Tempuli : Speranza è scunfitta

 

Primu capitulu

A ghjuventù in forza : l’accessioni à u puteri.

A storia cumincia in lu 2013, in a cità di Tempuli. Francescu Ascosa, 19 anni, prisidenti di l’assuciazioni spurtiva « I Chjuseddi » hè prisenti à un dibattitu publicu. U merri di tandu, Stefanu Gossotta (PS ufficiali, 79 anni), insulta u so uppunenti principali tandu scunisciutu, Cristofanu Cassapi (anzianu PS, 23 anni), amicu di Francescu Ascosa.
Si ne suvita una baruffa trà l’avversari, davanti à u publicu stumacatu.

À u mesi di ghjinnaghju di u 2014, cumincia a campagna induva Cassapi è Francescu, u rispunsevuli di a campagna numerica, usani di tutti i mezi pà appughjà annantu à l’argumentu di a so ghjuventù (reti suciali, affissi da partuttu, megafoni in cità).
U solu asempiu hè l’affissu di campagna senza faccia : « Sortez le sortant. Cassez du vieux avec Cassapi ». Cristofanu Cassapi faci scriva trè articuli acidissimi pà ghjornu annatu à u so situ, cassapi-tempoli.fr. Par asempiu, i tituli surtiti sò « Le Don Juan de 79 ans », fendu referenza à u fattu chì u merri, tantu maritatu, sia, sicondu à certi rumori, surtitu incù una messicana di 40 anni, dendu un ziteddu.
« Gossotta ou le trou de 5 millions », fendu referenza à l’intrapresa di BTP di un aghjuntu di Gossotta ch’avia uttinutu certi marcati publichi di manera dubbitosa.
I parolli di u megafonu ùn sò micca in restu : « Le vieux, rentre chez toi ! La mafia, ça suffit ! BTPSotta dehors !»
Annantu à issu sughjettu, tutti i lagnanzi di Gossotta sò firmati lettara morta.
U vechju merri, stancu, ùn pidda mancu a parolla pà difendasi di manera publica, laghendu à i so avucati a tacca di parlà à i media.
Cristofanu ne apprufita pà crià u so muvimentu pupulistu, ne di dritta ne di manca « Tempuli, putenza trè / Tempoli, puissance trois », referenza appughjata annantu à u mudellu di u « MoVimento Cinque Stelle », induva u V significa « vaffa***** », una parollaccia. U muvimentu pidda cum’è simbulu una manu incù u terzu dittu più altu, cattivu simbulu anch’eddu.

Mentri u muvimentu si struttura incù cunsiglii di quartieri è 1000 adesioni, a cità si copri d’affissi di « P3 ».

A campagna hè cunsiderata da i ghjurnalisti cum’è quidda di u Cavaddu di Troia, intrà à u partitu sucialista à l’età di 18 anni, fassi qualchi reti, sustena u merri in piazza, aspittà à un mumentu di debulezza, escia da u PS, cria a so struttura, attaccà a muraglia, fà cascà u merri. Issa metoda pari funziunà in a campagna.

I meeting di u merri ùn ani tantu successu : a cità t’hà 80 000 abitanti è solu 300 parsoni venini in i riunioni di Gossotta mentri i « meeting » di Cristofanu è Francescu radunisciani 1500/2000 sustenitori annatu à i musichi cum’è « L’internationale / Là-haut sur la colline / La Tempolaise (Ajaccienne mudificata) »

In effettu, a metoda di Cassapi funziona à a meraviglia : A so squadra hè eletta u 23 di marzu di u 2014 à u primu ghjiru incù 60,03 % di i voti contru à 28% pà Gossotta, una lista d’estrema-dritta avendu raccoltu 11,97 %.

A cità fistighjeghja a vittoria di a nova squadra pupulista incù banderi di u P3, pugnu pisatu è tamantu rumori, tutta a nuttata.
I manifestanti entrani in a merria andendu à circà u merri scunfittu in u so scagnu, pà centinaii è gridendu « I vechji fora, Gossotta à l’EHPAD ! », fendu qui’ referenza à a so età.
U scagnu di u merri hè tuttu sciappatu, tuttu in terra. Gossotta pienghji, senza pudè fà nudda, senza sustegnu. Solu.

Qualchi ghjorni dopu, Gossotta hè inviatu in clinica pà prublemi di saluta. Mentri chì Gossotta hè malatu, Cristofanu Cassapi hè elettu merri di Tempuli.

U 29 di marzu di u 2014, 6 ori di sera. A sala è a merria sò pieni di ghjenti, più di 1500 parsoni ind’è u publicu, incù a « sono » da u primu à u terzu pianu di a vechja merria, 12 televisioni pà ritrasmetta l’immaghjini.
Duranti à issa seanza, Francescu hè elettu aghjuntu à u merri in carica di i festività, di a cumunicazioni è di i sporti.
Anzianu ghjovanu sucialista, trà u 2011 è u 2013, hè ancu in carica di l’animazioni di u muvimentu P3, animà riunioni ind’è i quartieri incù l’aderenti.
Issu muvimentu, senza struttura ideologica precisa, pensa à pidda idei in Italia, ind’è dui muvimenti : A « Lega » (centru-dritta pupulistu/dritta) è u « Movimento Cinque Stelle » (antisistemu). À issu sughjettu, Francescu parti in Italia pà incuntrà i capilista di u M5S.
U 24 d’aprili, u scontru si teni in Genuva, induva Francescu pidda qualchi cunsiglii di metodi.
À partasi da issu mumentu, u P3 pidda idei cum’è, par asempiu, l’ambientalismu, a prutezioni di i servizii publichi, l’autogestioni, a lotta contr’à l’immigrazioni.

Dopu à u ritornu in Tempuli, u merri metti in ballu qualchi manifestazioni contr’à u Statu, pà a diminuzioni di l’impositi, pà i diritti di i travagliadori. Issi mossi adunisciani sempri più di 10 000 parsoni, sò ristrasmessi da i media è facini a cupartura di i ghjurnali. A pulitica municipali hè mori influenzata da u pupulismu permanenti di a squadra municipali : i salarii di l’impiegati sò aumentati di 5 %, l’impositi sò stabili è a cumunicazioni municipali hè interamenti fatta da u merri è da Francescu.

Pà muscià a cumunicazioni particulari, u contu è i pannelli di a cità di Tempuli sò alimentati incù quistioni quotidiani pà à pupulazioni è forti motti cum’è par asempiu « U statu ci voli tumbà, avà basta !  Firmeti a noscia petizioni». Iss’interpellazioni sò chjaramenti pupulisti è fatti d’una manera cattivanti pà u publicu.

Mentri chì a cumunicazioni si faci di più in più forti, l’azzioni municipali annantu à u tarrenu hè assai debuli è ancu inesistenti fin’à u mesi di marzu di u 2015, à u menu.

A seguita à u prossimu episodiu.

One comment

  1. M’hè piaciutu abbastanza stu principiu.
    Dinamicu, scherzosu, bè scrittu.
    Avà, s’aspetta a seguita.
    U putenziale, ci hè.

Lasciate un cummentu ?

This site uses Akismet to reduce spam. Learn how your comment data is processed.