l’aghjenti nantu à u tarreniu, femi una campagna municipali senza l’urgogliu, senza colpi di cummunicazioni o di raprisintazioni tamanti “à l’usu americanu” diciaraghju. Primu di tuttu semi militanti, certi sò dinò prisidenti d’associ, dunqua par rispettu di i nosci idei è di l’aghjenti chì noi raprisintemi, ùn avemu tanti soldi da metta in la cummunicazioni di campagna, semi fidati à lu nosciu discorsu suciali, semi cunviti ch’ùn sarà vintu stu travaddu di fondu, chjamemu l’aghjenti, l’associ lucali, scambiemi assai cù iddi, tandu, s’è semi menu prisenti à l’inversu d’altri candidati nantu à i reti suciali, possu affirmà chì i citadini rispondini prisentu ad i nosci appuntamenti in li quartieri aiaccini, parchì semi quì in ogni dibattitu chì tocca ad a cità. » « Un avemi micca da mustrà sempri di più i cosi chì femi ‘ghjà in rialtà, ed ùn circhemi micca l’apprubazioni da i reti suciali. Eccu un altru spechju di u discorsu suciali chì tinimu, hè statu sempri cuerenti cù i parolli è l’azzioni. »

Una squadra chì circa nanzituttu da impignassi è fà senta a so voci in l’affari ed i prublemi suciali d’Aiacciu: 

“Aiacciu in Fronte ùn hè micca un partitu di puliticanti prufissiunali, hè sopratuttu un partitu di militanti. Erami prisenti in li dibatitti suciali, à fiancu à i grevisti di a Meridiunali mentri u cunflittu maritimu, di i rumenzuli è saremi quì par a seguita. U nosciu scopu stà a causa independentista è semi aparti à tutti quiddi chì si ricunnoscini in stu scopu. Eccu a sfarenza trà una lista d’apartura. U nosciu discorsu ùn cambiarà micca dopu à l’alizzioni hè firmarà in l’andatura indipendentista.« 

Eccu la noscia ultima quistioni, cosa farà Aiacciu in Fronti dopu à u sicondu giru di l’alizzioni, un’allianza cù d’altri andaturi naziunalisti ?

Ci semi impignati in la campagna par vincia, pocu importa u risultatu di u primu ghjiru saremi soli par a seguita parchì hè la noscia loghjica dapoi l’iniziu di a campagna, ùn avemi micca da cambialla par acquistà calchì carreca d’eletti municipali solamenti. Un tinimu micca un discorsu dopiu, parò ùn sinificheghja micca chì semi chjusi à a discussioni s’idda vinia à prisintassi, com’è l’aghju dittu nanzu semi una lista à l’andatura indipendentista è suciali, tandu semi aparti à l’aghjenti spartendu sti dui ideali. 

 

Ditti raccolti luni, u 3 di frivaghju 2020.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.