A strega : una figura feminista ?

Passatu u ghjornu d’Halloween, hè impurtante di clarificà qualcosa. Una capiscitura tronca di una cridenza corsa chì ognunu ne cunnosce u nome mà nimu ùn sà ciò ch’ella hè.

Incù i reboots ricenti di Sabrina, Charmed o altre serie televisuale State-Unitiane, propiu bellissime d’altronde, avemu vistu vultà a moda di u feminisimu Wiccan. Si capisce strabè postu chì dà u XV esimu à u XVIII esimu seculu, 60 000 parsonne so state ammazzate durante a famosa « Chasse aux Sorcières » è perseguite in Auropa, Stati-Uniti mà dinò Africa o India, frà mezzu e quale, 80% eranu done. Incausate d’avè fattu un pattu incù u diavule dà ottene puteri supra-naturali è scuri, in a maiò parte di i casi, eranu solu medicante tradiziunale chì curavanu e ferite incù piante è tecniche antiche pruibite da a duttrina riligiosa è scentifica. Ognitantu dinò, sse done eranu l’amente d’omi putenti chì, quand’elli eranu scuparti, dicianu ch’elli eranu cascati sottu à u so malifiziu, à so impresa chì, ben intesu, eranu elle e culpevule chì eranu magantule.
Hè logicu tandu chì e magantule sianu duvintatu un simbulu di a lotta feminista è contru à a visione retrograda è pritaghja di a piazza di a dona.

A Strega : una criatura mitica feminista ?

In Corsica, a parolla a più vicina da u senzu Aurupeu o di quellu di l’altru latu di l’Altanticu saria magantula ma un antra traduzzione accetata pà « Sorcière » in lingua corsa hè « Strega ». 
Ma chì ghjè a strega ?

A strega hè una sfurmazione di a lighjenda greca di a Stryga, un dimoniu feminile alatu chì manghjava a carne umane è suchjava u sangue. Sta razza di criatura allancata di sangue si trova in u bestiame misticu di populi di l’Auropa sana chì u Vampire n’hè a forma a più famosa. In li paesi di l’America Latina, s’incontra u chuppacabra chì si nutrisce in li branchi di capre.

Strzyga - artistic vision of Slavic demon by Filip Gutowski (source: The Sarmatian Bestiarium by Janek Sielicki)

A strega cirnese, ùn hè da veru un dimoniu ma un’entita fantasmatica, chì entre in le case par via di è sarrature sottu à a forma di una bellula o d’un’animalucciu vinutu dà suchjà u sangue di i zitelli è à dalli un male misticu.  A so essenza hè maladetta di natura è ci vole cansà a so prisenza di casa.
À strega spavintava ancu i banditi è i vagabondi chì durmianu in la machja è avia d’altronde u sò pare maschile u stregone.

A persecuzione di e magantule ?

In Corsica, ùn ci hè nisuna traccia di persecuzzione o esecuzzione di magantule, ciò chì pare logicu chì a magantula à u senzu mundializatu stessu (Wiccan, ecc.) ùn esistia micca in Corsica. Certi veschi di Corsica hanu scrittu è publicatu decreti da pruibì a prattica fiminile di u voceru cunsiderata cume infirnale ma nulla di spicificu contra e streghe stesse. Purtantu si pinsava è si dicia ch’ellu ci vulia tumbà e streghe è s’hè ancu vistu a bastunata quand’elle pigliavanu a so forma animale ! I mazzeri d´un antru cantu, eranu temuti da a ghjente è tandu ùn si circava micca à tumbàli. E signadore, elle, eranu tinute care da una pupulazione povara senza tropu mezi da curà si.

A signadora tagliendu un filu sopr'un piatu - Crediti Corse Matin

Di più, fora di i Ghjuvannali, sò pochi l’episudii di a storia cirnese induv’ellu ci sò stati prucessi in eresia. Tandu, a prussima volta chè qualchissia mintuvarà a strega cum’è una criatura à prò di a lotta feminista, mandateli quest’articulu, chì hè un veru sviamentu di a leghjenda vera. In fin di contu, a mundialisazione ci hà solu purtatu i bumbò pà Halloween, ma a capiscitura oghjinca, tronca tronca di e nostre leghjende proprie ghjè colpa nostra. Tocc’à noi d’ùn avè l’oziu di mantene e nostre tradizione, u nostru cepu. 

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.