Terra ferma
Ogni casa abitata
S’è scurdata di l’antichi,
Aghiu vistu venerata
Quella lingua tra l’amichi
A bandera ‘nsanguinata
Un rigalu par i richi.
I mo vecchj qui camponu
Sott’al cilestu biatu,
Fureste, macchie, fiumonu,
Ma lu corpu è disfattu,
Neve bianche sul Cuscionu
E lu mare trapanatu.
Babb’e mamma con tristezza
Par lu mare a Livornu
Lascionu tutt’a billezza
Petre, celu e lu fornu,
Ma è stata cuntentezza
Di ritrovà corsu jornu.
So’ criscitu citadinu
Framezu a l’albi rumani
E lontano so’ da Cirnu
A so luna e po’ li mani,
U chjaror tissutu finu
Di ricordi e d’affanni.
Lenta e calma puesia
Ramentati e conferma
Dici a strofa d’armunia
Fatta da la piuma inferma,
Loca e jorna, calunnia
Contru à la terra ferma !