Elettu d’uppusizione à a Casa Cumuna di u XVIII esimu circundariu di Parigi, Pierre Liscia si prisenta à l’alizione di a Merria di Parigi. Capimachja di u muvimentu Libres ! di Valérie Pecresse in la metrupoli, u candidatu urighjinariu di Ghisoni c’hà ricivutu dà parlà di a so visione pulitica è di e so pruposte par dà, torna, à Parigi u so lustru di i tempi landani.
Bonghjornu Pierre Liscia. In un’intarvista à u Parisien qualchì sittimana fà, diciate chè vo’ erate in aspittera di scopre i prugramma di l’altri candidati prima di cunsiderà à prisentavvi. Oghje, sete candidatu, chì c’hè in lu vostru prugramma ch’ùn c’hè in quelli di l’altri ?
Ghjustapuntu : ghjè ciò ch’eiu vuleriu sapè ! Pà avà a diffarenza trà u me prugramma è quelli di l’altri, ghjè chì, eiu, ne aghju unu. Di manera ughjettiva, nimu hà svelatu un prugramma oghje in Parigi. Allora, si sgrananu solu prupustelle quinci è quallà ghjustu da nutrì u ghjoccu mediaticu mà nè prugramma, nemancu visione di ciò ch’elli volenu l’altri candidati par l’avvene di Parigi. À quattru mesi d’un’alizione cusì impurtante, mi si paria primurdiale di mette à palesu a visione meia in un prugramma sanu è cumpletu.
Oghje ùn sò ancu micca ciò ch’elli pensanu Villani, Griveaux o Dati. Allora postu chì, da u me latu, l’idee ci sò, aghju sceltu di prisintale è di diffendele. Dati vulia spessu ch’eiu fussi u so portavoce è ch’eiu a stustinessi in sta campagna mà ùn sò ancu micca ciò ch’ella prupone ! Ùn voliu esse u portavoce d’una candidata senza cunnosce e so pruposte annantu à i sughjetti chì m’impremenu. È sè, dopu, ùn sò micca d’accunsentu cun ella cumu facciu tandu ? Tutti i candidati ghjoccanu à l’appiatu è avanzanu ammascarati, ciò ch’ùn hè micca rispittosu di i Parigini. Avvicinendusi d’un’alizione cusì impurtante, l’alettori di a capitale anu u drittu di pudè avè una littura linda di e visione d’ogni candidatu.
Quand’aghju fattu leghje u me prughjettu par Parigi à Valérie Pécresse, ella m’hà dettu subitu di prisintami. Sò statu propiu suddesfu chì sottu à a bandera di u muvimentu Libres ! sò libaru da veru è tandu aghju pussutu prisintà e me 70 pruposte d’un colpu. A me “terapia d’attaccu” pà Parigi, ùn si pò micca frazziunà in centu prupostucce sgranellate durante mesi è mesi ! Quandi vo’ andate à u museu è chè vo’ guardate un quatru di pittura, u cunsirvatore ùn vi dice micca “Eccu, oghje u pittore hà messu u turchinu, a settimana prossima, appruntarà u giallu è a pittura sarà compia l’annu chì vene…”. Un prugramma puliticu ghjè cum’è una pittura : par capiscelu si deve vede in la so integralità.
In lu vostru libru “Paris : La honte” dite chì a merressa ùn pò micca amministrà l’ottanta quartieri di Parigi da u sò uffiziu di a casa cumuna. Sete pà di più di dicintralisazione ?
Sicura ! Pensu chì avè di più autunumia faria prò a Parigi cume à a Francia sana. Quant’à mè hè nicissariu di dà di più putere à u merre di circundamentu è chì à u Statu li tocca à dà di più putere à e Rigjone. Quand’eiu travagliavu incù Valérie Pecresse à a Rigione Île-de-France, l’avemu vistu : e Rigione t’anu a brama di fà ! T’anu a statura più ca bastante pà fà è, attempu, sò abbastanza chjuche par pudè avè una vera azzione di tarrenu : a Rigione ghjè a scala bona.
Par Parigi sò i circundamenti chì sò u livellu parfettu. In lu XVIII esimu ci campanu 180 000 parsone, ghjè una cumuna maiò eppuru a so merria ùn hè di pienu asarciziu.
Cumu si traduceria tandu ? Chì cumpetenze dicentralizà ?
Quella chì ci vuleria à dilegà u più prestu hè quella di i mulizii è di a pulizia, quessa ghjè una certezza. Parigi hè una cità brutta brutta, ognunu a sà è ancu i frusteri à dicenu. Ci sò turisti chì filmanu i toppi è chì spartenu e so video in u mondu sanu. Oghje sè a vostra stretta hè disgustevule è chè vo’ andate à vere u vostru merre di circundamentu, ellu vi rispundarà ch’ell’ùn pò fà nulla hè in fatti ghjè a rialità. Què ghjè una tuntia parchì ghjè ellu da veru chì t’hà a leghjitimità di u suffraggiu di i citatini, più cà u merre di Parigi chì, ellu, hè elettu da u cunsiliu di Parigi. Quale di megliu cà ellu par sapè chì in tal quartieru, in tal casamentu s’abbisognanu i sforzi di pulizia ? U merre di Parigi ùn pò cunduce solu una pulitica efficace. Sè a cità era pulita ùn diciariu nulla ma rinditevvi contu : spindemu 400 millioni d’euri à l’annu pà a pulizia mà si vede propiu bè chì i mezi sò menu primurosi cà a guvarnenza. U me prugramma prupone di dà u putere à i merri di circundamenti è dinò di fà una direzzione di a pulizia chì oghje sò cinque. Quandu a vostra stretta hè brutta nimu move parchì ci hè a dilegazzione di i spazii verdi, quella di u carrughju, ecc… Ci vole viramente à simplificà da fà ecunumie ed avè un’azzione più virtuosa.
Parlate spessu di u fattu chì Anne Hidalgo ùn cunsulta abbastanza i Parigini. Sete à prò di suluzione di cunsultazione di i citatini ?
In lu me libru ci hè una parte sana didicata à a dimucrazia participativa. In Parigi ghjè una macagna tamanta : multiplichendu e riunione di cuncertazione, d’infurmazione, bughjetti participativi, cunsigliu municipale citatinu, ecc., a merressa di Parigi avanta a so pratica di a cuncirtazione ma in fatti sò solu riunione d’infurmazione è pà i prughjetti tamanti cume a piettunisazione di e sponde di a Seine, a bolla d’accolta di i migranti à La Chapelle, a sparita di u stadiu di Mesnilmontant, i ritimi scularii chì t’anu un impattu direttu anantu à a vita di i Parigini, ùn ci hè statu nulla di sottumessu nè à votu nè à cunsulta.
Pà a fusione di i quattru primi circundamenti di a cità hà messu in ballu un referendum, mà ùn si pudia vutà annantu à u prughjettu stessu ma solu pà sceglie un nome di u futuru circundamentu cintrale. Ùn chjamu micca què una cunsulta ma solu aspetti cusmetichi sottumessi à cunsulta.
A cità si dice in testa à prupositu di i bughjetti participativi ma framezu à i prughjetti sottumessi ci sò cantieri chì sò imposti da a lege par a rifezzione di i sanitarii ò a sicurisazione di l’accintu di e scole. Tandu si dumanda à i Parigini di sceglie trà prughjetti d’aggradimentu, di megliuzarione di a vita è cantieri impurtantissimi chì a merria t’hà l’ubligazione di cunduce ! Què ùn deve esse sottumessu à sti bughjetti participativi ! U più gravu ghjè chì a cità utiliseghja què cume una scusa par ùn fà i prughjetti chì rilevanu di a so cumpitenza dicendu : “fighjulate i Parigini anu vutatu, ùn l’anu vulsutu”. Bella sicura, ùn si pò dumandà di sceglie trà a megliurazione di u lume publicu in un carrughju buchjicosu è piriculosu è un tettu vegetalizatu ! A ghjente vulerà sempre vegetalizà un pezzu di carrughju parchì hè più simpaticu, mà d’altonde u lume publicu face parte di l’ubligazione di a cità. Tandu i bughjetti participativi sò straviati. A dimucrazia lucale in Parigi s’assumiglia oghje à un veru mitu. Par un dettu ci sò parechje pitizione annantu à u situ Change.org chì chjamanu à a merressa di Parigi è framezu à ste pitizione certe anu millaie o dicine di millaie di firmature. Eppuru, ùn saranu mai pigliate in contu da a cità chì ella piglia solu in cunsiderazione e pitizione messe annantu à u so situ, assai cumplicatu à utilizà è chì nimu cunnosce.
Chì hè u vostru sintimu di pettu à Anne Hidalgo ? A disappruvate ?
Anne Hidalgo, ùn la cunnoscu micca è ùn aghju nisun prublema incù a so parsona ma eiu, pensu chì a so pulitica hà sbrembatu a cità è fattu calà u nostru modu di campà. Cinqui anni fà u me quartieru era pupulare mà quantunque campevule, oghje incù a me zitella ùn possu mancu più andà in li giardini publichi chì sò tutti “squattati”, disgustevuli, carchi à toppi, migranti, tossicomani o venditori di droga. Ùn aghju micca brame spripusitate ma sè un Pariginu ùn pò più mette i pedi ind’un giardinu publicu hè daveru prublematicu ! Cuntrastavu sta mane incù un babbu di famiglia accumpagnatu da u so zitellu è chì mi dicia chì a duminicata quand’elli andavanu a ghjucà annantu à una spianata mineralizata è ch’elli passavanu pà un parcu, a facianu sempre in furia in furia. Quant’à me ghjè una liberta primurosa di pudè gode di i spazii naturali è publichi.
À u principiu di u mese di nuvembre, 1600 migranti sò stati messi fora di La Chapelle. Hè statu una cosa bona per voi ?
Una cosa bona prima pà i migranti parchì a cità si glurificheghja d’accoglieli, chì a merressa hè umanista è sulidaria, impastata da i valori di u sucialisimu, eppuru durante quattr’anni hà lasciatu cripà una cintinaia di parsone d’imbernu è d’istate senza pruvà à truvà a più piccula suluzione. Ciò ch’ella hà fattu hè d’impittassi à u Statu, dicendu ch’ella era colpa soia. A so unica azzione hè stata a bolla di La Chapelle chì hà criatu un puntu solu di fissassione di i migranti à u latu di a famosa “cullina di u crack” (Un locu di vendita è di cunsumu di crack tamantu in core di u 18 esimu Ndar). Ciò ch’ellu ci avaria vulsutu fà, hè di dì ch’ella ùn avia nè e cumpitenze, nè i mezzi, dumandà à u Statu è à e cità vicine, à e Regione vicine da truvà inseme una suluzione degna è umana. Invece di fà què, prima, a meressa hà strumentalizatu sta crisa incriminendu à u Statu è dopu, da fà più sucialista cà i sucialisti, hà criatu u centru d’accolta à La Chapelle, ind’un quartieru dighjà sinistratu chì oghje si ritrova sbrembatu è ne paga solu u prezzu. Anne Hidalgo ha sceltu di sacrificà un quartieru di Parigi da dà si una cuscenza bona mà oghje soffre a ghjente è soffrenu i migranti chì dormenu sottu à ponti vicini à buleghju à i drugati è altri rivenditori. S’ella hè què a manca, prifergu à ùn esse sucialistu.
Di più, A. Hidalgo hà disprezzatu l’abitanti chì anu impittatu què cù assai dignità, tranquillamentu è senza prutistà, mà in fatti sta ghjente era dighjà una pupulazione chì campava assai assai difficultà. Tandu, quelli chì dicianu “ùn pudemu miccà piglià tutti i prublemi à dossu” sò stati chjamati intularenti o megliu, fascisti. U babbu di famiglia incù u quale parlavu innanzu mi dicia ch’ellu cumpatia pà sta ghjente chì campa fora è chì ognunu era sinsibule, ma ch’ellu era bellu difficiule di spiigà què à i so zitelli chì, tutta a santa ghjurnata, un vedenu cà baruffe è distribuzzione di droga. Cumu spiigà à un zitellu di trè o quattru anni u fattu chì a ghjente possi andà di corpu davanti à a so porta o in li curridori di i palazzi ? Hè cusì a cruda rialità di i campi di i migranti, postu ch’elli sò lochi di vita, tandu a ghjente ci manghja, ci lascia a so ramasuglia, eppò và à cacà à l’intrate di i parcaghji, di i palazi o trà duie vitture.
L’abitanti dumandanu à stà in un ambiente appaciatu ma t’anu u sintimu chì i sò zitelli ùn sò micca allivati in sicurità. Un dumandanu purtantu micca a luna ! Mà quand’elli anu a pratisione di briunà l’addisperu soiu, ci n’hè chì li facenu a lizzione di murale è di tularenza. Peghju, quelli chì li facenu sti rimprovari ùn anu nisun’idea di ciò ch’ellu raprisenta di campà chivi, chì elli stanu in li quartieri belli è fora di ste prublematiche. Què mi mette in colara ed eiu aghju custruitu a me indiatura pulitica da purtà a voce di sta ghjente à l’addisperu.
In lu vostru libru ùn biasimate mai, nè i migranti, nè i tussicumani allora chì purtantu, à dritta, ghjè qualcosa chì si face assai. Quale sò e vostre pusizione di pettu à què ?
Hè naturale ! Sè i migranti sò Porte de La Chapelle, ùn hè micca colpa soia ! T’avemu a ghjente chì ghjunghje in Auropa è u so scopu di vita ùn hè micca di campà trà duie tracolle di perifericu, certe volte sottu à a neve è à cantu à una cullina induve ci sò parechji tossicomani chì li volenu vende u crack. Ùn li possu incriminà chì saria un falsu prucessu. Eiu sò assai ripublicanu : in Francia ci sò e legge annantu à e quistione migratorie, s’ell’ eranu appiicate è rispitate, ci saria menu prublemi. Quandu un migrante ghjunghje in Francia hè cheridore d’asiliu. Par què a legge hè chjara : i cheridori d’asiliu devenu esse accolti in la dignità, oghje sò accolti sottu à i ponti ! E parsone ch’ùn anu uttenutu u drittu d’asiliu devenu esse raccumpagnate à a fruntiera, ma oghje ùn hè fattu. Vale à dì chì u circuitu d’accolta è d’integrazione hè saturatu da parsone ch’ùn partenu micca di u tarritoriu è tandu quelli chì ghjunghjenu avà pà dumandà l’asiliu ùn ponu esse accolti bè è incù dignità.
Sè no vulemu esse umani ci vole à esse sodu. Sò sempre statu è me duie ciampe, esse suciali, umanisti è intransisgente incù u rispettu di a legge, incù i valori di a laicità è a sicurità. Pà a crisa migratoria hè flagrante parchì sta mancanza à u drittu c’impedisce d’integrà l’asiliati allora ch’elli t’anu u statutu di rifugiati è chì a legge ci dumandà di dalli accessu à a furmazione, à u travagliu è d’integralli à a sucetà francese. Hè una tuntia d’accogle ognunu in tal cundizione, ci vole à accoglie menu ma megliu, è par què ci vole appiicà a legge.
Sicondu à un studiu di u MIT, Parigi face parte di e cità è più pulluate di u mondu. Cumu si pò fà pà luttà contra stu prublema ?
Què ghjè un scumpientu trimende. Airparif, l’urganisimu di surviglienza di a qualità di l’aria pariginu hè chjaru : u livellu di pulluzione hè troppu altu à l’annu è i pinzi di pulluzione sò di più in più impurtanti. Par avà a merria hà messu in ballu misure da fà calà a circulazione ma da veru ùn sò tantu efficace, pà una raghjone simplice : ogni misura hè stata pigliata senza prupone suluzione palliative à i cunduttori. Di più, ùn hà micca cacciatu a pulluzione a pietunisazione di e sponde di a Seine, hà l’hà solu spiazzata è mandata in li circundamenti è in le cità periferiche. Tamantu rigalu !
In Parigi, ùn ci hè cà una parsona annantu à dece chì t’hà una vittura è què Anne Hidalgo à sà. Cumplichendu l’accessu à Parigi à e vitture, ùn pinaliseghja cà a ghjente chì campa in le cità periferiche. Ma sta ghjente, ùn piglia micca a vittura pà u piacè : postu ch’ella campa luntanu ùn hà abbastanza trasporti, abbastanza suluzione alternative. Ma cumu hè ch’ella campa cusì luntanu ? Sta ghjente stà fora di a cità parchì campà in Parigi hè divintatu un veru lussu, dunque l’alloghju resu impussibule ! Fendu cusì, si penalizeghja dinò i più debuli è i più povari…
S’hè intesu dì ch’ellu ci vuleria à strughje u perifericu ? Saria una suluzione ?
Francamente, oghje u perifericu hè criticatu parchì u parcu automobile ùn hè pulitu, mà, u prugressu ci porta ad avè vitture eletriche, chì saranu silinziose è ch’ùn pulluaranu più. Tandu u perifericu ùn diranghjarà più à nimu.
Oghje vulemu distrughje u perifericu mà a cità si chjode di più in più cume una citadella. Ci parlanu di mette pedatichi à l’intrata di Parigi da fà pagà torna a ghjente di u fora è si chjodenu e vie annantu à e sponde di a Seine allora ch’elle so aduprate à u più da a ghjente di u foriporta ! Parigi ùn vole micca pagà par a megliurazione di a reta di i trasporti cumuni in l’Île-de-France cume in la Seine-Saint-Denis postu ch’ùn hè annantu à a so agglumerazzione, ancu s’ellu pò, di sicura, migliurà u serviziu è e mosse in lu centru cità.
A cità di Parigi si custruisce contra à u foriporta soiu. Tandu a distruzzione, a vegetalisazione di u perifericu ecc., sarà un falzomu chì sempre saranu i listessi ad esse sfavuriti.