Un merri di l’altru mondu

Vi piaciaria à cunnoscia a storia di un attori u ghjovanissimu è simpaticissimu merri di una piccula cumuna di u Pas-de-Calais?

Attinzioni, faci mali!

Stéphane Sieczkowski-Samier hè un ghjovanu di dritta chì hè statu elettu merri d’Hesdin, ind’u Pas-de-Calais à l’età di 22 anni in lu 2014. Fin’à quì, tuttu va bè.

Certi dittaglii à propositu di u « petit Sarko » (auto proclamatu) v’ani da stupiscia ind’a misura chì u ghjovanu Stéphane voli essa chic è hà pratichi pocu raccumandati.

U merri hà ricivutu Keen V, David Hallyday, i Miss France 2015, 2017 è 2018. Pà una piccula cumuna cusì, faci mori è cuntribuisci à a publicità di u locu. Bon.

Eccettu u fattu chì issu merri hè statu destituitu da u cunsigliu di i ministri (misura eccezziunali, quinta volta in più di 60 anni) u 21 d’aostu di u 2019. I raghjoni sò cumplessi.

Un merri di l’altru mondu

In una video di Quotidien, u merri parla tranquillamenti di i parsunalità vinuti in Hesdin è di i so cazzaroli.

Pà parlanni, dici, par rapportu à u so mudellu Nicolas Sarkozy « Oui. Bah il a des casseroles, comme moi! »

U ghjiru di i cazzaroli

  • L’armi di serviziu : U nosciu Stéphane si hè resu contu chì un armarolu avia apartu i so porti in Hesdin. Ne hà apprufittatu pà cumpralli dui pistoli incù caoutchouc micca metallichi, hà cridutu u fattu chì pudia servasini, pà eddu è a so squadra municipali. Sbaddu tamantu pà u nosciu « streghju lavuranti ». Et pan!
  • Hà fattu una cuncessioni immubiliari pà l’alloghji municipali à a so mamma…edda stessa eletta è agenti immubiliari. Hè missu in esamini pà via di iss’affari. Pà fà validà a deliberazioni, ùn hè omancu passatu pà a via legali di u cunsigliu municipali mà l’hà creata da mani soii.
  • U so parmissu hè statu ritiratu dopu ad avè francatu a limita di vitezza di 40 km/h ind’un paisolu di a Somme.
  • Hà vulsutu cambià u pavimentu piddendulu ind’a merria (€ 20 000 pà iss’affari annantu à un preghjudiziu tutali di più di € 100 000 arrubati in 4 anni).
  • Hà vulsutu affittà una vittura di funzioni di tipu Audi A1
  • Hè ineligibili dapoi u 2018 pà via di u fattu chì i so conti di campagna siani stati rifiutati da a cummissioni di i conti di campagna.
  • A so segretaria di merria hè partita in depressioni ed hè morta pà via di u stress legatu à i maneri strani di u merri. A famidda di a segretaria hà lasciatu una lettara accusatrici : « L’orgugliosu ziteddu, instigatori di u regnu di terrori cumunali, hà distruttu ciò chì facia a me essenza, purtendumi à i cunfini di a me anima, intrappulata ind’u me addisperu chì m’hà purtatu à a me perdita. « 
  • Hà citatu à Hitler è u generali Von Moltke duranti à un discorsu ind’u 2014 : « Ce ne sont ni les mous, ni les neutres qui font l’Histoire mais les hommes qui s’engagent dans la lutte. » O ancu « Il faut oser risquer quelque chose pour obtenir de grands résultats. »
  • Si hè discrittu eddu stessu annantu à l’anzianu situ di a merria cum’è un « fenomenu à u sguardu carismaticu ». Ben vistu!
  • Si hè riservatu una sala di sport/benistà ind’a merria induv’eddu durmia incù a so amica. Caminaia ancu in pigiama ind’i curridori di a merria.

« Touché, mais pas coulé! »

L’ex-merri d’Hesdin hà cuminciatu à fà una cumunicazioni fendu pinsà chì s’era esiliatu à i Bahamas.

Qualchi ghjorni dopu, ci hà dittu « Que nenni! »

  • « Je n’ai absolument rien à me reprocher ». Ghjustu appena!
  • « Je ne lâcherai rien! » Omancu eiu…

Infini, u merri ne dà ind’u cumplottu contr’à a so parsona orchestratu da a famidda di Macron :

Chì tanti James Bond? Quì, u sinemà hè gratisi è à vulintà. Omancu bisognu di dumandanni, hè servitu annantu à un piattu d’oru.

Chì tanti stalvatoghji di u generu « Tempuli, speranza è scunfitta » ?

Hè un bon attori, u nosciu Stéphane, ùn hè?

È ind’è vo, sarà cusì u vosciu merri?

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.