A l’iniziu di l’annu 2017, hè nata l’UDJ, « L’Unioni Di a Ghjuventù », u partitu senza cartula pulitica, hà fattu a scelta d’allazià à l’ingaghjamenti citatinu una ginirazioni nova ch’affirma a so vulintà di fassi intesa fora ‘lla suscrizioni simplici à un partitu tradiziunali. A so andatura hà purtatu u so prisidenti Houssam Kajja, sin’à i porti ‘llu parlamentu auropeanu incù l’idei innuventa d’un « Pattu di a ghjuventù », adunnendu più di 200 pruposti, isciuti di ghjovani ‘lla Francia sana, di più hè un’uccasioni di piddà parti, dirretamenti à l’azzioni pulitica da u livellu lucali sin’à auropeanu.
- Un’andatura nova ?
Quandu si senta parlà par a prima volta di l’UDJ, l’idea pari seguità un’andatura ch’esista dapoi qualchi anni, nant’à u mudelu ‘llu muvimentu « En Marche », appartu à parechji tindenzi è senza culori pulitichi chjari, hè statu moltu piacivuli par una parti maiò ‘lla ghjuventù. Eppuru, ci sò sempri ghjovani scuntenti ind’è i nuvizi in pulitica ch’ùn trovani micca a so piazza framezu ‘ssi struturi, i raghjoni sò i listessi : primu una mancanza d’ascolta da a cima, u sintimu d’ùn essa micca cunsidarati in li so aspirazioni propii, ma dinò l’imprissioni d’un essa ch’un decoru, par dà una maghjina valurizata è dinamica.
- Travaddà insembiu
Tandu l’UDJ hà pruvatu à custruìssi fora di st’idei negativi, chì ghjustapuntu u partitu hè fattu « da i ghjovani, par i ghjovani è in l’intaressu solu ‘lla ghjuventù », com’è l’hà mintuatu u so prisidentu Houssam Kajja. Urighjinariu di Purtivechju, studientu in scienzi pulitichi è rilazioni intarnaziunali à a Sorbonne in Parigi, hà militatu in parechji partiti tradiziunali, tandu si hè resu contu ‘lla manera ch’aviani l’eletti di cunsidarà a ghjuventù « Semi mandati à fà u rinsignamentu, à sciaccamanà in l’aduniti è l’appuntamenti pulitichi, ma quandu t’avemi un’idea, ùn semi ascultati », hè statu dinò rivultatu di a mancanza ‘lli ghjovani in l’instituzioni naziunali o auropeani, musciendu chì t’hanni dinò una piazza leghjitima in i discursati pulitichi. Un annu dopu à a criazioni, stu prughjettu pari piacivuli, 14 cumitati righjunali sò stati fundati in a Francia sana : Parigi, Lille, Strasburgu, Menton, Nizza, Marsiglia, Ecchisa, Toulouse, Vannes, Purtivechju, Amiens, Tours, sin’à l’isula di a Réunion. U muvimentu si hè strutturatu à l’usu d’un veru partitu, incù dipartimenti finanziari, ecunomichi, di cumunicazioni, è t’hani u so propiu spaziu audio-visuali.
- Un prughjettu assai ambiziosi in corsu.
U partitu voli chì a ghjuventù sia infini ascultata, difendalla à u parlamentu auropea, è par compia, riprisintàlla di manera sana è sincera. Tandu u partitu t’hà avutu l’idea di metta in baddu un « Pattu ghjuventù » : i ghjovani isciuti di i cumitati righjunali hanni mandu i so pruposti, à pruposittu d’ambizioni pulitichi suciali, ecunomichi è eculogivhi. 100 pruposti sò stati scelti in u scopu di veda certi punti di stu pattu lettu è adupratu sottu à a forma di leghji novi à l’Assemblea naziunali, ma dinò à u parliamentu auropeu. Sicondu à l’UDJ, stu pattu hè u spechju fidu di l’aspiazioni di a ghjuventù, ch’ùn isci micca d’una pinsata pulitica maghjuritaria. Di fattu, ogni ghjovanu pò essa un cunsiglieru, è micca solamentu un membru di u partitu, una manera di cambià a pulitica tradiziunali.
Scopra di più annant’à l’UDJ:
- Video di prisintazioni: Cliccà quì
- U ligamu internet: Cliccà quì