Riunione « Chjama par Massimu » : frà cunsensu è divisione

U 29 di sittembre s’hè tinuta in Corti una riunione chì avia pè scopu di dibatte nant’à e derive maffiose in Corsica. À a chjama di Core in Fronte dop’à l’assassiniu d’unu di i so militanti, Massimu Susini, 800 persone si sò addunite à l’Università di Corsica.

L’ultim’accordu appena ghjucatu, l’ultima parolla appena cantata è a folla sciaccamana, degna, mentre parechje minute. I cantadori anu sunatu à a memoria di Massimu. Eppò un bufunimu, meschju d’emuzione, affanu è rabbia liati. L’inchietudine dinò. Nant’à a spianata di l’Università di Corsica, sta dumenica 29 di sittembre, sò guasgi 800 persone à avè rispostu à a chjama di u partitu independentisu Core in Fronte. Sucetà civile, sindicati, naziunalisti d’ogni parte è ancu, quì è culà, figure di a dritta è di a manca sò venute à dibatte à a riunione anti-mafia « Chjama par Massimu ». Sò trè ore di dopu meziornu è pocu à pocu, nant’à u campus Mariani, s’empie l’anfiteatru Landry. È e tensione crescenu.
E derive maffiose, usservate da anni nant’à l’isula, si palesanu infine. Di manera publica.

Un dibattitu nant’à a maffia chì si vulia prima un umaggiu, necessariu, à Massimu Susini, militante di Core in Fronte è di u Levante assassinatu, da duie palle in u spinu, u 12 di sittembre scorsu allora ch’ellu apria u so cumerciu.

« Dighjà, nanz’à u dibattitu, u silenziu, necessariu pè rende umaggiu à Massimu, naziunalistu ma sopr’à tuttu ghjovanu corsu. I discorsi, forti, di l’amichi è di a famiglia anu contu l’omu, u so impegnu in u so paese, a so visione di a Corsica ». Lauda Guidicelli, cunsigliera esecutiva in carica, trà altru, di a Ghjuventù, cunfessa : « hè sempre cumplicata di piglià a parolla daret’à ste persone, tocche di manera diretta. Ghjunghjimu in tantu chè pulitichi è sapemu ch’ùn avemu suluzione miraculu ». Emmanuelle Poli, militante di u sindicatu Ghjuventù Paolina, « fù un bellu umaggiu, cumuvente. Un mumentu di sulidarità, sinceru ». Eric Beretti, balaninu à meza folla, rigreta ellu un dibattitu cunfusu ma « impurtante è necessariu ».

Presa di cuscenza, dibattitu ineditu, divisione è cuntradizzione. Tempi volta nant’à sta ghjurnata, marcata da un fattu impurtante : a liberazione di a parolla. Infine.

 

  • Un dibatittu vivu è incisivu

U prublemu di a rispunsabilità hè statu u sughjettu primu di i cunflitti in li discorsi, hà palisatu molti divisioni trà li famiddi naziunalisti è i militanti prisenti stu dopu-miziornu. Di sicura, a quistioni ùn pò chì scatenà, ch’idda rimetti in intarrugazioni u sistemu sanu di u naziunalismu corsu dapoi a so criazioni. In sustanza hè statu dinunziatu u disturbu ch ‘hà sempri esistu trà lu mezu puliticu è quissu di u banditisimu corsu.

Un fattu ch’iddu pari lacà à palesu François Sargentini, cunsiglieru esecutivu à l’assemblea di Corsica : « A partesi di u mumentu induva t’avemu un certu pisu à u livellu di a Sucetà corsa, certi purtoni poni s’apra da certi manzi ghjuchendu l’una contru à l’altra, ci voli ad avè tuttu quissu in capu, a noscia rispunsabilità cullettiva hè quì è micca in altrò ».

Eppuru l’idea d’una falta sparta da tutti hè stata cuntastata incù forza da Ghjuvan’Santu Plasenzotti, cunsiderendu chì l’instituzioni è i so raprisintenti sò culpevuli d’un lascia-cora dapoi anni è anni : « Un seti micca rispunsevuli, parchì ùn aveti micca rispunsabilità » hà dittu à l’assemblea.

Tandu era bè prisenta la rumpitura trà la maiurità tarrituriali è i membri di a sucetà citatina chì t’hani sprimatu a so vulintà di cambiamentu, in faccia à li disfatti ch’idda scontra a lotta instituziunali contru à i pratichi maffiosi. A certezza, sicondu à Léo Battesti, iniziatoru di u novu cullettivu Anti-Maffia chì l’affari si ghjocani fora di i simplici mezi pulitichi « L’unestità hè sparta da 95% di la ghjenti di sta sucetà, parò issa ghjenti ùn esistani micca abbastanza, chì esistani solu à traversu un’alizioni o un’instituzioni, quissu si chjama a demucrazia raprisintativa, ma ci voli ad esistà nant’à u tarrenu. »

Discursati viulenti, eppuru necessari à tutti par avanzà, sparti trà analisi oghjettivi di a situazioni è u sintimu d’inghjustizia prufonda dapoi a morti di Massimu Susini, chì a scumparsa nun pò lascià nimu in l’indiffarenza, par Jean-Christophe Angellini : « Oghji, in stu paesu, l’omi sò ammazzati, parò ùn hani fattu a scelta di u banditisimu, nissuna vita ni vali un’antra, ma a vita d’un militantu naziunalistu, chì hè caddutu par i soi idei, mentri chì si andava à apra u so cummerciu è travaddà, uffenda di manera ancu di più particularia. »

Malgradu i parolla di dolu in umaggiu à Massimu Susini, sta riunioni avarà furzatu l’eletti naziunalisti à un statu di cuscenza davantu à a mossa prisenta, quissu à sfarenti livelli di l’instituzioni raprisintati trà a Culletività di Corsica è l’Assemblea naziunali. Migheli Castellani si hè sprimatu:

« Leghju è sentu la ghjenti di raghjoni, dì chì l’eletti t’hani u duveru d’agisci, un elettu, ùn a sà ciò chì sinificheghja, mi trovu in l’Assemblea Naziunali è pruvemu à raprisintà u pinsamentu di a maiurità tarrituriali. U missaghju meu : U Statu ùn pò nigà a situazioni in Corsica, primu chì t’hà i strumenti par agisci, li avemu spiicatu dapoi u primu ghjornu, senza sfrinassi è naturalamenti, di manera discreta ma assicurata. Vi possu affirmà chì tutti i rispunsevuli maiò in li duminii ch’intaressani a Corsica sò stati visti in privatu. Discrezioni ùn sinificheghja mancanza d’azzioni. »

Di pettu à a spiculazioni immubiliari, Ghjirlormu Mondoloni, avucatu par l’associ « U Levante » è « ABCDE » hà denunziatu u discorsu demagogu chì saria tinutu da u puteru tarrituriali dapoi a so alizzioni. Ramintemu chì in Corsica, i misfatti ecunomichi è l’imbianchimu di solda si sò sopratuttu svilupatti cù la vendita immubiliara, tandu l’avucatu ùn hà piattatu sicondu à iddu a mancanza d’aiutu puliticu par la difesa di i tarri virghjini è i spazii strategichi agricoli :

« U prublemu hè chì oghji, l’associ di prutezzioni di l’ambianti sò soli. Manc’una riazzioni di a sucetà civili, è di i naziunalisti à lu puteru, nienti (…) Quandu avemu participatu à i seduti par definisci di novu i spazii strategichi agricoli, si sintia dì da a bocca ‘lla CDC chì a tarra era in li nosci geni. Dopu à u sguassamentu di sta carta, amparemu chì ‘ghjà 1500 etari sò andati à a vendita. Mi pari strasordinnariu, mentri chì i naziunalisti sò ghjunti à lu puteru dapoi 4 anni, chì dui picculi associ t’hani avutu risultati maiori nant’à u tarrenu chì i nosci eletti. »

Una dumanda chjara à a CDC di purtassi in qualità di parti civili in li prucessi, a migliora azzioni, sicondu à l’avucatu di luttà contru à i custruzzioni in piaghja è a scumparsa sfrinata ‘lli spazi naturali isulani.
A Cullettività di Corsica, idda, si dici pronta à rinfurzà u so puteru è ripiddà i so dritti, parò t’hà quantunqua affirmatu chì sta lotta difficili ùn avarà risultati senza l’aiutu di i servizii ‘llu Statu. Tandu a riazzioni di i pulitichi inversu à lu guvernu nun si hè fatta prigata. Marti, u dopu miziornu, à l’Assemblea naziunali, hè Paul-André Colombani ch’hà intarrugatu u guvernu nant’à i prussimi mezi privisti par inciampà infini i pratichi maffiosi.

Stu bisognu di ritruvà subbitu u statu di dirittu hè statu appughjatu da a cunsigliera esecuttiva à a Ghjuventù, Lauda Guidicelli:
« U statu devi ripiddà u so puteru di fà rispettà l’autorità, chì sti fatti sò cunnisciuti da tutti, è dunqua da i forzi di pulizza dinò. A un mumentu datu, ci voli un travaddu d’inchiesti, di ricerchi. Dinunzià ùn duvaria essa l’affari di a sucetà corsa penseu,, avemu dichjaratu chì a maffia esistava ma ùn pudemu rimpiazzà i puteri d’autorità di u statu. Ognunu hà da piddà la so parti di rispunsabilità. Ci sò trè attori : u Statu, l’eletti è a sucetà citatina. Ci voli à discorra insembiu par scappà à stu circulu murtiferu è prupostà calcosa. »

Lauda Guidicelli ci dà dinò, compia a riunione, a so visione di l’uppusizione frà i naziunalisti chì hà marcatu u dibattitu : « di tutt’e manere, u puliticu, l’assuciativu o u sindicatu, soli, ùn ponu fà nunda. A presa di cuscenza, oghje, fù di dì « ci vole ch’è no avanzessimu inseme ». I disaccordi, i cunflitti, si discutanu è si custruiscenu. Ci sò cose à e quale ùn pensemu chì d’altri penseranu, ci vole una custruzzione cullettiva. Andemu tutti inde u listessu sensu, u primu passu hè statu fattu cù sta Chjama, ghjente diverse si sò sullivate è emu dettu : avà, basta ».

  • U sguardu di la ghjente prisenti

Laura*, Éric, Jean è Emmanuelle, participanti chì anu seguitatu guasi trè ore è mezu di discussione, da l’analise ubbiettive è storiche à e numerose intervenzione marcate da l’emuzione, ci danu e so impressione. Frà sperenze è fatalisimu.

Una presa di cuscenza pupulare

Laura, insignante ind’un liceu di Corsica suprana, cunsidareghja chì a dimarchja hà u meritu d’esiste è chì a Corsica soffre dipoi troppu tempu. « Hè assai ineditu, s’hè dettu oghje à voce alta ciò chì tutti pensenu dapoi vint’anni. À una sfarenza : nisun’nome ùn hè statu dettu. Ùn simu micca quì pè dinuncià ma ghjust’à puntu, hè quì u prublema, ci cunniscimu tutti ». Eric, u balaninu ch’è n’avemu scuntratu davanti à a facultà, cerche in fondu à a so memoria : « ci sò state e manifestazione contr’à a maffia, iè, ma micca cusì impurtante cum’è oghje ». Emmanuelle Poli, ghjovana militante di a Ghjuventù Paolina, hè stata surpresa chì a ghjente appia parlatu senza tabù ne timore, chì a parolla fussi stata liberata : « una donna hà spiecatu ch’era stata minaciata, a ghjente era vera in e so testimunianze. À contu meiu, a parolla hè stata distribuita cum’ellu ci vulia, a ghjente cum’è noi hani pussutu parlà, micca solu e persunalità ».
Un’implicazione generale chì hè stata sullivata da tutti. O guasi. « Ghjè piccatu chì una prublematica chì cuncerna à tutti ùn ghjunghji micca à adduniscia al’dilà di a sfera naziunalista » : à Jean Colonna, presidente di u sindicatu studientinu Ghjuventù Paolina, li dispiace chì tutti l’eletti di a Corsica ùn si sentessinu micca cuncernati. « Par simplificazioni, si puderebbi creda chì a maffia hè solu l’affari ‘lli naziunalisti, allora ch’ùn hè micca vera. Ghjè un prublemu di sucetà ».

Una crescita reale di a viulenza ?

Laura, hè categorica : ùn ci hè micca crescita di viulenza in Corsica. « Ghjè a viulenza chì cuntinueghja, in vint’anni ci sò stati 375 omicidii. Ciò chì cummove quì, ghjè chì u ghjovanu avia parlatu contr’à i gruppi maffiosi di u so paese, chì s’era oppostu di manera fisica ad elli ». Dop’à avecci riassuntu u corsu di storia di Max Simeoni nant’à l’evuluzione di e pratiche maffiose in Corsica – da i banditi chì facianu i so affari nant’à u cuntinente à u mumentu, inde l’anni ottanta, duv’elli sò riintrati à fà soldi nant’à l’isula – ripiglie : « è ciò chì hà veramente cambiatu quì, ghjè a spiculazione immubiliara ». Listessu custattu pè Eric : « Un pensu micca ch’ellu ci sia una crescita di a viulenza pè u mumentu, à parte una viulenza in e cità, vitture brusgiate, ecc. Què ùn si vidia micca, sò fenomeni novi. Campemu ind’una sucietà chì hà assai prublemi : puvertà, droga… Esiste ben’intesa una viulenza maffiosa, ma ùn mi pare micca crisciuta. Hè simile, cù a viulenza suciale in più ».

L’imputenza, a cunclusione vera

Mentre sta riunione, pruposte sò ben’intesa state fatte. Boycott di i cumerci chì appartenenu à una « famiglia maffiosa », educazione, lotta nant’à u terrenu, suluzione ghjuridiche…

« Ghjè più semplice à dì ch’à fà ! Dighjà, ci vole à sapella, eppò in paese, sapete cum’ell’hè. Ghjè u prublema maiò. Cumu fà ? I pulitichi anu quantunque mezi chì a sucetà civile ùn hà, pè a lotta contr’à a speculazione, ghjè quessa a parte maiò ! È dopu ? Ùn mandemu lettere à a gendarmeria, ùn vale a pena a sanu ». Eric, nant’à stu puntu, raghjunghje à Laura : « ghjente cusì à parte manifestà ùn vecu micca ciò ch’ella pò fà. U sistema maffiosu tocc’à u statu di fà u so travagliu micca à e persone cum’è mè, à parte dinuncià certe cose hè difficiule di sapè, di cunnosce bè ».
Jean Colonna, ellu, pare di più decisu : « U travaddu di a sucetà civili, ghjè u più longu è u più cumplicatu, ma dinò u più impurtanti. Ci voli à fundà torna educazioni sana è una sucialisazioni. Mandà à caternu certi idei culturali falsi chì riposani nant’à i valori ‘llu capitalisimu è ‘llu soldu rè. I prublemi, in Corsica – disimpiegu, precarità, alcoolu – è sta situazioni ecunomica facini chì una di i soli suluzioni hè u soldu faciuli è quissa, ùn hè più pussibili. Infini, pensu chì ci vularia à metta in baddu un contra-puteri mediaticu par chì l’infurmazioni si purtessi bè ».

Dumenica, hè stata annunziata da u ziu di Massimu Susini a criazione, in a settimana, d’un novu cullettivu anti-maffia in Carghjese. Un cantieru, tamantu, chì principia appena.

*u nome hè statu scambiatu

Un articulu scrittu da Lisa Pupponi è Ornella Nobili

 

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.