Luntana Auropa

Di manera generale, i populi si sentenu luntani di a pulitica. Stu sintimu hè di più impurtante quandu chi i prublemi sò gistiti da luntanu. Forse pè l’avene di l’Auropa, sarrebbe interessante di sceglie un modu di gestione chi permetteria à tutti i populi d’Auropa d’esse l’attori di e decisione.
Oghje a paura ch’ella face nasce l’Auropa vene di u fattu chi i citadini ùn si sentenu micca maestri di e decisione chi sò pigliate. U pesu di i stati hè forse troppu impurtante è ùn lasce nissun’piazza à e dumande di i populi. Indè sta situazione, u principiu di subsidiarità sarrebbe una suluzione. E regione sò di più vicine di e pupulazione, dunque u fattu di dalli certe cumpetenze indè a gestione di e risorse ò ancu indè e finanze pirmittaria di dà un impurtanza à i populi. E regione puderianu urganizà cunsulte pè dumandà u so pare à u populu nant’à un prugettu o nant’à certe priurità finanziarie.

Hè più simplice d’urganizà una cunsulta à u livellu regiunale ch’è à u livellu naziunale. Eppò certi prublemi ùn cuncernenu chè certe regione. Carles Puigdemont, anzianu presidente di a catalunia, à l’origine di u referendum nant’à l’indipendenza di sta regione, ci dà indè u so libru « La crisi catalana » una visione assai muderna di a custruzione di l’Unione Aurupea. Sicondu ellu, e regione è e nazione senza statu puderianu esse capace di gistisce certe cumpetenze inde una logica di subsidiarità. Di più, i Stati ùn ci ghjunghjenu micca à gistisce certi prublemi cum’è per essempiu a securità, l’ambiente, o e migrazione. Senpre sicondu a visione di Puigdemont, u fattu di dà cumpetenze a e regione sarebbe una manera di scambia a visione aurupea oghjinca di i populi, chi vedenu l’Auropa cum’è un’adunita chjosa cumposta di stati solu interessati dà u pudere ecunomicu. Hè una visione chè nò pudemu spirà pè l’interessu cumunu. Pè svillupassi una regione hà bisognu di finanze. Se a corsica pudia raccoglie l’impositi di u so populu è aduprà l’impiegu di ste finanze in leia incù a vuluntà di u populu, e cunsequenze ùn puderianu chè esse pusitive pè tutti. Quandu una regione o un paese s’arrichisce, diventa in capacità di luttà contru à a puvertà è u disimpiegu. Pò prupone nove strategie d’educazione è di furmazione pé risponde à i novi bisogni. Ci vole dinù à piglià in contu a necessaria trasfurmazione di l’impieghi in certi duminii. Devenu esse messe in piazza pulitiche di ricunversione pruffiziunale pè riduce u disimpiegu è crea impieghi cuntinui indè u tempu. Ci vole à fà casu d’ùn entre micca ind’una logica di pruduzzione intensiva. In corsica u territoriu ùn hè micca adattatu.

U sviluppu deve esse ragiunevule è soppra à tuttu deve curisponde à e risorse dispunibbule. In ecunumia si parle di a specialisazione. Vene à dì chi i paesi devenu svillupà i prudutti ch’elli ponu pruduce partendu da e so risorse. A u cuntrariu, quand’ellu costa troppu caru di pruduce qualcosa, diventa interessante d’impurtallu. Cusì nascenu scambii trà i paesi in funzione di e capacità è di e risorse. Tutti sò vincidori. L’Auropa faciliteghje i scambii trà paesi membri pè via di l’accordi ecunomichi è di a riduzzione di e tasse nant’à l’impurtazione. Hè cusi chi oghje l’Auropa si trove esse a prima putenza ecunomica mundiale, dananzu à i Stati Unit o a China. I valori chi sò a l’origine di a fundazione di l’Unione sò per essempiu quelli di l’accetazione di l’altru (per quessa ci vole à ampara à cunoscelu). Cusì ùn si face più a guerra mà si vedenu i prugetti d’avene chì si ponu fà in cumunu. Tutti ci si ritrovenu, stu principiu permette dinò d’arricchiscesi. Stà vulintà passe dunque per una specialisazione è una sulidarità trà i membri. Per essempiu s’ellu hè in difficultà un paese, diventa l’intressu cumunu di fà u sforzu d’aiutallu à svillupassi. Dopu, divintarà ancu ellu un mutore di l’Auropa, cù a so pruduzzione è a so cunsummazione. U fattu d’aluntanassi di sti valori fundamentali ùn pò chè crea un squilibriu indè l’istituzione. Certi stati membri anu a paura di dà i puderi à e so regione. Volenu tene una piazza particulare è avè a suprana nant’à tutti i sugetti ancù pur s’elli ùn ponu micca truvà suluzione. Forse anu a paura di vede smarisce a scala di u Statu. Stu prublema di cumpetenze face cresce l’idee antiaurupee. Purtantu oghje un paese aurupeu ùn pò micca pritende avè una piazza ecunomica mundiale s’ellu ùn face micca parte di l’Unione. Senza l’avantaghji ecunomichi di l’Unione ( riduzzione di i costi nant’à l’impurtazione), i paesi membri ùn ponu micca esse cumpettitivi di pettu à paesi cum’è i Stati Uniti o a China.

Si vede chì, dopu à qualch’anni di discusione, u Brexit inglese ùn puderà forse micca esiste. Imparavamu qualchi ghjorni fà à demissione di Theresa May, prima ministra inglese chì prove dipoi parechji mesi di truvà una suluzione pà esce di l’Auropa senza avè effetti negativi nant’à l’ecunumia inglese. S’elli escenu ùn averà più accessu à u mercatu internu aurupeu incù i sò avantaghji. Vene à dì chi pè pudè vende a so pruduzzione in Auropa è cuntinuà à vince soldi, li tuccherà à cresce i so prezi postu chi i so prudutti saranu tassati di più pè entre in Auropa. Ma di manera generale, nimu ùn vulerà cumprà certi prudutti à prezzi tropu impurtanti. Di più certe intriprese preferiscenu parte à stallassi in Francia o in Allimagna pè prufità di u cunfortu ecunomicu aurupeu. Di sicuru, l’Auropa hè un attrazzu interessante. Per funziunà cum’ellu ci vole, forse una riforma di u so funziunamente sarebbe utile. Saria una manera di dà di più impurtenza à e regione é i so populi.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.