A Corsica in li rilazioni franco-taliani trà i dui guerri mundiali. Annu 1935 – parti 1

Un articulu di storia scrittu in francesu da Dumenicu Orsoni, isciutu in lu quaternu di « Studii Corsi » Numaru 33 di l’annu 1989. pagina 257. 

  •  « Corsica, Tunisi, Gibuti »

U lindumani di l’Accordi di Munich, George Bonnet, ministru francesu di l’Affari stragneri annunziaia davant’à a Cummissioni di l’Affari stragneri di a Camera ‘lli Deputati, a seguita di i rilazioni diplumatichi incù l’Italia (u 7 d’uttobri. malgradu a citazioni di i nomi di Francescu Pietri, diputatu di a Corsica, è di Jean Mistler, prisidenti di a Cummissioni di l’Affari stragneri, hè statu mandatu André-François Poncet, imbasciatori di a Francia in Berlinu,  à lu Palazzu Farnese.

  • A Francia ricunnosci di manera ufficiali l’autorità suprana di l’Italia in Etiopia.

Raffaele Guariglia, anzianu imbasciatori d’Italia in Argentina leghji i so lettari di creanzi à u presidenti francesu Albert Lebrun. S’hè appacciata a situazioni, è u 4 di nuvembri, il Duce parla à la ghjenti addunita sottu à u balconu ‘llu Palazzu Venezia, à l’uccasioni di u vintesimu arricordu di l’Armistiziu italo-ungresa signatu dopu à a vittoria di Vittorio Veneto, tandu iddu sparta a so fedi è i so inquietudini par l’avvena :

« In lu celu puliticu di l’Auropa, a zona turchina s’ingranda sempri. L’omi rispunsivuli lavorani à issu scopu. »

Aghjunghji quantunqua : « Saria pocu avvidutu è pocu fascistu d’abandunassi à una gioia smisurata ».
Eppuru u 30 di nuvembri a « zona turchina » di i rilazioni franco-taliani pidda una strada cattiva. Stu ghjornu quì, in lu Palazzu Montecitorio, induva si trova a Camera del Fascio, u Conti Galeazzo Ciano, ghjennaru di Mussolini inizia un discorsu di pulitica stragnera:

« L’entrata in forza del Patto di Pasqua ha rappresentato un effetivo canoreto contributo al consolidamento è e sara l’alto obbietivo della nostra politica e lo perseguiremo con tenacia e realismo non disguinti da quella circospezione che e indispensabile allorche si intendono tutelare con inflessibile fermezza gli interessi e le naturali aspirazioni del popolo italiano. »

St’ultima infrasata hà da pruducia in l’assemblea di i diputati è in lu publicu parechji manifistazioni, si senta mughjà « Tunisia ! Corsica ! Savoia ». Il Duce fighja senza trataloni issi scatinamenta. Sicondu à l’imbasciatori di Francia, piazzatu à u balconu diplomaticu di a Camera, i parolla di u ministru erani di ghjà aspittati da l’aghjenti di l’assemblea pronti à bramà quistu missaghju.
Sta pezza di teatru in la Camera del Fascio paria un avvenimentu pocu seriu, eppuru t’hà avutu cunsequenzi pulitichi è psiculogichi impurtantissimi. U 2 di dicembri, Georges Bonnet incontra l’imbasciatoru Guariglia è lu stessu ghjornu, à u Café de France in Aiacciu s’addunisciani i rispunsevuli di i sfarenti partiti pulitichi sott’à a dumanda di Eugène Macchini, prisidenti di u Cumitatu Centrali Bunapartistu. Un muvimentu in riazzioni hè tandu appruntatu in Aiacciu.

U lindumani, Monseigneur Ghjuvann’Battista Llosa accogli Dumenicu Fabiani, primu aghjuntu ‘llu merru d’Aiacciu, è pidda tandu issa stonda pà dinuncià l’andatura ‘lli fascisti taliani.

« E ch’iddu mi fussi parmissu di traducia incù assicurezza i sintimi sparti da i me cumpatriotti, ramintà chì u Corsu, stu Francesu maiò ch`hà datu u so fiddolu com’è ghjoculeddu à a Curona di Roma, t’hà forsa un surrisu in la conca quand’iddu senti chì ognunu chjama à l’annessioni solamentu verbali. » 

  • A Manifistazioni d’Aiacciu. 

A partesi di 9 ori, a Piazza di u Diamant si trova scuparta da la ghjenti citadina.
U curtegiu intra in la via Roi de Rome par ghjunghja in a via Bonaparte. In capu, i ciandarmi incù monda è monda zitedda. Daretu, certi purtani i banderi ‘lli sfarenti partiti pulitichi, quiddi di l’anziani cumbatanti è di i vittimi di a guerra. Dopu seguitani i parsunnalità lucali com’è Dumenicu Fabiani è i cunsiglieri municipali, ci hè dinò Alexandre Musso, senatori di a Corsica. Sò tutti u simbulu di l’unioni sacra di sta ghjurnata. Molti cunsiglieri ginirali è merri di i cantoni sarrani u curtegu.
A mossa varca a Via Fesch, u Borgu, u cori di a città corsa cantendu « La Marseillaise » è u « Chant du départ ». I clamori pochi fraterni à i Taliani s’alzani framezu à i brami d’allegria versu à a « Mère-Patrie », sott’à una pioghja di risu lampata da i donni è i zitedda appughjati à li finestri ‘llu carrughju anzianu.

Dopu, u curtegiu pidda u corsu Napulioni : « A spirlichjita hè magnifica, pudemu ghjudicà dapoi a ghjesgia San Roccu, di l’impurtanza di sta mossa dapoi a chjama di sabbatu. Mentri chì u capu di u curtegiu hè ‘ghjà ingaghjatu in la via di u Primu Consulu, a so fini si trova sempri davantu à i magasini Morelli-Franchini-Weber. »
A mossa si hè di più in più ingrussata, sin’à ghjunghja à 15 000 parsonni, guasgi, davantu à u Munumentu par i morti. M. Albertini, Uffizieru di a Legioni d’onori faci a lettura di l’ordini di u ghjornu chì sarà dattu à u Prefettu:

« A l’escitoghju di sta manifistazioni di prutestazioni, senza sfarenzi di pinsamenti pulitichi, o filusofichi, a populazioni aghjaccina hè d’accunsenta. Vi prighemu di trasmetta à lu Guvernu di a Republica, incù l’affirmazioni sicura di u nostru attacamentu à a Patria Francesa ch’hà fattu intrà a Corsica da i Tarcani di a Rivuluzioni, da u Ginirali Bonaparte è da l’immurtali Imperatoru Napuleone u Primu, a noscia vulintà hè di veda sfrinassi sin’à mai i ghjastemi orgugliosi di l’Italia par una tarra ch’ùn hè mai stata è ch’ùn sarà mai, u ghjuremu, tarra taliana. »

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.