Mentri chì i sviluppatori di logiciels si sò radduniti u 3 di ghjunghju di u 2019 in San Jose (California) pà una cunfarenza stampa annuali (a WWDC), Apple hà annunciatu i so prezzi pà i novi schermi, u Mac Pro o altri nuvità cum’è a fini di iTunes è macOS Catalina (10.15).
Un Mac Pro à prezzi elevatissmi.
Issu MacPro hè vindutu incù a crema di i prucessori : un Intel Xeon 8 Core. U prezzu ? U vi lasciu imaghjinà !
Apple vi vendi, in issu Mac “raspa à casgi 2.0”, 32 Go di mimoria di basa (4 à 8 volti a quantità prisenti annantu à u vosciu PC classicu), 64 o 96, 128 o 256 o 768 o 1,5 To di mimoria. 1,5 To di mimoria ? Quantu custarà ? € 30 000 ? Di più ?
Ùn a pudemi dì.
Pà essa francu, 32 Go di mimoria vi bastani pà un usu quotidianu. Ancu 4 Go vi bastani annantu à un iMac, Macbook pro o tutti i formi di PC classicu.
Un discu rigidu SSD di basa incù sulamenti 256 Go hè vindutu incù u mudellu. Vi bastaria pà qualchi filmi.
Hè vera, iss’urdinatori hè specificu pà i prufessiunali di a video/u sinemà, micca pà un segretariu d’intrapresa o un scrittori d’articuli sittimanali.
Quali pagaria $ 6000 (€ 5000) pà un urdinatori senza schermu (vindutu à $5999 da i quali 1000 pà u solu pedi), incù una carta grafica di siconda o terza generazioni (Radeon Pro 580X, di u 2013) è incù sulamenti 256 Go di discu rigidu (cum’è in lu 2013)?
Un ghjuvanottu americanu, Luke Miani, vi ne parla più in dettagliu in una video mori dittagliata è intarissanti o una siconda annantu à macOS Catalina. U puntu di vista ch’eddu sviluppa hè ghjustu : parchì cumprà un MacPro incù specificazioni tecnichi vicini (eccettu Ram è prucessori) à quiddi di u MacPro precendeti?
5000 €, 4 mesi di salariu, quantunqua. Pà avè sulamenti una qualità grafica media è un discu rigidu degnu di l’iniziu di l’anni 2010.
U MacPro « rumenzulaghju » vi costa di ghjà €3399 incù un discu rigidu è una carta grafica simili.
Caspita !
I prufessiunali vi diciarani chì Apple vendi pridutti di qualità.
Hè vera. Ma parchì cumprà un Mac Pro quand’è vò seti un utilizatori lambda?
Quistioni esistenziali, guasgi.
Un MacPro di u 2008 pò, incù qualchi mudificazioni minori (i famosi tweak), lancià di manera ufficiosa macOS Mojave è podassi a nova versioni di macOS Catalina da quì à u vaghjimu di u 2019.
Issu tipu di Mac Pro si pò truvà annantu à internet pà à pocu pressu € 400-450, rispettu à i € 5000 minimali di u Mac Pro è vi pruponi 6 Go di mimoria, 500 Go di discu rigidu.
Feti dunqua a voscia scelta.
Pudeti, à issu sughjettu, fighjulà una video di iCollection chì hà avutu a furtuna d’essa statu invitatu à a WWDC in San Jose (USA). Hè u primu à avè vistu à u novu mudellu di Mac Pro . Di manera generali, a so presentazioni in francesu hè veramenti parfetta, da cunsiglià à tutti quiddi chì volini sapenni annantu à l’attualità di Apple.
Mac OS Catalina (10.15) è a fini di iTunes
iTunes hà fattu u so tempu : 19 anni di boni è leali servizii.
Da i so inizii annantu à Mac OS 9 à una versioni « pidda tuttu » di Mac OS 10.4 à 10.14, era un utilitariu mori usatu da a ghjenti annantu à Mac è Windows.
U famosu iTunes sarà rimpiazzatu da trè applicazioni : Musique, Podcast è Apple TV.
I trè funziunalità sò ripresi da trè applicazioni, logica in fatti.
MacOS 10.15 sarà cuntrullabili da a voscia voci (sulamenti in inglesu pà u mumentu) è vi parmettarà di cunnettavvi di manera più semplici annantu à u vosciu spaziu Apple in linea.
Nutemu, infini, chì nudda ùn si passarà quand’è vo brancareti u vosciu iPhone annantu à u vosciu Mac, ci vularà à andà annantu à u vosciu Finder pà truvà i caratteristichi di u vosciu apparechju.
L’urdinatori Apple vechji di più di 6 anni (2012 – 2013) ùn sarani più suppurtati da u sistemu di manera generali. Di manera assai evidenti, ci sarani tweak (mudificazioni da a parti da sviluppatori indipendenti) pà pudè installà à macOS 10.15, cum’è ind’i versioni precedenti.
Chì ni pinseti di a fini di iTunes ? Piccatu o uccasioni d’un rinnovu?
« Toc de mac » u novu Mac ?
Vi piaci a nova versioni di macOS ?
Pudeti cummentà iss’articulu è parlanni annantu à i reti suciali !