Riassuntu: Capitale è ideulugia – Thomas Piketty

Dopu à lu so famosu libru Lu capitale à lu XXimu sèculu, l’ecunumistu Thomas Piketty hè di ritornu cun lu so libru Capitale è ideulugia. Lu scopu, spiegà l’urigini, li fundamenti è li nivelli d’inugualità di le sucetà inugualitarie, da l’Ancien régime passendu per le sucetà di schiavitù à le sucetà post-prupretaristi oghjinche. L’autore ci face lu piacè di studià dinù qualchè sucetà « esotiche » cum’è la Russia, la China, lu Brasile è la Sudafrica chì sò davveru assai difficiule à studià per l’ecunumisti per mancanza di dati. Infine l’ecunumistu di manca prupone parechje vie radicali per riduce l’inugualità assicurendu cusì, l’ugualità di le cundizioni senza distrughje, sicondu à ellu, l’iniziativi di l’agenti ecunòmichi.

L’urigini è li fundamenti di l’inugualità in le sucetà

Divisu in quattru parte, si cunsacreghja la guasgi mità di lu libru à spiegà le ghjustificazioni di l’inugualità di le sucetà anziani, è quelle basate annant’à la schiavitù, peghja forma d’inugualità.

 » Ogni sucetà umana deve ghjustificà le so inugualità : ci vole à truvà le ragioni, osinnò, ghjè l’edifiziu pulìticu è suciale chì minaccia di cade. « 

Introitu, Capitale è Ideulugia — Thomas Piketty

L’esempiu lu più chjaru hè quellu di Haïti, sucetà di schiavitù, ch’hà ottenutu la so indipendenza (ottenuta in lu 1804 in lu sangue) in cambiu d’una detta scema. Lu paese duverà aspetta l’anni 1950 per rimbursà tuttu. Quella parte di lu testu mostra bè tutta la cumplessità chì c’era per la fine di la schiavitù è lu principiu di la Rivoluzione : quale si deve rimbursà, l’oppressore, o l’oppressatu, lu schiave, o lu quellu ch’avia sottomessu l’Omu?

À quella dumanda, li rivoluzionarii rispondinu chì ci vulia à rimbursà quellu chì pussedia l’omu perchè era ellu ch’avia perdutu lu so bè. Peccatu per li schiavi, duveranu pagà li so maestri per esse stati amorosi di la Libertà. Hè quella visione di la prupretà chì, mi pare, hà marcatu lu più l’autore. Sicondu à ellu, hè lu mecanismu di cumpensazione in favore di li prupretarii chì seria à l’urigine di l’inugualità : cum’è li schiavi duvinu travaglià parechji anni per rimbursà ‘ssa detta, li ricchi ne anu prufittatu per esse carchi di soldi, favuriscendu l’ inugualità di salariu, è di prupretà.

Li nivelli d’inugualità eranu cusì forti ch’ùn serianu accitate oghje. In le sucetà tradizunali la Chjesa pussedia guasgi 25%-30% di lu patrimoniu di li paesi d’Auropa di lu Punente, lu nivellu di la nubiltà hè funziona di la richezza di basa d’un paese. Li paesi cun la crescita la più alta di richezza avianu li nivelli di nubiltà li più bassi. Si spiega perchè li rè di li paesi poveri avianu l’abitudine di dà tituli di nubiltà perchè ùn avianu terreni o soldi per ricumpensà li.

A cumplementarità, fundamentu di le sucetà trifunziunali, la Rivoluzione è la nascita di la sucialdemucrazia.

Tuttu u sistema d’inugualità ripusava annant’à la « cumplementarità » di le classe suciali (nubiltà, chjesa, terzu statu), ci vulia chì li nobili avessninu la grande maghjurità di lu capitale, riprisentava lu so pagamentu per la difesa di lu populu. La chjesa, uccupata à allevà li fideli, duvia pussedà lu capitale per travaglià in pace. È, cusì, fermava nunda per l’altri. Cusì si ghjustificheghjanu l’inugualità in ‘sse sucetà, chjamate « trifunziunali » da l’autore. L’usu di la cumplementarità per ghjustificà l’ inugualità per sèculi è seculoni fubbe prisente in tutte le sucetà di lu mondu : India, China, Auropa di lu Levente è di lu Punente. Ch’ella si chjami Brahman o Chjesa, anu lu listessu funziunamentu.

Le rivolte di lu periodu di li Lumi ùn marcanu micca la fine di l’inugualità, hè peghju perchè li rivuluziunari, cunservatori, sicondu à l’autore, anu fattu la scelta di pruteghje lu capitale acquistatu nanzu à la Rivoluzione da li burghesi è li nobili. Parechji privilegi di la nubiltà, chì sò smarriti per la notte di u 4 d’aostu di lu 1789 sò in fatti trasferiti in lu cuncettu di prupretà privata. Grazia à tuttu quessu, lu nivellu d’inugualità da lu 1789 à lu 1914 ùn cadì però aumentò. La meritocrazia, argumentu utilizatu da a Ripublica francese seria una bucia.

Le guerre mundiali, la distruzione di lu capitale è l’emergenza di lu sucialismu demucraticu permitte di cambià le cose : l’imposizione di l’imposti prugressivi annant’à lu salariu è le successione permite di riduce li nivelli d’inugualità, è fà fallà lu prezzu di lu metru quadratu dapertutu. Lu periodu 1960-1980 hè lu periudu lu più ugualitariu di l’ultimi seculi.

Lu ritornu di l’inugualità di massa, lu neuprupretarisimu è la necessità d’un sucialismu federale

Nundimendu, la caduta di li regimi cumunisti, mal gerati è tutalmente curroti, la lascita di li partiti Sucialisti di la difesa di l’operai uppressati dà l’opportunità à una risurgenza di l’ideulugia neuprupretarista. Dapoi lu 1980-1990, l’inugualità aumentanu dramaticamente. Le trasfurmazione pulitiche sò inaudite. L’autore parla di « brahmanisazione » di la Manca in riferenza à li Brahman indiani, élite educata in India. S’è li partiti di manca eranu li partiti di l’operai è di li non diplumati, cun lu tempu sò duvintati li partiti di li novi diplumati, di lu cosmopulitalisimu, li poveri elli, anu cambiatu lu so votu versu à li partiti di destra o di strema destra qualificati di « à prò di li poveri è anti-immigrati » ; ma la maghjurità di l’operai, elli, si sò ritirati di lu prucessu elettorale è stanu in casa soia. La strema destra pare allora seria la sola alternativa, ma dinù una trappula di pettu à lu neuliberalismu. Per l’autore, sti partiti di destra ùn puderianu cambià le cose à lu nivellu statale è solu un nivellu supranaziunale di lu sucialismu, chjamatu federale-sucialismu, puderia esse la sola alternativa credibile à lu neuliberalismu è l’inugualità di massa.

Hè in quellu cuntestu chì l’autore vole prisentà le so idee, le so pruposte per impedì una crescita tropp’alta di li nivelli d’inugualità chì pruvucarianu sicondu à ellu, la vittoria di li partiti « suciali-nativisti », vale à dì, di strema destra.

Imposti fortamente prugressivi (sin’à 90% per li più ricchi per favurizà la circulazione di lu patrimoniu) annuale annant’à tutti li salarii (capitale, travagliu, ecc.), lu patrimoniu, le successioni permiteria una circulazione di la prupretà, frà la ghjente per le generazioni. Seria Sicondu à l’autore la sola alternativa per impedì la persistenza di l’inugualità, particularmente quella di lu patrimoniu, chì hè la più persistente. Per l’autore ci vole à superà lu Capitalisimu sustituendu la prupretà eterna per la prupretà tempuraria. Teurisa la riforma agraria permanente, vale à dì la ridistribuzione di terra frà l’agenti ecunomichi di modu permanente. L’autore prupone dinù una dutazione universale di patrimoniu per tuttu lu mondu à li so 25 anni per permette à tuttu lu mondu di principià la vita incù qualchì soldi per cumprà si una casa o crià un impresa.

Lu travagliu di ricerca di l’autore di dati annant’à l’inugualità di le sucetà hè unicu è massivu, un veru tesoru per tutti quelli chì volenu sapè tuttu annant’à l’evoluzione di l’inugualità in lu tempu. Scrittu di manera tutalmente legible per quellu ch’ùn capisce nunda à l’ecunumia, l’autore vole chì la ghjente possi riacquistà lu sapè ecunòmicu, troppu scentificatu per ellu. ‘Ssa scentificazione à l’estremu, seria per ellu, un sbagliu maiò di l’Ecunumia cum’è istituzione academica.

Capitale è ideulugia, da cumprà quì s’è vulete sapenne di più annant’à la storia di l’inugualità è lu cambiu puliticu destra/manca di l’anni 80-90

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.