U cinema in Corsica intruduzzione per una storia di i sguardi – Valécien Bonnot-Gallucci

1769, a battaglia di Ponte Novu marca a fine di a Ripublica Corsa. U Generale Pasquale Paoli s’esilia à Londra è carrieghja incù ellu u fervore patrioticu è i ricordi di un guvernu precursori di e ripubliche muderne. In ‘ssu viaghju attraversa l’Alimagna è ci scontra à ‘ssa occasione à Goethe : « A Corsica era da longu firmata u puntu di mira di tutti l’ochji ». Tale funu e parole ch’è scrivì ‘ssu pueta scrittore riguardu à Paoli è di a storia cuntimpuranea di l’isula.

Chì sò ‘ssi ochji ? D’induve sò? Induve ritruvà i sguardi chì si sò fighjulati versu à a Corsica ? Ochji chì ne parla sò quelli chì si gironu versu à l’isula per raghjoni giupulitiche, a custituendu cum’è bersaghju strategicu per a Ripublica di Genuva è u Riame di Francia. ‘Ssi ochji sò dinù quelli chì s’investiscinu in a so custituzione pulitica è chì ne cuntonu u so successu cum’è Rousseau è Boswell. Altri ochji suvitonu quelli chì parlava u pueta custruendu cusì imaghjine storiche : quelle di Napuleone Buonaparte, di i so prove, di a so caduta, di a so mimoria è di a so discendenza. Di i banditi esiliati è ricircati. Di l’incantu turisticu è di a bellezza pitturesca. Pitture, abbozzi, fotografii anu illustratu, cuntatu è traspostu a storia di ‘ssi sguardi.

L’apparechju di rigistrazione cinematugrafica, ‘sse ucchjate annantu à a Corsica anu pussutu tandu stampà si in muvimentu annantu à a pillicula. A Corsica diventò in effettu u puntu di mira di l’ochji di i cineasti. A storia di u cinema in Corsica noi porta in effettu à iscrive i filmi in a cuntinuità di ‘ssa storia di u sguardu, à evucà a storia di l’ochji chì anu fighjulatu a Corsica insirendu si in una longa travirsata culturale d’imaghjine. A Corsica fubbe messa in imaghjine à traversu u racontu di Napuleone, i Banditi d’onori è di i Paisaghji turistichi.

Trè temi impurtanti, chì di certu ùn ramentanu micca l’entità di a produzzione cinematugrafica, ma chì ne custituiscenu i pilastri forti. A Corsica hè statu cunsiderata cum’è u nidu di l’acula da induve l’imperatore Buonaparte prese u so inviu. Filmi tale chè « Napuleone » di Gance arrighjistratu in parte in Aiacciu è Bucugnà illustranu ‘ssa imaghjina. A Corsica cum’è rughjone di u banditismu fubbe cuntata da Ferdinand Zecca Vendetta è Rinatu Norbert in « Amore è Vindetta ». A Corsica cum’è l’isula à l’incanti è à i paisaghji gluriosi hè visibile in « L’isula incantata » di Henry Roussel.

Infine l’opera di Mérimée, l’autore à i raconti d’usi, aspittori di l’identità tale ch’è ellu era numinatu hà custituitu una di e fonte di prima trinca in a storia di u cinema induve l’ochji di i cineasti anu lettu à Colomba, Mateo Falcone per parlà di a Corsica è filmà i Corsi. Falcone di William Delafontaine, prima filmu arrighjistratu in culore naturale in dà l’esempiu.

Fonte :

Michel Vergé Franceschi, « Paoli, un Corse des Lumières ».

Jean Pierre Mattei. « La Corse, les Corses et le cinéma ».

Archives Bibliothèque nationale de France.

Archives Gaumont-Pathé.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.