A strada di a servitudina – Friedrich Hayek : un eterodossu urighjinali : littura di « A strada di a servitudina »
Quist’articulu faci parti d’un prughjettu di Tempi, chì cerca à custituiscia in lingua corsa un fonti nantu à i muvimenti intelletuali, pulitichi, artistichi, è nantu à l’attori di sti muvimenti.
A. Introduzioni
Friedrich August Von Hayek hè natu l’8 di maghju di u 1899 in Vienna in Austria ind’una famidda d’intelletuali. U so babbu era prufissori di botanica, è a so mamma facia parti di a nobilità austriaca. D’altronda, era u cuginu di u filosoffu Ludwig Wittgenstein. Feci parti di u regimentu d’artilleria di l’armata austro-ungaresa è participeti à i cumbatti nantu à u Fronti talianu ind’u 1917. Dichjareti, appropositu di a so spirianza di a guerra :
“l’influenza dicisiva fubbi varamenti a Prima Guerra mundiali. Paliseghja certamenti l’attinzioni nantu à i prublemi d’urganisazioni pulitica”.
Feci studi di dirittu è di scenzi pulitichi à l’Università di Vienna, diplumatu di un dutturatu di dirittu ind’u 1921 et di scenzi pulitichi ind’u 1923. S’intarisseti dinò à a psiculugia è a l’icunumia, cunsiderendu chì un icunumistu hà l’ubblicazioni d’intarissassi à tutti i duminii di l’urganisazioni pulitica(1). Da una vicinanza cù l’idei sucialisti, s’avvicineti di i libarali dopu à un seminariu di Ludwig von Mises – unu di l’icunumisti principali di a Scola austriaca. Von Mises li feci leghja Carl Menger è Eugen von Böhm-Bawerk. Hè statu prufissori assistanti di Jeremiah W. Jenks à l’Univarsità di New-York da 1923 è 1924, cummincendu una tesa – senza finisciala – intitulata “Sarà cumpatibili cù una stabilisazioni artificiali di u puteri di cumprà a funzioni di a muneta ?”. Dopu, siguiteti corsi à l’Università di Columbia è à a New School for Social Research. Sott’à a ricumandazioni di Joseph Schumpeter, incuntreti à Irving Fisher è una parti di l’Institutiunalisti americani tali John Bates Clarck è Wesley Clair Mitchell. Vulteti dopu in Austria par travaddà ind’u guvernu à a ricustruzzioni icunomica di u paesu dopu à a Prima Guerra mundiali. Fubbi numatu prufissori à a London School of Economics in l’anni 30, è diventeti britannicu di naziunalità ind’u 1938, postu chì ùn vulia raghjunghja l’Austria annissata da a Germania. Participeti in u stissu annu à u famosu Cullochiu Walter Lippmann in Parigi, iventu chì purtaia l’imbizioni di rifundà u libaralisimu (2). Cumminceti ad acquistà una riputazioni in l’anni 1930, è si ritruveti in prima linea di pettu à i keynesianni.
In quist’anni, Hayke piddeti una pusizioni duppiamenti urighjinali :
1. In Austria, si missi in marghjini di u Circulu di Vienna, chì era unu di i gruppi intelletuali i più influenti di a prima parti di u XXesimu seculu. Si piazzeti accantu à i libarali di a Scola austriaca è di l’elitisimu austriacu.
2. Pruposi una spiicazioni sfarenta da quidda di Keynes di a crisa di u 1929. Par iddu ùn hè una mancanza di dumanda ma l’incumpetenza di i banchi quand’iddi dani i crediti. Stu mecanisimu pruvucheghja un prezzu di u creditu troppu bassu. C’hè dunqua un aumentu di l’investimentu chì inghjena una falata di u cunsumu (postu chì t’avemi l’ugualità risparmiu-investimentu) è un spiazzamentu di l’impieghi ver di i sittori di i beni intermediari. U sistema si scioglie appartesi di a perdenza di cunfidenza di i banchi ind’u sistema è in cunsequenza diminisceghja l’ufferta di creditu. U prezzu di u creditu và di più in più altu, è i firmi si ritrovani strangulati è sò furzati à a bancarotta.
B. A strada di a servitudina
a. Cuntestu puliticu è storicu
A strada di a servitudina hè pubblicatu ind’u 1944. L’armistizia nun era ancu firmata, ma a disfatta di l’Italia è a dirotta di a Germania aviccinetini una parti impurtanti di l’intelletuali britannichi è americani di l’idei communisti.
L’ubbiittivu di Hayek hè di furniscia una argumentazioni contru à a simpatia cù l’idei communisti. Quist’argumentariu hè distinatu à un pubblicu largu, iddu voli cunviscia a pupulazioni sana di a nicissità di custruiscia i sucetà di u dopu-guerra nantu à una basa libarali.
b. Argumentazioni è struttura
L’argumentu cintrali di stu libru, è chì li hà datu u so statutu cussì cintrali è famosu in l’idei icunomichi di u XXesimu seculu, hè di cunsiderà chì i dirigenti difendani i so intarissi proprii, è dunqua ch’iddi sò fundamentalmenti incapaci di piazzà l’intarissu ginirali prima di quiddu propriu. I tinenti di u Public choice sarani inspirati da u lavoru di Hayek, è trà iddi pudemi mintuvà par asempiu Buchanan è Tullock.
A strada di a servitudina hè un assaghju. Ind’a so prifazia, priciseghja :
“quandu un spizialistu di i quistioni suciali scrivi un libru pilitichi, u so prima duveru è di falla sapè à u littori. [A strada di a servitudina] hè un libru puliticu”.
Hè impurtanti di ripiazzà sta frasa, è di manera più ampia a traiettoria di Hayek, in i traiettori ditarminanti di u so “spiritu” :
- L’istatu di i scenzi suciali – è più pricisamenti di a scienza icunomica – ind’u so tempu.
- A so appartinenza à a Scola austriana chì t’hà i so particularità quant’à a visioni di a sucetà è di i rilazioni trà i disciplini universitarii.
Ind’a prima mità di u XXesimu è finu à l’anni 1970-80, i scenzi pulitichi, iconomichi, a suciologia – è di manera più marginali u dirittu – cuntrastaiani in i Dipartimenti di l’Università ; i scenzi umani è suciali t’aviani dunqua più currispundenzi cà oghji, è si pudia essa attempu icunumistu, giuristu è storicu – quest’istatu spiica dunqua in gran’parti a pussibilità par un icunumistu d’andà cù ligitimità nantu à u tarrenu di i pulitisti, i giuristi, o di i suciologhi.
c. A Scola austriaca, terricu di u pinsamentu “hayechianu”
F. Hayek faci parti di a Scola austriaca. Ditta dinò Scola di Vienna hè una scola di pinsamentu chì pidda com’è puntu d’iniziu l’individualisimu mitodologicu (3). Sviluppeghja una cuncezzioni subbiettiva di u valori, dichjarendu chì u marcatu funziuneghja com’è svelatori di i prifarenzi individuali è com’è rigulatori di se stissu. Sta Scola, chì miritarebbi un articulu pà capisciala in tutta a so divarsità ed a so cumplessità, principeghja ind’u 1871 cù i Principii d’icunumia di Carl Menger. In Austria i so più famosi rapprisintenti sò Menger, Eugen von Böhm-Bawerk, Ludwig von Mises è Hayek, è si ritrova dinò in altrò cù icunumisti com’è Murray Rothbard o Jesus Huerta de Soto. A sprissioni “Scola austriaca” veni da i tedeschi di a Scola istorica tedesca com’è una marca di disprezzu par i lavori di Menger. Sò stati influenzati da a scolastica spagnola di u XVIesimu, è i classichi francesi frà i quali Jean-Baptiste Say è Frédéric Bastiat. A teuria difendi una pusizioni chjamata “rialisimu astrattu”. U corpu di a teuria pidda in accontu i caratteristichi di l’essari umani riali è di i so azzioni à u niveddu individuali. L’infinità di causi indipendenti chì entrini in l’analisa di i fenomeni cuncreti impedisci in se l’usu di i matematichi. L’homo-œconomicus di a teuria neo-classica, custruitu da una varietà d’ipotesi cunstitutivi ùn hè ancu validi par l’austriachi. A spiicazioni di un fenomenu icunomicu hè valida quand’idda addunisci di manera logica u fenomenu à i so causi ultimi ; di fattu, ricusa à distinzioni microicunumia/macroicunumia, è l’indicatori aggrigati com’è u PIB, l’inflazioni, u niveddu ginirali di i prezzi ecc. I causi ultimi si sprimani dunqua solu attraversu à i scelti vuluntarii di l’essari raghjunati.
Nantu à l’usu di i matematichi par asempiu, Friedrich Hayek dici :
“l’usu estenssivu di i matematichi, ch’ùn manca micca d’imprissiunà l’omi pulitichi chì nun hani micca furmazioni in stu duminiu, è chì hè varamenti ciò chì s’avvicina u più di a pratica di a magia nentru à l’attività di l’icunumisti prufissiunali”.
Una critica forti à u currenti Marginalistu è Neo-marginalistu chì corri da Walras à Marshall passendu pà Pareto è chì faci di l’usu di i matematichi, un fundamenti di a nova scenza icunomica.
Par quistu libru, chì hè impastatu da l’idei mintuvati nanzu, Hayek s’hè fattu assai criticatu da u mondu academicu. A prima ragioni, l’avemi capitu, teni à a so pusizioni ideologica, allora chì attraversu à u mondu si sparghjini l’idei è i metodi marginalisti. A siconda ragioni teni à a forma di u so libru ; u tonu pruvucanti, i paralleli trà i nazi è i cummunisti, è a rivindicazioni pulitica assumata l’alluntaneghjani da l’academichi richjusi ind’i ragiunamenti ipistemulogichi è scentifichi.
d. I limiti à u ragiunamentu prupostu
Una limita assai grandi, è ghjà ben ghjudicata à l’epica, hè l’imbizioni smisurata, è quasgì ucezziunali, di discridità u sucialisimu. Par Hayek, a libartà hè guarantita da u libaralisimu. Però, l’usu di u libaralisimu ind’i paesa com’è u Chili di Pinochet o l’Argentina peronista fubbi ligatu à a missa in piazza di dittaturi viulenti. I Chicago boys di Friedman prudussini pulitichi munetaristi par Pinochet, è tandu iddu lampaia l’uppusanti da l’elicotteri. C’hè una limita empirica à a basa fundamentali di a so teuria chì ùn pudemi micca scansà.
In quistu libru, i so pusizioni nantu à u libaralisimu, principalmenti rappurtati à quiddi di Dirittu, legislazioni è libarta (1974) sò stati criticati dinò, li hè statu dittu chì scigliendu l’idei chì s’accunciaiani à u so tempu (difenda una spezia d’intarvinzioni icunomica ind’u 1944 è cumbatte u fattu stissu di prilivà l’impositu ind’u 1974) s’alluntaneti di a dimarchja scentifica. Certi volti, i so mutivi s’avvicinani di l’ideologia disposta nantu à una visioni di a storia poca ubbiittiva, è chì po’ essa rimissa in causa ind’a so appicazioni à un ragiunamentu “scentificu”.
C. Cunclusioni
In cunclusioni, diciaraghju chì malgradu i so difetti è dibulezzi, A strada di a servitudina hè un libru da leghja. Prima parchì Hayek hè un tippu d’eterodossu icunomicu particulari – alluntanatu da l’ortodossi marginalisti ma dinò da i currenti marzisti, leninisti, anarchisti di manca etc. – è chì ferma u rapprisintentu u più famosu di stu currenti. Dopu, a so influenza dapoi l’ “anni” Thatcher è Reagan è impurtanti ind’u dibattitu pubblicu, è ancu parchì s’hè strutturatu ind’a Société du Mont-Pèlerin è attraversu à parechji think-tanks americani è britannichi.
Siconda ragioni par a quali duveti leghja stu libru, hè chì quandu hè isciutu, hè statu un libru chì hà marcatu a sucetà, à un’epica di sfiducia di pettu à l’idei libarali chì erani visti com’è culpevuli – è difattu l’erani – di a crisa maiori di u 1929. Hè sempri intarissanti di capì l’interazzioni trà una sucetà in ricustruzzioni è l’idei chì ritrovani una influenza persa è discreditata vint’anni prima.
Noti
(1) Ind’a A Strada di a servitudina scrivi
“nimu pò essa un icunumistu maiori essendu solu icunumistu – è socu ancu tintatu d’aghjunghja chì un icunumistu chì hè sulamenti un icunumistu hà da essa un mazzolu, s’è ùn hè un perriculu riali” (p. 123).
(2) Nantu à Lippmann, leghja Il faut s’adapter, sur un nouvel impératif politique Barbara Stiegler, Gallimard Essais, 2019.
(3) “Cosa sò, allora, i carattari fundamentali di u veru individualisimu ? A prima cosa […] hè chì s’agisci di una teuria suciali : un assaghju par capiscia i forzi chì ditarmineghjani a vita suciali di l’omu, è sulamenti dopu un insembiu di principii pulitichi didutti di sta visioni di a sucetà” Freidrich Hayek in Veru è falzu individualisimu.