I fochi in Australia cuntinueghjanu di batte

Dapoi u principiu di l’incendii chì svaccaghjanu e fureste australiane, face un mese, ci hè guasgi 2 millioni d’ettari di vegetazione chì sò sparite in fiame, chì 800 000 ettari in a sola pruvincia di Nova-Galle di u Meziornu. U bilanciu hè u più cattivu dapoi l’incendii di u 2002-2003, induve più d’1 millione d’ettari avianu brusgiati.

Oghje, si prezza à più di 110 u numeru di fochi sempre attivi in a regione. Ci sò dighjà 20% di a vegetazione di e Blue Mountains, magnifica regione situata à u punente di Sydney, ch’hà brusgiatu. E a metà di l’incendii sò sempre fora di controllu allora chì i spinghjifochi lottanu cun forza cù più di 1750 omi mubilizati.

I disguasti nant’a a fiora è ancu à u bestiame sò assai impurtanti, ma stanu difficiule à valutà per avà. In fatti, a furesta di u Gondwana, classificata nant’a u pratrimoniu di l’umanità, brusgia pè a prima volta, una vera catastroffa pè quella fiora ch’hè stata, sin’avà, intatta. Di più, i koala, una spezia classificata vulnerabule, soffrenu assai : si prezza à più di 350 u numeru di koala morti ind’è l’incendii.

Un fenomenu amplificatu da u cambiu climaticu ?

Malgradu à a forza è l’impiezza di i fochi, i dirighjenti cunservatori rifiutanu un ligame incù u cambiamentu climaticu. L’incendii sarianu cagione, da elli, à una aridità impurtanti : un fenomenu meteurologicu chì saria « puntuale ».

Eppuru, i scientifichi stabiliscenu un ligame indiscutevule frà l’incendii è u riscaldamentu. S’è i fochi ùn sò micca a cunsequenza diretta di u riscaldamentu climaticu, quellu cambiu, rapidu, « rende l’incendii più frequenti è più intensi » dinunzia Janet Stanley, di l’Università di Melbourne. Si sà chì a timperatura media in Australia hè di unu gradu sottu à a media à long’andà. Quellu gradu di più pudaria avè un ligame impurtante incù a serietà di l’eventi.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.