L'austro-marzisimu – Parti I

Austromarzisimu 
Quist’articulu faci parti d’un prughjettu di Tempi, chì cerca à custituiscia in lingua corsa un fonti nantu à i muvimenti intelletuali, pulitichi, artistichi, è nantu à l’attori di sti muvimenti.

Introitu

U mondu intelletuali di l’Auropa di u punenti à l’iniziu di u XXesimu seculu era in pien’ sviluppu, riccu di scrittori, di filosoffi, d’icunumisti… In Austria, una scola ben cunnuscita ind’u spaziu di l’idei icunomichi è suciali, hè a Scola austriaca d’icunumia, nata cù i Principii d’icunumia di Carl Menger ind’u 1871, di cui Hayek facia parti è chì hà ispiratu assai pinsatori di l’epica com’è u filosoffu di i scenzi Karl Popper. Era una scola libarali, ligata incù Hayek à un anti-cummunisimu scatinatu, hè chì t’hà avutu influenza duranti tutta a siconda mità di u XXesimu attraversu à u mondu.

Eppuru, di “scola austriaca” d’icunumia, ci n’hè un’antra. Poca cunnisciuta, è mancu mintuvata ind’a maiurità di i libri è corsi universitarii di “Storia di u pinsamentu iconomicu”, l’austro-marzisimu fubbi purtanti una scola urighjinali, fundatrici di un passu alternativu di littura di u marzisimu, è chì, bench’idda nun hà pardurata, t’hà avutu un’influenza impurtanti nantu à a pulitica è l’idei austriachi. D’altronda, u vidaremi in st’articulu, miriteghja chì no fighjemi appena ind’i so passi, ricchi d’insignamenti.

A. Urighjini di l’austro-marzisimu

1. U Cuntestu storicu è puliticu

L’austro-marzisimu hè natu in a sucetà austriaca di i prima dicadi di u XXesimu seculu. À quist’epica, l’Austria ùn era un paesu indipendenti, è furmaia un imperu cù l’Ungaria attuali, chjamatu Austria-Ungaria o Imperu austro-ungaresu, unioni nata da a trasfurmazioni in una doppia-munarchia di l’Imperu d’Austria (1). L’Austria-Ungaria hè isistata da u 1867 à a fini di a Prima Guerra mundiali ind’u 1918. Si sviluppeti dunqua in ‘ssu cuntestu di putenza pulitica, culturali è militaria, di un Imperu vechju di seculi di storia, induva i cità com’è Vienna o Budapest faciani spampigliulà in l’Occidenti sanu a gloria di i populi danubiani.

Di più, ùn era ancu stata a Rivuluzioni russa di u 1917, è dapartuttu u cummunisimu è u marzisimu si custruisciani, l’intelletuali si sintendu sempri libari di prupona, di crià, di leghja Marx cù spichjetti rinuvati ed urighjinali, è sopratuttu d’integrà i duttrini marzisti in i rialtà naziunali. A situazioni icunomica era favurevuli dinò, l’ufferta truvendu a so dumanda ind’u sviluppu di un cummerciu intarnaziunali basatu nantu à l’amministrazioni culuniali, ed apprufitendu di a diffusioni di l’effetti di i dui Rivoluzioni industriali è di l’aghjustamenti in Auropa di i stati chì erani firmati ùn po’ in daretu à a fini di u XIXesimu.

L’austro-marzisimu hè dunqua u pruduttu di un cuntestu icunomicu, puliticu ed intelletuali particulari, favurevuli – à u lumu di i cunsequenzi avali misurevuli di i Rivoluzioni industriali – à una littura nova di l’opari di Marx, è ispicialmenti à una littura austriaca di i cuncetti marzisti. Ovviamenti, quist’articulu ùn pritendi micca di rivuluziunà a capiscitura di stu muvimentu, nemmancu di prupona un’analisa universitaria, cussì pricisa è linda di a minima cunfusioni o di l’ubblicati turcitoghji chì ci imponi u furmatu. Però, pruvaremi d’apra – in lingua corsa forsa par a prima volta – a discussioni è u dibatittu ingiru à l’austro-marzisimu nantu à una basa seria, fundata è documentata.

2. Divisioni naziunali è surtita di crisa par i muvimenti sucialisti : a figura di Victor Adler

U prublema principali, cuntrapartita di a richezza di st’imperu, era dunqua a so varietà etnica. Infatti, era cumpostu di Tedeschi, Tcechi, Polacchi, Slavi, Ruteni, Taliani… Si parlaia ancu certi volti di “prighjò di i populi”. Quist’istatu ci parmetti di capiscia a difficultà di i prima muvimenti sucialisti chì pruvetini di sviluppassi in a doppia-munarchia. L’associ operai erani divisati, spapersi nantu à u tarritoriu è frà i cummunità ; di più, erani strappati da leppichi pulitichi trà burghesi libarali, muderati, sucialisti rifurmatori, marzisti radicali nascenti. A tutti sti leppichi, s’aghjunghjia a mefianza trà i naziunalità è a crescita appartesi di l’anni 1880 di i muvimenti anarchisti rivuluziunarii. Dopu à parechji attentati, u guvernu imperiali pruclameti l’istatu di sediu, ripiddendu un cuntrolu fortu è sanu, ed impidiscendu di fattu u sviluppu di strutturi istituziunali sucialisti. In sta strada senza sboccu, ghjunghji allora a figura di Victor Adler, u “cunsiglieru aulicu di a rivuluzioni” com’iddu si chjamaia. Intreti ind’u partitu ind’u 1886. Stu medicu di trenta quatru anni, fiddolu di una ricca famidda di cummarcienti ebraichi, custrusi una strategia chì rispundia à l’imbizioni di fà un partitu di classa, strutturatu par accoglia tutti i naziunalità di l’Imperu, è cù un ubbiittivu eletturali.

U prugramma prupostu dopu à u cungressu di Hainfeld ind’u 1888 ripiddaia i cuncetti marzisti adattati à l’estru germanicu da u partitu suciali-dimucratu tedescu – lotta di classa, pruletarisazioni criscenti, cullitivisazioni di i mezi di pruduzioni. Aghjunghjeti dinò una cumpunenti parlimentaria, sustinendu chì si pudia fà a rivuluzioni da u puteru stissu dinò. U “novu” sucialisimu austriacu, tintu di marzisimu à l’usu tedescu, tinia par prughjettu di mantena u Statu Habsbourg, è di dà à i naziunalità una autonomia culturali è linguistica, prugrammata par chì si mantenghi a cuerenza ind’u statu. Appartesi di u 1891, a strategia pagheti, è i successi elletturali cummincetini à ghjunghja.

Adler participeti à a criazioni di a IIa Intarnaziunali(2) ind’u 1889, allora dirigenti di u Partitu operai suciali-demucratu (SAPÖ). Malgradu i so pusizioni favurevuli à i riformi cundotti da u Parlamentu, è à una suluzioni statali à i prublemi etnichi di l’Imperu, firmeti un difensori di a “fiara rivuluziunaria” ind’i massi. Però, a suciali-dimucrazia tensi una pusizioni “attentista” (Politik des Abwarten), un “rivisionistu’ mascaratu. Difatti, erani cunvinti di a sparizioni inevitevuli di u capitalisimu è adutteti una strategia prudenti, inquadrata da l’azzioni di u guvernu è a cridenza ind’a putenza di u suffraghju univarsali. Adler fubbi criticatu da i marzisti radicali par s’attitudina, affirmendu chì a dualità strategica di u SAPÖ s’avvicineti di più di a ‘cullaburazioni’ cù i capitalisti cà di una vera dirmarchja rivuluziunaria.

Avemi dunqua un paesu multinaziunali, cù un sviluppu forti – ma criticatu da certi – di u sucialisimu nantu à una basa parlimentaria è d’allianza trà i populi chì custituisceghjani a doppia munarchia d’Austria-Ungaria. D’altronda, st’Imperu hè riccu, i so Università, Operi, industrii ecc. si sviluppeghjani è crescini nantu à tuttu u tarritoriu. Di più, a scenza intreti ind’un periodu di scuparti impurtanti, è i circuli d’intelletuali, di filosoffi, d’icunumisti o di suciologhi fubbini assai influenzati da ‘ssa nova Raghjoni ghjunta da i laboratorii è i classi di fisicia è di matematica di l’Università Auropei.

(Truvareti prestu a seguita nantu à u nosciu situ).

Noti

(1) Cumpostu appartesi di u 1804 di i tarritorii amministrati da a parti austriaca di a dinastia Habsbourg dopu à a sparizioni di u Sant’Imperu romanu germanicu.

(2) Fundata à l’iniziativa di Friedrich Engels, adunì i partiti sucialisti ed operai d’Aurop in Parigi di luddu di u 1889 ; d’iniziativa sucialista, era iscritta ind’a cuntinuità di a Ima Intarnaziunali di u 1870.

Bibliugrafia

Aimar Thierry, « L’école autrichienne d’économie, une problématique de l’ignorance : du subjectivisme à la neuroéconomie », Revue d’économie politique, 2010/4 (Vol. 120), p. 591-622. DOI : 10.3917/redp.204.0591. URL : https://www.cairn.info/revue-d-economie-politique-2010-4-page-591.htm

Béraud Alain, Faccarello Gilbert, Nouvelle histoire de la pensée économique Vol.2. Des premiers mouvements socialistes aux néoclassiques. La Découverte, « Hors collection Sciences Humaines », 1993, 624 pages. ISBN : 2707132241. URL : https://www.cairn.info/nouvelle-histoire-de-la-pensee-vol-2–2707132241.htm

Campagnolo Gilles, Critique de l’économie politique classique. Marx, Menger et l’Ecole historique allemande. Editions Matériologiques, « E-conomiques », 2014, 536 pages. ISBN : 9782919694662. DOI : 10.3917/edmat.campa.2014.01. URL : https://www.cairn.info/critique-de-l-economie-politique-classique–9782919694662.htm

Krätke, Michael R. « Retour sur une tradition méconnue : austro-marxisme et économie politique (I) », Actuel Marx, vol. 60, no. 2, 2016, pp. 121-138.

Longuet Stéphane, « Les économistes autrichiens (1870-1940) », Cahiers d’économie Politique / Papers in Political Economy, 2006/2 (n° 51), p. 7-25. DOI : 10.3917/cep.051.0007. URL : https://www.cairn.info/revue-cahiers-d-economie-politique-2006-2-page-7.htm 

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.