L’austro-marzisimu – Parti II

Quist’articulu hè a seguita di « Austro-marzisimu – Parti I » pubblicatu nantu à a rivista. Pudeti leghja quista parti eppo dopu vurtà à a prima, o andà à leghjalla prima ; in i dui sensi, sarà una chjarificazioni di u me prupostu.

Quist’articulu t’hà par iscopu di apra dibattiti è passi di cunniscenza chì, ci si pari, ùn sò micca stati aparti in lingua corsa. Cù a rigora scentifica ma senza imbizioni academichi, pruvemi di prupona una littura chjara è semplici senza essa cumpletamenti in a vulgarisazioni di stu currenti intelletuali.

L’austro-marzisimu : cuncezzioni “scentifica” è prudottu di l’istituzioni

1. L’icunumia pulitica com’è mitoda

Prima, l’austro-marzisti poni essa considerati com’è marzisti “classichi” di u periodu post-Marx. Erani à a ricerca di spiicazioni teorichi in cuerenza cù i fatti empirichi, studiendu fenomeni chì nun erani stati discritti da i babba di u marzisimu ch’erani Marx, Engels è Kautsky. Sò stati i prima à prumova u marzisimu com’è una scenzi suciali critica, una disciplina adattata à a ricerca empirica è teurica nantu à i quistioni suciali. Erani tutti membri di u SAPÖ è par a maiurità « ammiratori » di Viktor Adler. Erani sucialisti è dimucrati-radicali. Parò, a Scola marzista austriaca, o austro-marzisimu ùn hè micca u pruduttu di un prughjettu politicu communu ma di, com’è a dissi Otto Bauer ind’u 1927, “a specificità di u so lavoru scentificu”. Spartiani un intarissu par u dibattitu è l’iscambiu cù i principali currenti di a filusuffia è i scenzi suciali di l’epica. Cunstratetini dunqua cù u positivisimu d’Ernst Mach, u neokantisimu, a Scola austriaca d’icunumia politica (2) è cù tutti i critichi nantu à Marx. Par iddi, a dialettica materialista ed a cuncezzioni marzista di a storia pudiani spiicà fenomeni cumplessi, par i quali i ragiunamenti schematichi ùn bastaiani micca. L’austro-marzisimu si metti in cuntinuità di u marzisimu, ma par fà calcosa di novu cù a “mitoda marxiena”, vali à dì fendula evuluà è prugressà. L’ubbiittivu di l’austro-marzisti ùn era micca di custituiscia un sistema nè una ortodossia marzista di u seculu novu, ma di apra un prugramma di ricerca chì t’hà un ubbiittivu nantu à u sviluppu di i “prublemi marzisti” allora chì a sucetà si trasfurmaia sott’à l’azzioni di u capitalisimu, ben stallatu à l’iniziu di u XXesimu(2).

U gruppu di ghjovani chì sarà dopu a Scola austro-marzista si ritrova ingiru à a rivista Neue Zeit di Kautsky. S’intarissani tutti a l’icunumia pulitica, disciplina di i scenzi suciali nata al stissu tempu chì u capitalisimu mudernu, è intratinendu dunqua cun iddu una spezia di ligamu chì pudarebbi essa a suluzioni à i difficultà incuntrati da i marzisti di i ginirazioni passati.
L’austro-marzisti t’aviani dinò a vulintà di trasmetta è di pupularizà a duttrina marzista, è scrivetini testi di vulgarisazioni, è detini corsi d’icunumia ind’i scoli di u partitu suciali-dimucratu. Karl Renner, prufissori è spezialistu ricunnisciutu di i teurii di u dirittu è di u statu, Karl Renner fubbi dinò un cummentatori rinnumatu, è sempri oghji u ridattori di un’introduzioni frà i più ricunnusciti di i libra II è III di u Capitali di Karl Marx.

2. I figuri principali è l’Università di Vienna

Ind’a so Critica di l’icunumia pulitica Marx avia fattu un passu impurtanti ind’a rifundazioni di i scenzi suciali. U scopu avali era d’affruntà a rialtà empirica è i cuntestazioni teorichi cù st’arnesu chì firmaia da migliurà. Max Adler, u filosoffu di l’austro-marzisti, s’era intarissatu à l’icunumia pulitica anch’iddu duranti a so tesa, nantu à l’iniziu di a pulitica mercantilista in Austria(3).

Rudolf Hilferding hè cunsideratu com’è l’icunumistu di u gruppu, rispettatu pà i so analisi nantu à i quistioni munetari è finanziarii(4). Hà pubblicatu nantu à i sistemi icunomichi chì asistiani nanzu à u capitalisimu. Fubbi dinò ministru di i finanzi duranti a Ripubblica di Weimar. Frà l’icunumisti, pudemi mintuvà Otto Bauer, littori è criticu marzistu di a teuria marxiena, hà sustinutu par asempiu i teurii di Rosa Luxembourg nantu à l’accumulazioni di u capitali. Hè cunsideratu frà i migliori icunumisti, macro-icunumisti, di a tradizioni marzista nantu à i quistioni di cunghjunturi, di pruduzioni, l’accumulazioni ecc. hà dinò custruitu una teuria di i prezzi ducumentata in mitodi matematichi è statistichi, vali à dì una teuria chì pudia cuntrastà cù i lavori di i marginalisti è neo-marginalisti (Walras, Pareto, Marshall…) chì fecini di l’usu di i matematichi una caratteristica cintrali di l’analisa icunomica.

Karl Renner, l’avemi mintuvatu, era un spizialistu di teuria di u dirittu, littori di Marx, participeti à pupularizallu, ed era d’altronda portavoci di u gruppu. Era un ilimenti impurtanti par l’austro-marzisti parchì benefiziaia di una riputazioni maiori di prufissori ed era rispittatu ind’a cummunità academica di l’epica.

Gustav Eckstein fubbi dinò un attori impurtanti di a riflissioni inghjiata da ‘ssu gruppu. Fubbi u prima sucialistu è marzistu auropeu chì hà pruvatu d’analizà u sviluppu di a burghesia è di u capitalisimu mudernu ind’a sucetà, sempri tradiziunali in assai aspetti, di u Ghjapponi. Ind’a rivista Die Neue Zeit, scriveti un articulu intitulatu “A mitoda di l’icunumia pulitica”(5) induva feci rimarcà l’impurtanza criscenti di Joseph Schumpeter è di a so sintesa di l’idei marginalisti, di a Scola austriaca, par pruducia una sintesa – affidata dopu à i neoclassichi – cuerenti. Sott’à a direzzioni di Karl Kautsky, ebbini dibattiti nantu à i cicli icunomichi, i crisi, l’imperialisimu. Ebbini dinò dibattiti nantu à l’icunumia munetaria è a teuria di u valori ind’è Marx ; pruvetini di dà una mitodologia scentifica à l’icunumia pulitica. Mintuvemi dinò i femini di u gruppu : a Rumena Tatjana Grigorivici, studienti à Vienna è chì travaddeti ghjustappuntu nantu à a teuria di u valori marxianu. Helene Bauer, chì feci una feci una tesa d’icunumia pulitica ; Natalie Moszkowska, polacchia, campendu in Zurigu è chì facia parti di un circulu più largu di l’austro-marzisti. Ind’i sferi marginali di u gruppu, pudemi mintuvà Alfred Braunthal – chì fubbi u dutturanti di Max Adler, è futuri prufissori influenti sottu à a suciali-dumacrazia di Weimar, Albert Lauterbach, Benedikt Kautsky, o ancora Emil Lederer chì siguiteti corsi d’icunumia pulitica in Vienna cun Otto Bauer è Rudolf Hilferding.

À l’Università di Vienna, incuntreti Carl Menger è Eugen von Böhm-Bawerk duranti i corsi d’icunumia pulitica. Sti dui quì fundetini dopu a Scola austriaca, libarali assai. Erani siduti nantu à i stissi banchi di u corsu di Carl Grünberg, marzistu è prufissori famosu, nantu à a storia di l’icunumia è di a teuria. Fundeti l’Istitutu di Ricerchi Suciali di Francuforti ed hè cunsideratu frà i “babba di l’austro-marzisimu”.

Bauer, Hilferding, Eckstein siguitetini u corsu di Eugen von Böhm-Bawerk à l’Università di Vienna, ed erani siduti cù Schumpeter, Von Mises, Lederer. Ludwig von Mises cunteti parechji anni dopu una sturietta nantu à stu corsu appropositu di Bauer chì difindia a teuria marxiana di u valori. Mises scrivia nantu à stu “cumbatti” trà u studienti ed u maestru :

“ u dibattitu chì uppunia Bauer à Böhm uccupeti tuttu u simestru d’inguernu. I doni di u studienti schiattaia in piena luci. Purtendu u colpu di grazia à a critica chì Böhm avia fattu à l’icunumia pulitica di Marx, Bauer dimustreti chì iddu si punia in cuntraditori degnu di u gran maestru”.

Sapendu i pusizioni radicalmenti upposti à u marzisimu è à i marzisti di von Mises, sta ricunniscenza sottulinieghja ancu di più l’alta qualità di i fundamenti teurichi di l’austro-marzisimu. Stu seminariu fubbi dinò straurdinariu vistu à a quantità di futuri icunumisti di talentu – è chì t’avarani da rivuluziunà a disciplina – chì, ghjovani studienti, erani siduti nantu à i banchi freschi di l’inguernu austriacu. I spiriti maiò di i Scenzi suciali di tindenza germanica s’incuntretini, forsa manghjetini, è subratuttu si nutrini l’uni è l’altri, duranti quist’anni in Vienna. Ci dimostra l’impurtanza assuluta di l’iducazioni, è di u rolu di trasmissioni è di scambiu di l’università. Ùn erani micca nati icunumisti di geniu, eppuru tutti o quasgì hani marcatu a storia di sta disciplina, è di manera più larga di u mondu intelletuali auropeu di l’anni siguenti, mustrendusi chì l’istituzioni, l’embiu puliticu è culturali è certamenti u cuntestu sucio-icunomicu particulari di l’iniziu di u XXesimu seculu, poni crià ginirazioni floridi di pinsatori.

Noti

(1) Pudeti leghja nantu à ‘ssu sughjettu u nosciu articulu chì tratta di A strada di a servitudina di Hayek.
(2) Marxistische Probleme. Beiträge zur Theorie der materialistischen Geschichtsauffassung und Dialektik. Max Adler, (Stuttgart, J. H. Dietz Nachf, 1913).
(3) Adler Max, Die Anfänge der merkantilistischen Gewerbepolitik in Österreich, Vienne et Leipzig, Franz Deuticke, 1903.
(4) Hilferding Rudolf, Le capital financier, Vienne Verlag der Wiener Volksbuchhandlung 1910.
(5) Eckstein Gustav, « Zur Methode der politischen Ökonomie », Die Neue Zeit. Wochenschrift der deutschen Sozialdemokratie, 28. J.-G. (1909-10), volume I (1910), pp. 324-332, 367-375, 489-497.

Bibliugrafia allargata

Adler Max, Die Anfänge der merkantilistischen Gewerbepolitik in Österreich, Vienne et Leipzig, Franz Deuticke, 1903.

Aimar Thierry, « L’école autrichienne d’économie, une problématique de l’ignorance : du subjectivisme à la neuroéconomie », Revue d’économie politique, 2010/4 (Vol. 120), p. 591-622. DOI : 10.3917/redp.204.0591. URL : https://www.cairn.info/revue-d-economie-politique-2010-4-page-591.htm

Béraud Alain, Faccarello Gilbert, Nouvelle histoire de la pensée économique Vol.2. Des premiers mouvements socialistes aux néoclassiques. La Découverte, « Hors collection Sciences Humaines », 1993, 624 pages. ISBN : 2707132241. URL : https://www.cairn.info/nouvelle-histoire-de-la-pensee-vol-2–2707132241.htm

Campagnolo Gilles, Critique de l’économie politique classique. Marx, Menger et l’Ecole historique allemande. Editions Matériologiques, « E-conomiques », 2014, 536 pages. ISBN : 9782919694662. DOI : 10.3917/edmat.campa.2014.01. URL : https://www.cairn.info/critique-de-l-economie-politique-classique–9782919694662.htm

Hilferding Rudolf, Le capital financier, Vienne Verlag der Wiener Volksbuchhandlung 1910.

Krätke, Michael R. « Retour sur une tradition méconnue : austro-marxisme et économie politique (I) », Actuel Marx, vol. 60, no. 2, 2016, pp. 121-138.

Longuet Stéphane, « Les économistes autrichiens (1870-1940) », Cahiers d’économie Politique / Papers in Political Economy, 2006/2 (n° 51), p. 7-25. DOI : 10.3917/cep.051.0007. URL : https://www.cairn.info/revue-cahiers-d-economie-politique-2006-2-page-7.htm

Illustrazioni : Victor Adler.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.