Un articulu di Anthony Marcelli.
In un Wanda Metropolitano , carcu à buzeffu , I REDS di Liverpool hanu vintu lu so 6tu titulu in Champions League, piazzendusi dopu à lu Real Madrid (13 tituli) , è lu Milanu A.C (7 tituli).
Una bellissima fine di stagione par a squadra di Jürgen Klopp , ancu cù la so pusizione à lu secondu postu in Premier League , daretu à lu Manchester City di Pep Guardiola. È ci vole à dì chì quist’annu , e duie cumpetizione Auropee sò state inglese. Qualchì ghjornu nanzu , Chelsea vincia 4-1 di pettu à Arsenal in Europa League.
Quist’annu dinù , sta Champions League hè stata un spittaculu ad ogni partita , trà prestazione d’un altu nivellu cù l’Ajax Amsterdam è la so squadra giovanna assai , ma dinù scunfitte di li pilastri di sta Champions League , com’è lu F.C Barcelona , la Juventus di Ronaldo , o ancu lu Real Madrid (irunia chì a finale si ghjucava in Madrid).
- A Partita
Liverpool è Tottenham , ci hanu rigalatu dunque una finale “so British”. Duie squadre chì si sò battute sin’à la fine di sta partita. S’ellu si dubitava nanz’à sta partita di la prisenza di M. Salah , è di S. Mané , fatta fine l’emu ritrovi nant’à lu tarrenu.
D’una parte un module in 4-2-3-1 par Tottenham cù : Lloris (C), Trippier, Alderweireld, Vertonghen, Rose, Winks, Sissoko, Eriksen, Dele, Son, Kane.
Infine un module in 4-3-3 par Liverpool : Alisson; Alexander-Arnold, Matip, Van Dijk, Robertson; Fabinho, Henderson, Wijnaldum; Salah, Mané, Firmino.
A partita hè principiata propiu bè , cù una prima azzione à prò di Liverpool , chì l’hà fatta nasce à mancu u primu minutu cù un calciu punitivu , appughjatu da lu cuntrolu video (VAR) : una manu di lu centrucampista di Tottenham (M.Sissoko) in la so propria zona difensiva. Un ballò rigalatu à M. Salah chì parmette di fà la so prima reta. Longu stu primu periudu , una reta hè stata messa , ma sempre cù un bellu ghjocu d’attaccu d’una parte è di l’altra.
U secondu periudu hè statu in lu listessu filu cà lu primu , cù prove di reta d’una parte è di l’altra , ma sarà torna rossa la seconda reta di sta partita à lu 87’ , rigalata da Divock Origi , cù un ballò persu in zona difensiva di Tottenham. Ghjè tandu la fine par Tottenham chì ancu cù 5 minuti suplementarii di ghjocu, ùn pudaranu mette ste duie rete.
Vittoria tandu di Liverpool chì cusì mette in alligria , i so sustenitori , venuti numarosi par sta finale.
- U dodecesimu omu
Si tratta spessu chì l’allenatore , sarebbe nant’à lu tarrenu u dodecesimu omu.
S’è lu spitaculu sportivu è musicale hè statu assicuratu bè , un fattu di li più stunente s’hè passatu à lu 17’. Da li gradini di lu Stadiu , una hè surtita nant’à lu tarrenu in vestitu di mare. Ne ci vulia pocu par fà nasce le scaccanate ed un interruzzione di la partita.
Sta donna , chjamata Kinsey Wolanski hè cunnisciuta assai nant’à Instagram cù lu cugnome Kinsey Sue. Hè la cumpagna di un certu Vitaly Zdorovetskiy , cunnisciutu assai nant’à Youtube.
St’intrata ùn era priva di scopu. Era una stonda di pubblicità à prò di un situ di filmettu par adulti , quellu di lu so cumpagnu. Una stundeta chì ha parmessu à Kinsey Wolanski di ragiunge 2 millioni di follower nant’à Instagram.
Ne ci vulia pocu ancu , à la ghjente par fane trucchi , mittendulla in scena cù la coppa o la mudaglia di la finale !
Par quelli chì s’arricurdaranu , un certu Remy Gaillard s’era fattu passà par un ghjucatore di Lorient , in finale di Coppa di Francia. Avia tandu pussutu ghjunghje sin’à tuccà la manu di lu presidente di la Federazione è di la Republica , è ancu pisà a Coppa !