U plasticu chì nota in lu nostru mare terraniu ùn face disgraziamente cà cresce. L’hà fattu guadagnà u statutu di u mare u più bruttu di u mondu d’apressu à WWF è què ghjè assai tristu.
U mare cuntene à stu mumentu quì à pocu pressu un mezu millione di tonne di buttiglie, di sacchi è di pezzi di plasticu. A dicenu WWF, chì sò lampate in l’acqua 130 000 tonne di microplasticu à l’annu, è a francia hè dinù respunsebule ( pè quelli chì si ponenu quistione ) puru sè certi corsi ùn rispettanu mancu a so terra.. è a so acqua.
E fiure è e video di ‘ssi cuntinenti di plasticu anu fattu u giru di u mondu. In tuttu lu mare, ci sò zone induve s’adduniscenu a maiò parte di i rumenzuli, è què hè per via di i currenti, esistenu à u numaru di 5 : Duie in u Pacificu, duie in l’Atlanticu è una in l’Indianu. In 6esima pusizione daretu à ste zone vene lu mare mediterraniu incù 1,5 millione di pezzi per chilometru quatratu.
U mare mediterraniu raccoglie i rumenzuli perchè viaghja cum’è una trappula essendu guasi chjosa. Ma u turisimu di massa hà un pesu maiò in sta pulluzione, ogni annu venenu 200 millione di turisti è pruducenu 40% di rumenzuli in più di a pruduzzione lucale. E strutture ùn sò tante addattate per stu marosulu di turisti.
A francia hè in 5esima pusizione di i paese chì pullueghjanu u più u mare incù 66 tonne à ghjornu.
L’animali marini minacciati
Sò 60 spezie di pesci, trè spezie di cuppulate, 9 d’acelli marini è mammiferi cumè u cascialò o i delfini chì sò vittime di u fattu d’ingerisce u plasticu di u mare. Avemu trovu pacchetti di sigarette in qulachì pesci o scatule di chips ind’è altri, certe ostrice o muscule avianu micropezzi di plasticu nentru u gusciu. U casu assai vargugnosu di una balena ch’avia in corpu 9 metri di retaghjolu, 4,5 metri di tubu, 2 vasetti di fiore è parechje incirate.
18% di i pescispada è di i tonni anu resti di plasticu in corpu. Puru i più chjuchi di l’oceanu chì manghjanu in lu so fondu ponu esse tuccati. L’associu WWF cita un studiu nant’à i microplastichi in l’ostrice è e muscule cultivate per a cunsumazione di l’omu, è mustrava chì qualchissia chì ne manghja aspessu, puderebbe ingerisce fin’à 11 000 pezzi à l’annu.
Ci vulerebbe à svegliassi è piantà ste cunnerie, u mare si rispetta, ùn hè un locu per ghjittà e ramasuglie. A quistione di i rumenzuli in Corsica hè una di e più impurtante, ùn si pò mandalli ab eternu in Francia o interralli tutti sott’à noi.. Hè più chè tempu di truvà suluzione per piantà sta pulluzione
Da riflette ne !